काठमाडौं- केही दिन अगाडि राष्ट्रियसभामा प्रतिपक्ष र सत्तापक्षका सांसदहरुले गोकर्ण रिसोर्ट सञ्चालनका लागि यती ग्रुप अन्तर्गको यती होल्डिङसलाई २५ वर्ष समय थप गरिएको विषयमा सरकारसँग सत्यतथ्य माग गरे। मन्त्रिपरिषद्ले दुई साता अगाडि नै पुरानो सम्झौता अवधि सकिन साढे पाँच वर्ष बाँकी रहँदै यती ग्रुपलाई थप २५ वर्षको समय थप गर्ने निर्णय गरेपछि सांसदहरुले यस विषयमा प्रश्न उठाएका थिए।
राष्ट्रियसभाका सांसदहरुको मागपछि सभाका अध्यक्ष गणेश तिमल्सिनाले आज उपप्रधान तथा रक्षामन्त्री एवं नेपाल ट्रष्ट सञ्चालक समितिका अध्यक्ष ईश्वर पोखरेललाई उक्त विषयमा स्पष्ट पार्न समय दिएका थिए।
सभामा सांसदहरुको जिज्ञासाको जवाफ दिने क्रमका मन्त्री पोखरेलले नेपाल नेपाल ट्रष्टको विषयमा कुन समयमा केके काम भएको थियो भन्ने समेत जानकारी दिएका थिए। पोखरेलले गोकर्ण फरेष्ट रिसोर्टको समय थपको विषयमा जानकारी दिने क्रममा २०५२ साउन ३१ गते तत्कालीन दरबारले गरेको सम्झौताको प्रसंग पनि उठाएका थिए।
उनले उत्तर दिँदै गर्दा तत्कालीन राजपरिवारले २०५२ साउने ३१ अर्थात् १९९५ अगष्ट १६ मा ३० वर्षको लागि गोकर्ण फरेष्टको झन्डै ४ हजार रोपनी जग्गामध्ये २ हजार ७ सय ९२ रोपनी जग्गामा रिसोर्ट सञ्चालनका लागि एलएम सुवीर ब्रदर्श (नेपाल) प्राली काठमाडौंसँग सम्झौता भएको उल्लेख गरे। साथै मन्त्री पोखरेलले ३० वर्षमा जम्मा ५० लाख डलर मात्रै भाडा रकम आउने गरी सम्झौता भएको बताए। नयाँ सम्झौता यती होल्डिङ्ससँग भएको मन्त्री पोखरेलको भनाइ छ।
सो सम्झौता पनि २०६६ सालमा पुनरावलोकन भइसकेको र सोही समयमा भएको दुई पक्षीय सहमति अनुसार समय थप भएको उनको भनाइ छ। सरकारले नेपाल ट्रष्टको सिफारिसमा बाँकी रहेको साढे पाँच वर्षको समयमा थप ३७ लाख डलर गरी समय थप गरेको जानकारी दिए।
साथै थप भएको २५ वर्षको समयमा भने १ अर्ब १५ करोड १० लाख २ हजार १ सय ७० रुपैयाँ जग्गा लिज भाडा पाउने गरी समय थप भएको उनले जानकारी दिए। तर, त्यो भाडा कुन वर्षमा कति आउने भने खुलाएका छैनन्।
उनले २९ करोड लगानीमा ४७ कोठाको सुविधासम्पन्न भवन र ४ सय जना अटाउने सभा हल बनाउन दिने निर्णय भएको बताएका छन्। यसका लागि पनि अध्ययन कमिटी गठन भएको र यसमा चार्टर्ड एकाउन्टेनहरुको छाता संगठनसँग पनि छलफल गरेर काम गरेको बताए।
यसरी पोखरेलले संसदमा जवाफ दिँदै उल्लेख गरेको जग्गाको सम्झौता कपी र नेपाल ट्रष्टको कार्यालयले सार्वजनिक गरेको विवरणमा फरक परेको छ।
यसबाट नेपाल ट्रष्टले गोकर्ण फरेष्ट रिसोर्ट सञ्चालनका लागि दिएको जग्गा कति हो भन्ने विषयमा प्रश्न उठेको छ। नेपाल ट्रष्टले सार्वजनिक गरेको विवरणमा गोकर्ण रिसोर्ट सञ्चालनका लागि यती होल्डिङसलाई दिएको जग्गा गोकर्ण फरेष्टको कुल ३ हजार ९ सय ७१ रोपनी ३ पैसा ३ दाममध्ये २ हजार ९ सय ७१ रोपनी ६ आना ३ पैसा १ दाम भनेर उल्लेख गरिएको छ।
तर, पोखरेलले राष्ट्रियसभामा जम्मा २ हजार ७ सय ९२ रोपनी मात्रै जग्गा दिएको बताएका छन्। यसबाट १ सय ७९ रोपनी जग्गा कता हरायो भन्ने प्रश्न उठेको छ। नेपाल ट्रष्टको कार्यालयले प्रकाशन गरेको सम्पत्ति विवरण अभिलेख २०७४ पुस्तकको १२ पेजमा पनि २ हजार ९ सय ७१ रोपनी नै उल्लेख गरेको छ।
थप सययमा सरकारले कति पाउँछ भाडा?
उपप्रधानमन्त्री पोखरेलले राष्ट्रियसभामा बोलेको आधारमा भन्ने हो भने अब मासिक रुपमा सरदर एक रोपनी जग्गाको भाडा १ हजार ३ सय ७४ रुपैयाँ सरकारले पाउँछ। तर, नेपाल ट्रष्टको अभिलेखमा भएको जग्गाको विवरण अनुसार मासिक १ हजार २ सय ९१ रुपैयाँ मात्रै पाउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
