काठमाडौं- २०६१ बैशाखको घटनाले २०७५ सम्मै दुःख दिइरह्यो माननीय राजीव गुरुङ (दीपक मनाङे)लाई। प्रदेशसभा सदस्य निर्वाचित भएर पनि त्यही घटनाले उनी सपथ खान पोखरामा रहेको प्रदेशसभा भवन जानुको साटो भूमिगत हुनुपर्यो।
कारण थियो त्यो बेलाका कट्टर दुश्मन मिलन गुरुङसँगको झडप। घटनामा मनाङे समूहका सदस्यले खुकुरी हानेर मिलन गुरुङको हातै काटिदिएका थिए।
त्यही अपराधमा अदालतले कैद सजाय तोके पनि उनी अदालतका कर्मचारीसँग सेटिङ मिलाएर बाहिरै बसेको खुलेपछि खोजि शुरु भयो र लुकेपछि पक्राउ परेर जेल गए पनि बाहिरै बसेर पुनरवलोकन गराउन पाउने अदालतको आदेशमा कारागार बाहिर आएपछि सपथ लिएर माननीयका रूपमा वैधता पाए।
अहिले उनै माननीय मनाङे फेरि विवादमा छन् 'मिलन गुरुङ'लाई नै कुटेर। तर यी मिलन चक्रे भनिने पुराना मिलन हैनन्। यी परे अखिल नेपाल फुटबल संघ कास्कीका अध्यक्ष मिलन गुरुङ।
उनी विरुद्ध प्रहरीमा जाहेरी परिसक्यो बुधबार। र उनले बुधबारै आफैंले पत्रकार सम्मेलन नै गरेर कुटेको स्वीकार गर्दै भनिसके- जम्मा एक लात्ती र दुई झापड हानेको त हो।
२५ वर्ष अगाडि मिलनसँग भएको लफडाको केस अझै चलिरहेको छ अदालतमा। अहिले अर्को मिलनसँगको लफडामा परे उनी।
जे रोप्यो, त्यही फल्यो
गुन्डा नाइकेका रुपमा परिचित राजीवको ठमेलबाट सुरु भएको अपराधको यात्रालाई प्रदेशसभासम्म पुर्याएको नेकपामा मिसिएको तत्कालीन एमालेले नै हो।
कमल थापा नेतृत्वको राप्रपामा प्रवेश गरेका उनलाई तत्कालीन एमालेले आफ्नो पार्टी प्रवेश गराएको थियो।
पार्टीले प्रदेशसभाको टिकट नदिएपछि मनाङ प्रदेश (ख) बाट स्वतन्त्र उम्मेद्वार बनेका उनलाई एमालेले सघाएर १ हजार ४ सय १० मत ल्याएर जितेका थिए।
पछि उनलाई गण्डकी प्रदेशमा मुख्यमन्त्री पृथ्वी सुब्बा गुरुङले नेकपामा प्रवेश गराएका थिए।
.jpg)
अपराधिक पृष्ठभूमिका मनाङेलाई पार्टी प्रवेश गराएकोमा केही नेताले अशन्तुष्टि जनाएका थिए। केहीले रत्नाकर डाँका सुध्रिएर वाल्मीकि बनेको कथा सुनाएर मनाङे सुध्रन्छन् नि पनि भनेका थिए। तर उनले सिकेको कला छाडेनन्। जे रोपेका थिए, त्यही फल्यो।
संयोग, पार्टीले आफ्ना कार्यकर्तालाई तँ पनि भन्न नपाइने, भने कारबाही हुने सहितका प्रावधान रहेको आचारसंहिता बनाएर सर्कुलर गरेको भोलिपल्ट उनी कुटपिटमै उत्रिए।
उनले पत्रकार सम्मेलन नै गरेर 'कुटेको हो' भनिसक्दा पनि पार्टी भने मौन छ।
मनाङेको राजनीति यात्रा
-०४७ देखि ०६८: कहिले राप्रपा कहिले कांग्रेस
-०६८: संघीय समाजवादी पार्टी प्रवेश
-०७३ पुस-२८: राप्रपामा प्रवेश
-०७४ असोज : एमालेमा प्रवेश
-०७४ कात्तिक: स्वतन्त्र उम्मेदवार
- ०७४ मंसिर: प्रदेशसभा सदस्य निर्वाचित
-२०७६ असार: नेकपामा प्रवेश
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
