काठमाडौं- ‘अघि राति बुढीले मलाई सरप्राइज दिइन्। आज तपाईंहरुले,' ३२औं वसन्त पार गरेका भोला सिलवालले भने।
सहिद स्मारक ए डिभिजन लिग फुटबलमा लगातार ३ पटक जित्दै ह्याट्रिक गरेको पुलिस क्लबबारे काठमाडौंमा अन्तर्क्रिया कार्यक्रममा सिलवालको भनाइ हो यो।
कार्यक्रममा नेपाल पुलिस क्लबका प्रशिक्षक अनन्त थापा, खेलाडी सिलवाल, रविन श्रेष्ठ र सुमन सुवेदी उपस्थित भए।
सरप्राइजमा परेका भोलाले त्यही कार्यक्रममा भने, 'राति १२ बजे बुढीले केक काटेर सरप्राइज दिइन्। अहिले तपाईंहरूले। धेरै धेरै धन्यवाद सबैलाई।' कार्यक्रम सकिएपछि भोलाले यस्तो बताएका हुन्।
भोला एक बेलाका स्टार खेलाडी हुन्। अझ भनौं, कुनै बेला उनको अनुपस्थितिमा नेपाली टिम अधुरो जस्तै हुन्थ्यो। उनको अभाव खड्किन्थ्यो। तर पछिल्लो समयमा उनी एकाएक गायब छन्। राष्ट्रिय टिममा देखिँदैनन्।
सिलवाल विभागीय टिम नेपाल पुलिस क्लबका लेजेन्ड खेलाडी हुन्। उनको अनुभव युवा पुस्तालाई काम लागेको छ।
अझ भनौं पुलिस क्लबमा आबद्ध सबै खेलाडी उनीबाट केही न केही सिक्न चाहन्छन्।
सन् २००५ देखि २०१५ सम्म नेपाली राष्ट्रिय टिममा रहेका भोला यतिबेला सुखद बिदाइको पखाईमा छन्। उनलाई राष्ट्रिय टिमको जर्सी पहिरन मन नलागेको भने होइन तर अब उनको इच्छा हो, अखिल नेपाल फुटबल संघ एन्फाले विशेष कार्यक्रम गरी बिदाइ गरिदियोस्।
भोला भन्छन्, ‘राष्ट्रिय टिमका लागि मेरो यात्रा लगभग सकियो जस्तो लाग्छ। तर म खेल्न सक्दिनँ भन्ने होइन। राष्ट्रका लागि केही योगदान दिएँ। एन्फाले कुनै प्रतियोगितामा बिदाइको वातावरण मिलाए राम्रो हुने थियो।’
यो कुरामा रविन श्रेष्ठ पनि सहमत छन्। राष्ट्रका लागि खेलिसकेका खेलाडीको बिदाइ सुखद् हुनुपर्छ। यसलाई एन्फाले विचार गर्नुपर्छ जस्तो लाग्छ,' रविन भोलाको कुरामा थप्छन्।
को हुन् भोला?
भोला सिलवाल नेपाली फुटबलका राम्रा मिडफिल्डर हुन्। अहिले उनी नेपाल पुलिस क्लबबाट ए डिभिजन लिग खेलिरहेका छन्।
मोरङमा जन्मिएका भोलाले व्यावसायिक फुटबल विभागीय टिम नेपाल पुलिस क्लब नै गरे। सम्भवतः यो क्लब नै उनको खेल करिअरको अन्तिम क्लब पनि हो।
सन् २००५ मा उनी पुलिस क्लबमा आबद्ध भए। त्यही वर्ष राष्ट्रिय टिममा पनि। उनको खेल निखारिँदै गयो। राम्रो खेल्दै गए। सन् २०१२ दशरथ रंगशालामा बंगलादेशविरुद्ध गोल गर्दै नेपाललाई हारबाट पनि जोगाए।
तर २०१५ मा भने उनको लागि फलदायी भएन।
त्यही वर्षपछि उनको र राष्ट्रिय टिमको सम्बन्ध विच्छेद नै भयो। उनी अन्तिम पटक राष्ट्रिय टिमबाट भारतविरुद्ध पुनेमा खेल्न जादा घाइते भए। उनको खुट्टामा समस्या आयो। फुटबलबाटै टाढा भए। ४ महिनापछि उनी पूर्णरुपमा ठीक भए पनि राष्ट्रिय टिममा बोलाइएनन्। राष्ट्रिय टिम बाहिर भएको पनि करिब ५ वर्ष पूरा भएको छ।
नेपालको माथिल्लो श्रेणीको फुटबल सहिद स्मारक ए डिभिजन लिग जारी छ। सोमबारदेखि लिगको पाँचौ राउन्डका खेल सुरु हुँदै छन्। बुधबार पुलिसले च्यासल युथ क्लबसँग खेल्दैछ।
२ खेलमा जित १ खेलमा हार र १ खेलमा बराबरी खेलको पुलिस ७ अंक बनाएर लिगको पाँचौ स्थानमा छ। शीर्ष ६ मा लिग टुंग्याउने लक्ष्य सहित ए डिभिजन लिग खेलको पुलिस युवा खेलाडी र अनुभवी खेलाडीको संमिश्रण टिम हो।
लिगको बारेमा आफ्नो क्लबलाई लिएर भोला के भन्छन् त?
‘सबैको लक्ष्य त लिग जित्ने नै हुन्छ। हाम्रो लागि पनि असम्भव भने छैन। अझै पनि लिग जित्ने सम्भावना छ।’ भोला भन्छन्, ‘नतिजाको हिसाबले हेर्दा केही तलमाथि होला तर हामी कमजोर भइसकेका छैनौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768362308.png)
-1768291693.png)
-1764146706.png)
-1768288990.png)
