चितवन– रत्ननगर नगरपालिकालाई मंगलबार पूर्ण खोपयुक्त नगर घोषणा गरिएको छ। नगर भित्रका सबै बालबालिकालाई खोप लगाएको सुनिश्चित गरी नगरपालिकालाई पूर्ण खोपयुक्त नगर घोषणा गरिएको हो।
नगरपालिकाको सभाहलमा आयोजित कार्यक्रममा जिल्ला समन्वय समितिका सभापति कृष्णकुमार डल्लाकोटीले सो नगरलाई पूर्ण खोप घोषणा गरेका थिए। सभापति डल्लाकोटीले नगरपालिकाका मेयर नारायण वनलाई नगरपालिका पूर्ण खोपयुक्त भएको प्रमाणपत्र हस्तान्तरण गरेका थिए।
१५ महिनाभन्दा कम उमेरका १ हजार ३ सय ४० र १५ देखि २३ महिना भित्रका ७ सय २१ जना बालबालिकालाई ११ प्रकारको खोप लगाएको सुनिश्चित गरी नगरलाई पूर्ण खोपयुक्त नगरपालिका घोषणा गरिएको नगरपालिकाका स्वास्थ्य शाखा प्रमुख शिवप्रसाद घिमिरले जानकारी दिए।
कार्यक्रममा जिल्ला जनस्वास्थ्य कार्यालय भरतपुरका प्रमुख डा विजय कुमार झाले रत्ननगरले नगर भित्रका सबै बालबालिकालाई ११ प्रकारका खोप दिएर पूर्ण सुरक्षित बनाउन सफल भएको बताए।
उनले पूर्ण खोपयुक्त नगर घोषणासँगै नगरपालिकालाई खोप कार्यक्रमको दिगो र निरन्तर सञ्चालनका लागि जिम्मेवारी थपिएको भन्दै सचेत गराए।
कार्यक्रममा रत्ननगर नगरपालिकाका मेयर नारायण वनले पूर्ण खोप घोषणासंगैं कार्यान्वयनको चुनौती सामुन्य रहेको भन्दै सबैको साथ र सहयोग लिएर कार्यान्वयन पक्षलाई प्रभावकारी बनाउने बताए।
कार्यक्रममा उपमेयर विमला दुवाडीले पूर्ण खोप घोषणालाई प्रभावकारी बनाउन निरन्तर अनुगमन गरी काम गर्ने प्रतिबद्धता जनाइन्।
कार्यक्रममा रत्ननगर नगरपालिकाका प्रमुख प्रशासकीय अधिकृत नवराज ढुंगाना, रत्ननगर अस्पतालका प्रमुख डा अजय न्यौपाने, महिला स्वास्थ्य स्वयमसेविका समन्वय समिति रत्ननगरकी अध्यक्ष मीना गिरी, रत्ननगर उद्योग वाणिज्य संघका अध्यक्ष राजाराम रेग्मी लगायतले शुभकामना व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
