भक्तपुर– स्विजरल्याण्डका भूगर्भविद डा टोनी हेगनले सन् १९५० को दशकमा नेपालमा रहँदा काठमाडौँ उपत्यकामा खिचेका तस्बीरको प्रदर्शनी सोमबार साँझदेखि शुरु भएको छ।
भक्तपुर नगरपालिका गछेँस्थित सम्पदा संरक्षणकर्मी रवीन्द्र पुरीको टोनी हेगन हाउसमा शुरु भएको प्रदर्शनीको सोमबार हेगनकी छोरी केट्रिन हेगनले उद्घाटन गरिन्।
काठमाडौँ, भक्तपुर, ललितपुर, कीर्तिपुरलगायतका पुरातात्विक सम्पदा, ऐतिहासिक संरचना, ऐतिहासिक पोखरी, विश्व सम्पदा सूचीमा रहेका दरबार स्क्वायरको करिब ६० देखि ७० वर्षअघि टोनी हेगनले लिएका तस्बीर हेगनकी छोरी केट्रिन हेगनले उपलब्ध गराएपछि सम्पदा संरक्षणकर्मी रवीन्द्र पुरीले प्रदर्शनमा ल्याएका हुन्।
हेगनले खिचेका ५० वटा तस्बीर आगामी अप्रिल १ सम्म प्रदर्शनीमा राखिने पुरीले जानकारी दिए। विगतमा रहेका सुन्दर सम्पदा नासिएको बताउँदै उनले बाँकी सम्पदाको संरक्षणमा लाग्न प्रेरणा मिलोस् भनेर तस्वीर प्रदर्शनीमा राखिएको बताए।
केट्रिन हेगनले काठमाडौँ उपत्यकाभित्र रहेका ऐतिहासिक सम्पदा अति नै सुन्दर भएको र आफ्ना बाबुले लिएका सुन्दर तस्बीरलाई प्रदर्शन गर्दा खुशी लागेको बताइन्। ६५ वर्षअघिको काठमाडौँ उपत्यकाको अवस्थालाई अहिलेको पुस्तामा जानकारी गराउन पाउँदा आफूलाई खुशी लागेको उनको भनाइ थियो।
संयुक्त राष्ट्र संघ र नेपाल सरकारअन्तर्गत रहेर नेपालमा १२ वर्षमा १४ हजार किलोमिटरको यात्रा गरेर नेपालको भूगोल र भूगर्भको अन्वेषण गर्दै नेपालसम्बन्धी अनुसन्धान, विकास योजना, वैदेशिक अनुदानसम्बद्घ कार्यमा हेगनको संलग्नता रहेको थियो। हेगनले नेपालको स्वास्थ्य क्षेत्रमा समेत योगदान दिएका थिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
