रत्ननगर– चितवनको रत्ननगरस्थित सौराहा आसपासको संरक्षित क्षेत्रमा स्वदेशी तथा विदेशी पर्यटकको सहभागितामा स्थानीय संरक्षणकर्मीले मंगलबार फोहर संकलन गरेका छन्।
चितवन राष्ट्रिय निकुञ्जको मध्यवर्ती क्षेत्रमा पर्ने संरक्षित इलाका ढुंग्रेखोला आसपासमा मंगलबार विभिन्न देशबाट आएका पर्यटकको सहभागितामा फोहर संकलन गरिएको हो।
नेपालका विभिन्न जिल्ला तथा जर्मनी, इङ्ल्याण्ड, फ्रान्स र अमेरिकाका नागरिक फोहर संकलनमा सहभागी थिए।
जर्मनीबाट आएकी आनाले प्रकृतिलाई सफा राख्न र पर्यावरण जोगाउन फोहर व्यवस्थापन जरुरी रहेको भन्दै यहाँ शुरु भएको फोहर संकलन अभियानमा आफू पनि सहभागी भएको बताइन्।
स्थानीयबासीले विगत एक सातादेखि फोहर संकलन अभियान चलाइरहेका छन्। हालसम्म चार ट्रयाक्टरभन्दा बढी फोहर संकलन गरेर व्यवस्थापन गरिसकेको अभियानमा सक्रिय होटल पार्कसाइडका सञ्चालक तथा संरक्षणकर्मी शिरलाल परियार बताउँछन्।
राप्ती नदी तथा यसका सहायक नदीका मुहान क्षेत्रबाट बगेर आएका धेरै फोहर निकुञ्जको संरक्षित्र क्षेत्रमा थुप्रिएकाले वन्यजन्तु र वासस्थानलाई समेत असर गर्ने हुँदा फोहर संकलनलाई तीव्रता दिएको परियारले जानकारी दिए।
सो अभियानमा काठमाडौँ बूढानीलकण्ठको भिक्टर ह्यूगो मञ्जुश्री विद्यालयका शिक्षक, स्वयमसेवी र विद्यार्थी गरी २ण् जनाको समेत सहभागिता थियो।
फोहर संकलनमा संलग्न विद्यार्थी पुष्पा परियारले आफ्नो क्षेत्रमा पनि विद्यार्थीहरु मिलेर फोहर संकलन अभियान चलाउने गरेको बताउँदै सौराहामा शैक्षिक भ्रमणमा आउँदासमेत फोहर टिप्ने अभियानमा सरिक हुन पाएकोमा खुशी व्यक्त गरिन्।
सो क्रममा प्लाष्टिक, सिसाका बोतल, बोरा, कपडाका टुक्राहरु बढी मात्रामा संकलन भएको बताइएको छ। यस्ता फोहरले पर्यावरण र वन्यजन्तुमा समेत असर गर्ने भएकाले फोहर संकलन अभियानलाई बृहत् बनाउनुपर्नेमा समुदायमा आधारित चोरीशिकार नियन्त्रण युवा जागरण अभियान रत्ननगरकी अध्यक्ष डोमा पौडेलले जोड दिइन्।
विश्वकै दुर्लभ एकसिङ्गे गैँडा तथा पाटेबाघको महत्वपूर्ण वासस्थान रहेको चितवन राष्ट्रिय निकुञ्ज भएर बग्ने खोलानाला किनारका अधिकांश स्थानमा मानव निर्मित फोहर अत्यधिक भएपनि संकलन अभियानलाई तीव्रता दिन भने अझै सकिएको छैन। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
