काठमाडौं– प्रतिनिधिसभाको सभामुख को हुने भन्ने टुङ्गो नहुदाँ बैठक पाँच दिन पछाडी धकेलिने भएको छ। कृष्णबहादुर महरा जवरजस्ती करणीको प्रयास गरेको आरोप लागेर पुर्पक्षका लागि थुनामा गएपछि रिक्त पदमा निर्वाचन हुने कार्यक्रम यसअघि तय भएको थियो।
पुस १६ गते बस्ने गरी प्रतिनिधिसभाको आजकाे बैठक स्थगीत भएकाे संसद सचिवालयले जनाएको छ। उक्त पदमा हालसम्म पूर्वसभामुख सुवास नेम्वाङ र अग्नी सापकोटा प्रमुख दावेदारको रुपमा देखिएका छन्।
त्यस्तै उपसभामुख शिवमाया तुम्बहाङफेको राजिनामा गर्ने गराउने विषयमा पनि सहमति हुन सकेको छैन। तुम्बाहाङफेले पनि आफूलाई सभामुखको दावेदारको रुपमा प्रस्तुत गर्दै आएकी छन्। मैदानमा तीन प्रतिस्पर्धी भएको र पद एउटामात्र भएकाले नेकपा अध्यक्षद्वय पुष्पकमल दाहाल 'प्रचण्ड र केपी शर्मा ओलीका बीचमा कसलाई बनाउने भन्ने सहमति हुन सकेको छैन।
नेम्वाङ प्रधानमन्त्री ओलीको उम्मेदवार हुन भने सापकोटा अध्यक्ष प्रचण्डका उम्मेदवार हुन्। त्यस्तै उपसभामुख तुम्बाहाङफे राष्ट्रपति विद्यादेवी भण्डारीकी उम्मेदवार हुन्।
सभामुख र उपसभामुख एउटै लिङ्ग र पार्टीको हुन नहुने संवैधानिक व्यवस्थाले पनि अहिले समस्या भईरहेको छ। नेकपाले सभामुख आफूले राखेको खण्डमा उपसभामुख अर्को दललाई दिनुपर्ने बाध्यता रहेको छ। त्यसका लागि पनि उपयुक्त उम्मेदवार तय गनुपर्ने र ब्यापक छलफल हुनुपर्ने भन्दै संसद बैठक सारिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
