उद्योग, वाणिज्य तथा आपूर्ति मन्त्रालयका सचिव बैकुण्ठ अर्याल। फाइल तस्बिर
काठमाडौं- नेपाल र चीनबीच भएको पारवहन सम्झौता कार्यान्वयनमा आएको छ। सम्झौता कार्यान्वयनमा आएसँगै नेपालले चीनका ७ बन्दरगाह प्रयोग गर्न सक्ने भएको छ।
सम्झौता कार्यान्वयनमा आएपछि नेपालले चीनका ४ सामुद्रिक र ३ सुख्खा बन्दरगाह प्रयोग गर्ने बाटो खुलेको हो। उद्योग वाणिज्य तथा आपूति मन्त्रालयमा भएको पत्रकार सम्मेलनमा मन्त्रालयका सचिव बैकुण्ठ अर्यालले चीनसँगको पारवाहन सम्झौता कार्यान्वयनमा आएको र चीनका ७ बन्दरगाह नेपालले प्रयोग गर्न सक्ने जानकारी दिएका हुन्।
'चीनका तियानजिन, लियनयुंगा, सेन्जेन र झानजियाङ गरी ४ सामुद्रिक बन्दरगाह नेपालले प्रयोग गर्नसक्ने छ। त्यसैगरी ३ सुख्खा बन्दरगाह लन्झाउ, ल्हासा र सिगात्सेपनि नेपालले प्रयोग गर्ने बाटो खुलेको छ। यही जनवरी १ बाट पारवाहन सम्झौता कार्यान्वयनमा आएको हो,' सचिव अर्यालले भने।
चीनतर्फका ६ नाका प्रयोग गर्ने सहमति पनि भएको छ। रसुवा र तातोपानी (कोदारी) नाका यसअघि नै सञ्चालनमा आइसकेको छन् भने हुम्लाको यारी सुंखवासभाको किमाथाङ्का, मुस्ताङको नेचुङ (कोरला) र ताप्लेजुङको ओलाङचुङगोला गरी ६ दुईपक्षीय व्यापारका लागि नेपालले प्रयोग गर्ने छ।
भारतसँग भएको पारवाहनसम्बन्धी सन्धि पनि तत्कालका लागि नवीकरण भएको छ। सचिव अर्यालले सन्धिमा आवश्यक नयाँ विषय थप गरी पुनः सन्धि गर्ने तयारी मन्त्रालयले पूरा गरेको सचिव अर्यालले बताए। नयाँ सन्धि भएपछि नेपालले भारतको आन्तरिक जलमार्ग प्रयोग गरेर आयात निर्यात गर्न सक्ने छ। त्यसैगरी, नेपाली ध्वजावाहक पानी जहाज भारतीय आन्तरिक जलमार्गमा सञ्चालन गर्न पनि बाटो खुल्ने छ। सचिव अर्यालका अनुसार भारतको जलमार्गमा रहेका ३ आन्तरिक टर्मिनल साहेबगञ्ज, कालुघाट र वाराणसीबाट व्यापारिक वस्तुहरु आयात निर्यात गर्न सकिने छ, भने नेपालको व्यापार लागत कम हुन्छ। भारतसँगको रेल्वे सम्झौताको म्याद पनि ५ वर्षका लागि थप भएको छ। नेपालले विराटनगर, वीरगञ्जबाट भारतको कोलकत्ता र हल्दियासम्म नेपाली रेल सञ्चालन गर्ने सम्बन्धमा सैद्धान्तिक सहमति भएको उनको भनाइ थियो।
अघिल्लो आर्थिक वर्षको तुलनामा नेपालको व्यापार घाटामा कमी आएको समेत उनले बताए। आन्तरिक उत्पादन बढाएर वितरण प्रणालीमा सुधार हुँदा, उपभोग नगर्दा पनि हुने वा जनस्वास्थ्यमा हानी पुर्याउने वस्तुको आयातमा कडाई गरिएपछि व्यापार घाटा कम भएको उनको भनाइ छ। अघिल्लो आर्थिक वर्षको तुलनामा यो वर्षको पहिलो ५ महिनामा ६ प्रतिशत भन्दा बढीले व्यापार घाटा कम भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
