जनकपुर- प्रदेश २ मा सन् २०१९ मा भएका मानवअधिकार उल्लंघनका घटनामा ७ सय ४७ जना पीडित भएको तथ्यांक सार्वजनिक भएको छ। मानव अधिकार उल्लघंनका घटनामा पीडित हुनेमा ५ सय ३६ महिला छन्।
मानवअधिकारका क्षेत्रमा क्रियाशिल संस्था अनौपचारिक क्षेत्र सेवा केन्द्र (इन्सेक) प्रदेश २ कार्यालयले मंगलबार जनकपुरमा आयोजना गरेको प्रदेश २ को मानवअधिकार तथा मानवीय अवस्था विषयक कार्यक्रममा उक्त तथ्यांक सार्वजनिक गरिएकाे हाे। जुन तथ्यांकमा गत वर्षभन्दा १ सय ४६ पीडितको संख्या बढेको देखिन्छ।
कार्यक्रममा प्रदेश २ का प्रलेख अधिकृत सर्भेशराज शर्माले तथ्यांक प्रस्तुत गर्दै प्रदेश २ मा राज्यपक्षबाट ७ महिला सहित ९४ जना पिडित भएको बताए। राज्य पक्षबाट कुटपिटका घटनामा १ महिला सहित ४ जना र अभिव्यक्ति गिरफ्तारी घटनामा ५ महिलासहित ५५ जना पीडित भएको जनाइएकाे छ।
त्यसैगरी गैरराज्य पक्षबाट ५ सय ३६ महिलासहित ६ सय ४६ जना पीडित भएका छन्। जसमध्ये ५१ महिल सहित ७५ जनाको हत्या भएको, छुवाछुतको घटनामा ४ जना पुरुष पीडित भएकाे, बालअधिकारका घटनामा १ सय ८४ जना बालिका पीडित भएकाे जनाइएकाे छ। महिला अधिकारका घटनामा २ सय ५७ जना पीडित भएको प्रतिवेदनमा उल्लेख छ।
कार्यक्रममा प्रदेश २ का अर्थ मामिला तथा योजना राज्यमन्त्री उषा यादव, इन्सेक प्रदेश २ का संयोजक राजु पासवान, राष्ट्रिय मानवअधिकार आयोग प्रदेश २ का निर्देशक वीरबहादुर बुढा मगर, एड्भोकेसी फोरमका प्रदेश २ संयोजक राजकुमार महासेठ, नेपाल वार एशोसिएशन जनकपुरका अध्यक्ष रामनेक साह, नेपाल पत्रकार महासंघ धनुषाका उपाध्यक्ष धर्वेन्द्र झालगायतकाे सहभागिता थियाे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
