काठमाडौँ- काठमाडौँ महानगरपालिकाभित्र प्लास्टिकजन्य वस्तु प्रयोग गर्दै हुनुहुन्छ? भेन्डिङ उपकरणमा फोहर राख्नुस्, पैसा लिनुस्।
प्लास्टिकजन्य वस्तु प्रयोग गरेपछि निस्कने फोहर वस्तुलाई थप व्यवस्थापन र पुनः प्रयोग गर्नका लागि भेन्डिङ उपकरणको उपयोगसँगै नयाँ अवधारणाका साथ काठमाडौं महानगरपालिका अघि बढ्न लागेको हो। पछिल्लो समय प्लास्टिकजन्य फोहरबाट सहर प्रदूषित भएकाले आगामी दिनदेखि त्यसलाई नियन्त्रण गर्न निश्चित स्थानमा फोहर संकलन गर्ने भाँडो राखी सहरलाई व्यवस्थित गर्न लागिएको कामपाका निजी साझेदारी एकाइ प्रमुख महेश काफ्लेले जानकारी दिए।
'भेन्डिङ उपकरण त्यो हो जुन निश्चित स्थानमा राखिन्छ र त्यसमा नागरिकले प्लास्टिकजन्य फोहर राखेर आफ्नो परिचय खुलाएपछि सामग्रीको अनुपातका आधारमा सोही व्यक्तिको मोबाइलमा ब्यालेन्स प्लस हुन्छ,' उनले भने, 'उक्त उपकरणलाई एटिएम प्रयोग गरे जसरी प्रयोग गर्न सकिन्छ।'
उक्त उपकरणको प्रयोगबाट सहर सफा हुनाका साथै सर्वसाधारणले फोहर निश्चित स्थानमा राखेबापत केही रकम पाउनेछन्। त्यसरी जम्मा गरिएको फोहरलाई पुनः प्रयोग गरिनेछ। भेन्डिङ उपकरण पुनः प्रयोग गर्न सकिने प्लास्टिकजन्य फोहर संकलन गर्ने भाँडो हो जसमा पानी, कोक, चिजबल, चाउचाउको प्याकेटलाई राख्न सकिन्छ जुन प्लाष्टिक पुनः प्रयोग गर्न सकिन्छ।
यस किसिमको अभ्यास अन्तर्राष्ट्रियस्तरमा लामो समयदेखि प्रयोगमा आइसकेको भए पनि नेपालमा भने पहिलो हो। पहिलो चरणमा त्रिभुवन अन्तर्राष्ट्रिय विमानस्थल, न्यूरोड, दरबारमार्ग लगायत मानिसको बढी आवतजावत हुने ७ स्थानमा यस्ता उपकरण राखिने योजना कामपाको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
