स्पोर्टस लाइभ

पिपिएलले फेरिएको पोखरा क्रिकेट मैदान, थप काम कसले गर्ने?

त्रिदेशीय सिरिजअघिको क्लोज क्याम्प पोखरा रंगशालामै

काठमाडौं- पोखरा रंगशालामा रहेको क्रिकेट मैदान तस्बिरमा मात्रै हेर्नेले पनि सोच्छन्- ‘गजवको मैदान रहेछ त!’

खेल हेर्न पुगेका दर्शकको अनुभव पनि विशेष छ। अझ मैदानमा नै बल ब्याट चलाएका खेलाडीलाई सोध्ने हो भने जवाफ आउँछ- ‘हिमाल हेर्दै क्रिकेट खेल्न कसलाई रमाइलो नहोला?’

यसैले त पहिलो र दोस्रो दुवै पोखरा प्रिमियर लिग (पिपिएल) खेलेका राष्ट्रिय टिमका कप्तान ज्ञानेन्द्र मल्ल, पूर्वकप्तान पारस खड्का र शरद भेषावकरदेखि अन्य खेलाडीहरु पनि पोखरामा क्रिकेट खेल्दाको छुट्टै मज्जा रहने सुनाउँछन्।

‘विदेशी खेलाडीहरुसँग पनि कुराकानी हुँदा यहाँको सुन्दरताले नै मोहित भएको सुनाउँछन्। हामी नेपालकै खेलाडी पनि जहिले जहिले पोखरा रंगशालामा हुन्छौँ मैदानबाट देखिने हिमालको दृश्यले छुट्टै आनन्द अनुभव गरिरहेका हुन्छौँ’ पूर्वकप्तान पारसले सुनाए।

मैदानबाट देखिने सुन्दरता मात्रै होइन, पोखरा क्रिकेट मैदानको पिच पनि निकै राम्रो बनेको खेलाडीहरुको अनुभव छ। अब आउटफिल्डमा केही काम हुनुका साथै खेलाडी र अफिसियलका लागि ‘ड्रेसिङ रुम’ र सुविधायुक्त ‘बाथरुम’ बन्ने हो भने पोखरा रंगशाला क्रिकेट मैदान साच्चैको अन्तर्राष्ट्रिय स्तरको हुनेछ।

मैदानमा उभिँदा देखिने सुन्दरता र त्यसमा अन्तर्राष्ट्रिय स्तरको खेल नै गर्नेबारे पनि दुई वर्षअघिसम्म कसैको ध्यान गएको थिएन। फोटो पत्रकार सुदर्शन रञ्जितले पोखरा रंगशालामा नै सन् २००७ मा खिचेको एउटा तस्बिरले आइसिसीको पुरस्कार पाएपछि अन्तर्राष्ट्रिय स्तरमा त्यसको सम्भावना भने देखिएको थियो।

अझ गएको वर्ष आइसिसी विश्वकप ट्रफी टूरको कार्यक्रम अन्तर्गत नेपाल ल्याइएको क्रिकेट विश्वकपको ट्रफी पोखरा रंगशालामा हिमालको पृष्ठभूमि पारेर राखिएपछि त विश्वभरका क्रिकेट समर्थक रंगशालाको दृश्यले मोहित भए।

पोखरा रंगशालामा विश्वकप ट्रफी।

त्यससँगै पोखरा रंगशालामा क्रिकेटको सम्भावना र त्यसलाई अन्तर्राष्ट्रिय स्तरमा चिनाउन पिपिएल आयोजना गरेको क्विन्स इभेन्ट म्यानेजमेन्टको काम सह्रानीय छ।

‘पहिलो पटक मैदान हेर्न जाँदा स्थानीय स्तरमा खेलहरु भइरहेकै मैदान भए पनि झाडी निकै थियो। नाजुक अवस्थामा थियो। त्यहाँ राम्ररी खेल होला त जस्तो लागेको थियो। तर पनि त्यहाँबाट देखिने दृश्यले नै लोभ्यायो। यहाँ क्रिकेट गराउन सके नेपाली क्रिकेटमा नै एउटा फड्को हुनेछ भन्ने लाग्यो’ पहिलो पटक मैदान पुग्दाको क्षण सम्झँदै क्विन्स इभेन्टका प्रबन्ध निर्देशक छुम्बी लामाले सुनाए।

२०६४ सालमा नै क्रिकेट विकासका लागि भनेर प्रा. डा. विरेन्द्र सिंह गुरुङको संयोजकत्वमा तत्कालीन कास्की जिल्ला क्रिकेट संघले मैदानमा झण्डै १३ लाख खर्च गरेर एउटा स्वरुप बनाएको थियो। त्यसपछि पनि विभिन्न चरणमा भएका कामहरु प्रभावकारी भने हुन सकेन। त्यसअघि नै आइसिसीले प्रस्ताव गरेको सेन्ट्रल क्रिकेट एकेडेमीका लागि रंगशाला परिसरमा जग्गा छुट्याइएको पनि थियो। तर, विवादपछि काम अघि बढ्न सकेन।

गएको वर्ष पहिलो पिपिएल आयोजना गर्नुअघि स्थानीय क्युरेटरसहित भारत मुम्बईबाट बोलाइएका क्युरेटरले पिच बनाउने काम गरेका थिए। मुम्बईबाट क्युरेटर ल्याएर, स्थानीय क्युरेटरहरु सहित मिलाएर पिच बनाउने काम भएको थियो।

पिच निर्माण गरिएको समय।

‘यसमा हामीले धेरै नै लगानी गरिसकेका छौँ। १५ जना जति स्टाफ राखेर लगातार ४ महिना काम गरेका थियौँ। आजको दिनसम्म आउँदा पनि त्यसमा हामीले सुधारको कामहरु गरिरहेका छौँ,’ क्विन्स इभेन्टका प्रबन्ध निर्देशक लामा भन्छन्, ‘मैदानको लेबलिङ अलिकति मिलाउने र ड्रेसिङ रुम, म्याच अफिसियल रुमहरु बनाउनु पर्ने देखिन्छ। दर्शक बस्ने ठाउँमा प्राकृतिक प्याराफिट बनाउन सकियो भने अझ सुन्दर देखिने छ।’

आफूहरुले पिपिएल आयोजना गरेको पहिलो वर्ष झण्डै ४२ लाख र यो वर्ष ८ लाख रुपैयाँ खर्च गरेको लामाको भनाइ छ।

पहिलो पिपिएलपछि अन्तर्राष्ट्रिय स्तरमा मैदानले चर्चा अझ बढ्यो। विदेशबाट आएका खेलाडी मोहित भए। पहिलो पिपिएलको चर्चापछि नै प्रदेश सरकारबाट दुई करोड रुपैयाँ मैदानको स्तरोन्नतीको लागि छुट्याइएको थियो।

राष्ट्रिय खेलकुद परिषदले पनि तीन करोड रुपैयाँ बिनियोजन गरेको थियो। तर, कसरी काम गर्ने भन्ने नै एकीन छैन। मैदानको बाँकी काम अझै पनि अन्यौलमा नै छ। बजेट छुटाइए पनि त्यो मैदानमा कसरी काम गर्ने भन्ने कुनै योजना देखिँदैन। जब कि १३ औँ दक्षिण एसियाली खेलकुद (साग)का बेला महिला क्रिकेटको खेल पनि पोखरा रंगशालाकै क्रिकेट मैदानमा सम्पन्न भइसकेको छ।

सागमा महिला क्रिकेट।

आउँदो माघ २२ देखि २९ गते सम्म आइसिसी विश्व कप क्रिकेट लिग-टु अन्तर्गत नेपालले ओमान र अमेरिकासँग खेल्ने त्रिदेशीय सिरिजका लागि राष्ट्रिय टिमको टिमको क्लोज क्याम्प पनि पोखरा रंगशालामा नै गर्ने तयारीमा क्यान छ। यसले पनि पोखरा रंगशालाको फेरिएको स्वरुपले नेपाली क्रिकेटलाई दिएको योगदान बुझ्न सकिन्छ।

‘अहिले अब राष्ट्रिय टिमको क्याम्प नै त्यहाँ गर्ने कुराहरु आइरहेको छ। यसअघि पनि केही वर्षअघि एसिसीको एउटा प्रतियोगिताका लागि त्यही मैदानमा क्लोज क्याम्प राखिएको थियो। विस्तारै यसमा गर्नुपर्ने सुधारहरु गर्दै यसलाई अझ अन्तर्राष्ट्रिय रुपमा चिनाएर नेपालको क्रिकेट विकासमा प्रयोग गर्न सकिन्छ’ पूर्वकप्तान पारसले भने।

त्रिवि क्रिकेट मैदान र मुलपानी क्रिकेट मैदान निर्माणाधिन अवस्थामा रहेकाले पोखरामा क्लोज क्याम्प गर्न लागिएको नेपाल क्रिकेट संघ (क्यान)का अध्यक्ष चतुदबहादुर चन्द बताउँछन्। ‘त्रिदेशीय सिरिजको क्लोज क्याम्प पोखरामा नै हुन्छ। त्यसको लागि कहिलेदेखि सुरु गर्ने भन्ने निर्णय आज बेलुकासम्म गर्नेछौँ। त्रिवि क्रिकेट मैदान र मुलपानी क्रिकेट मैदान निर्माणाधिन अवस्थामा भएको हुँदा क्लोज क्याम्प पोखरा राखिएको हो’ क्यान अध्यक्ष चन्दले भने।

दोस्रो पिपिएलको समय।

देशभित्र क्रिकेट मैदानको विकास गरेर जति खेलहरु गर्न सकियो उति नै क्रिकेटको विकास हुने हुँदा मैदानको निर्माण महत्वपूर्ण सर्त भएको पारसको अनुभव छ।

‘पोखरा रंगशालाको क्रिकेट मैदानमा अब केही कुराहरुमा सुधार गर्न सकियो भने निकै अब्बल हुनेछ। पहिलो र दोस्रो सिजनको पिपिएल हुँदासम्म पोखरा रंगशालामा निकै भिन्नता देखिइसकेको छ। पहिलो पटक मैदानको पुनर्निर्माण गर्दा विशेष त पिचमा नै ध्यान दिन खोजिएको थियो। त्योअनुसार राम्रो पिच पनि बनेको छ’ पारसले सुनाए।

‘एक वर्षअघिसम्म त क्यान पनि थिएन। अहिले क्यान पनि आएको छ। प्रदेश सरकारहरुले पनि पोखरा रंगशालालाई महत्व दिएको देखिन्छ। अब सबै सरोकारवालाहरु मिलेर त्यसमा अघि बढ्ने हो भने निकै राम्रो हुनेछ’ पारसले बताए।

पूर्वकप्तान पारसले भनेजस्तो पिच र मैदानमा आएको सुधार जस्तै अन्य आवश्यक पूर्वाधारमा काम गर्न सके पोखरा रंगशाला अन्तर्राष्ट्रिय स्तरमा रहेका उत्कृष्ट रंगशालामध्ये एक हुनेमा दुविधा छैन। जसले नेपाली क्रिकेटकै विकासमा सघाउनेछ।