काठमाडौं– विभिन्न अवरोधका कारण रोकिएको इम्बोस्ड नम्बर प्लेट जडानका लागि सबैतिरबाट सहज भएको छ। आइतबार प्रदेश ३ सभाले प्रदेशको नाम ‘वाग्मती’ राख्ने निर्णय गरेसँगै अब इम्बोस्ड नम्बर प्लेटमा पनि वाग्मती राख्ने बाटो खुलेको हो।
नम्बर प्लेटमा अंग्रेजी अंक तथा अक्षर राख्ने व्यवस्थाविरुद्ध सर्वोच्च अदालतमा मुद्दा गरेसँगै २२ महिनादेखि इम्बोस्ड नम्बर प्लेट जडान रोकिएको थियो। मंसिर २७ गते सर्वोच्च अदालतले इम्बोस्ड नम्बर प्लेटसम्बन्धी उक्त मुद्दा खारेज गरेपछि पुरानै व्यवस्थामा काम गर्न बाटो खुलेको थियो।
सर्वोच्चले विभागलाई मुद्दा खारेजीको पत्र पठाएसँगै इम्बोस्ड नम्बर प्लेट जडानको काम अघि बढाएको विभागले जनाएको छ। विभागले इम्बोस्ड नम्बर प्लेट जडानकर्ता कम्पनीलाई प्रदेशको नामसहितको नम्बर प्लेट जडान गर्न भन्ने छ। योसँगै संगै सवारीधनीले हाल प्रदेश कोडमा र पछि प्रदेशको नामाकरणपछि पुनः नम्बर प्लेट फेर्नुपर्ने झन्झट गर्नु नपर्ने भएको छ।
यसले उपभोक्ता सम्भावित दोहोरो आर्थिक भारबाट मुक्त हुने भएका छन्। २०७५ फागुन १० देखि रोकिएको उच्च प्रविधिको सवारी नम्बर प्लेट (इम्बोस्ड) जडानका लागि विभागले आवश्यक तयारी थालेको छ। विभागले सर्वोच्च अदालतबाट इम्बोस्ड नम्बर प्लेट सम्बन्धमा परेको रिट खारेज भएको पत्र प्राप्त गरेको महानिर्देशक गोगनबहादुर हमालले बताए।
प्रदेश ३ को नाम वाग्मती राखिएपछि अब विभागले जडानकर्तालाई त्यहीअनुसार काम गर्न निर्देशन दिने उनको भनाइ छ। २०७४ फागुन १० गते अन्तरिम आदेशमार्फत् सर्वोच्चले इम्बोस्ड नम्बर प्लेट जडान रोक्न भनेको थियो। त्यसअघि विभागले साविक वाग्मती अञ्चल यातायात व्यवस्था कार्यालयअन्तर्गतका साना/ठूला सवारीबाट इम्बोस्ट नम्बर प्लेट जडान सुरु गरेको थियो। अब उक्त कार्यालयका साथै सतुङगलस्थित मोटरसाइकल कार्यालयसँगै देशमा अन्य कार्यालयमा समेत इम्बोस्ड जडानको व्यवस्था मिलाउनु पर्ने हमालले बताए।
प्रदेश ७, ६, ४, ३ ले नाम टुंग्याइसकेका छन् भने प्रदेश १, २ र ५ ले राख्न बाँकी छ। प्रदेश ७ ले सुदूरपश्चिम, ६ ले कर्णाली, ४ ले गण्डकी र ३ ले आइतबार वाग्मती नामारण गरेको छ। केही समयमा बाँकी ३ वटा प्रदेशले समेत आफ्नो नाम टुंगो लगाएपछि सबै प्रदेशको नामकै आधारमा इम्बोस्ड नम्बर प्लेट जडान हुनेछ।
विभागले २०७३ बैसाखमा ५ वर्षभित्र देशभर सञ्चालनमा रहेका २५ लाख सवारीमा इम्बोस्ड नम्बर प्लेट जडान गर्नेगरि निर्माण कम्पनीसँग सम्झौता गरेको थियो। इम्बोस्ड नम्बर प्लेट जडानको जिम्मा बंगलादेश र अमेरिकी संयुक्त कम्पनी ‘डेकाटुर टाइगर’लाई दिइएको थियो। सम्झौता अनुसार नम्बर प्लेट जडानको काम २०७८ बैशाखसम्ममा सक्नुपर्छ। संरचना बनेकाले विभागले पहिलो चरणमा वाग्मती प्रदेशबाटै इम्बोस्ड नम्बर प्लेट जडान सुरु गर्नेछ। साथै कम्पनीसँगको सम्झौता अवधि निक्कै कम रहेकाले विभागले डेकाटुर टाइगरलाई सबै प्रदेशमा इम्बोस्ड नम्बर प्लेट जडान अघि बढाउन भनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
