हेटौंडा- साहित्य संगम मकवानपुरको २७०औं रचना वाचनमा कविद्वय संगीत श्रोता र सुदीप पाख्रिनले शनिबार एक/एक दर्जन कविता वाचन गरेका छन्।
गायक अन्जान बाबुले संगीतले लेखेको गीत 'चरी लैजा समाचार' गाएर माहोल बनाएपछि पहिलो चरणमा सुदीपले आफ्ना कविता प्रस्तुत गरे। मकवानपुरसँगको बाल्यकालीन स्मृतिमा डुबेका उनी नोस्टाल्जिक बने र सुनाए 'मावल' शीर्षकको कविता। 'उहिलेका कुरा', 'उपहार नानीहरुलाई', 'दिनको हैरानी' पस्किएपछि उनको ठाउँमा आइपुगे संगीत।
सुदीपसँगको पहिलो भेट साहित्य संगमले जुराएको बताउँदै उनले 'हतार हतारमा यात्रा'बाट आफ्नो वाचन सुरु गरे। उनले 'महिलाहरु कहाँ छन्?', 'संवाददातासँग आक्रोशित एउटी वेश्या', 'जीवन' र 'झोला' सुनाए।
कवितामा कला पक्षलाई जोड दिने सुदीपले 'ईश्वरको अनुहार', 'कविता जस्तो केही', 'क्रुर आवाज', 'कोही कसरी रहन्छ एक्लै?' सुनाए। र, पूर्व प्रेमिकासँगको स्मरणमा अन्तिम कविता प्रस्तुत गर्दै बिदा भए।
संगीतले 'सन्नाटाको गीत', 'औंलाहरुको कोरस', 'बालुवाटार लाइभ', 'कोकाकोलाले जब भारी मतले चुनाव जित्यो' वाचन गरे। 'सुई', 'मोदनाथ प्रश्रितको ठेगाना खोज्दै हिँडेका पृथ्वीनारायण शाह' र अन्तिम कविता छन्दमा सुनाए 'मुस्कान'।
संगीतसँगको संगत र कविता लेखनबारे बोल्दै अर्का कवि विनोदविक्रम केसीले प्रतिरोधी चेतनाका संगीतले निरन्तर सत्ताको प्रतिपक्षमा रहेर सिर्जना गरिरहेको बताए। 'उनको कतिपय कविता सत्य घटनामा आधारित छन्, जसको साक्षी म पनि हुँ,' विनोदले भने, 'घटना, संवाद र सन्दर्भलाई उनले कवितामा उत्कृष्ट रुपमा प्रयोग गरेका छन्।'
दुई दशकदेखि कविता लेख्दै आएका धरानका कवि सुदीपबारे कवि राज माङ्लाकले चर्चा गरे। 'व्यक्तिगत जीवनका संवेदना र अनुभूतिसँगै जीवनबोध र मृत्युचिन्तनमा डुब्ने कवि हुन् सुदीप,' उनले भने, 'उनको व्यक्तित्वझैं कविताहरु पनि शालीन लाग्छन्।'
सुरुमा गीत गाएरै माहोल तताएका अन्जान बाबुले पुन: दुइटा गीत गाएर कार्यक्रमको बिट मारेका थिए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।