राजविराज- सप्तरीको डाक्नेश्वरी नगरपालिका कार्यालयमा दुई साताअघिदेखि लागेको ताला शनिबार खुलेको छ। आन्दोलनरत युवा तथा नगरपालिका पदाधिकारीबीच भएको २२ बुँदे सहमतिपछि तालाबन्दी खुला भएको हो।
नगरपालिकामा आर्थिक अनियमितता भएको, कर्मचारी नियमित कार्यालयमा नआई तलबभत्ता खाने गरेको तथा विकासका काम र सामान खरिदको खर्चको जानकारी नदिइएको लगायतका आरोप लगाउँदै स्थानीय युवाहरूले मंसिर २९ गते नगरपालिको कार्यालयमा तालाबन्दी गरेका थिए।
तालाबन्दीपछि पनि प्रदर्शन र अन्य विरोधका कार्यक्रम जारी राखेपछि नगरपालिका कार्यालयले उपमेयर इन्दुदेवी यादवको संयोजकत्वमा समिति गठन गरी आन्दोलनरत युवाहरुसँग वार्ता गरेको थियो। वार्तामा आन्दोलनकारीका तर्फबाट अरविन्द यादव, प्रदीप यादव, रोहित चौधरी, उमेश यादव, शम्भु साह, कृष्णानन्द यादव र सतेन्द्र मण्डल सहभागी भए।
वार्तापछि पत्रकार सम्मेलन गरेर शनिबार २२ बुँदे सहमति सार्वजनिक गरिएको हो।
सहमतिपत्रमा कार्यालयले खरिद गरेका सरसमानको खरिद विवरण उपलब्ध गराई अनियमितता भए/नभएको यकिन गर्ने, कार्यालयमा कर्मचारी समयमा आउनु पर्ने र बाहिर जानुपरे लगबुकमा उल्लेख गरेर जाने उल्लेख छ। यसैगरी, नगरपालिकाअन्तर्गतका सबै कार्यालयमा डिजिटल माध्यमबाट हाजिरीको व्यवस्था मिलाउने, समयमा कार्यालय नआउने कर्मचारीलाई ऐन अनुसार कारबाही गर्ने, कृषि तथा पशु सेवा अन्तर्गतका कार्यक्रमहरुको विवरण तथा त्यसमा वितरण गरिएका सामानहरुको विवरण उपलब्ध गराउनेलगायतका विषय उल्लेख छन्।
सहमतिमा हस्ताक्षरपछि उपमेयर यादव र आन्दोलनरत युवाहरुले संयुक्त रुपमा कार्यालयमा लागेको ताला खोलेका छन्। तालाबन्दी खुलेपछि १४ दिन बन्द रहेको कार्यालय आइतबारदेखि संचालनमा आउने भएको छ।
.jpg)
.jpg)
.jpg)
.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
