भैरहवा- एसइई परीक्षा भोलिदेखि सुरु हुने भएको छ। राष्ट्रिय परीक्षा बोर्डले लिने माध्यमिक शिक्षा परीक्षा (एसइई) मा यस वर्ष रुपन्देहीबाट १७ हजार ४ सय ५५ जना विद्यार्थी परीक्षामा सहभागी हुँदैछन्।
परीक्षाका लागि जिल्लाका संस्थागततर्फ १ सय ५८ विद्यालय र सामुदायिक तर्फका १ सय ४४ विद्यालय गरी ३ सय २ विद्यालयका विद्यार्थीहरुको सहभागिता रहने जिल्ला शिक्षा कार्यालय रुपन्देहीले जनाएको छ। नियममिततर्फ १६ हजार ८ सय ९६ र एक्जाम्टेडतर्फ ५ सय ५९ जना परीक्षामा सामेल हुने कार्यालयका प्रमुख रामचन्द्र खनियाले बताए। उनले परीक्षाको सम्पूर्ण तयारी सकिएको बताए। उनका अनुसार परीक्षा केन्द्र र केन्द्राध्यक्ष तोकेर परीक्षाका लागि आवश्यक सबै सामग्री, उत्तरपुस्तिका लगायत परीक्षा सञ्चालनका लागि आवश्यक सम्पूर्ण सामग्री केन्द्रमा पुर्याइसकिएको छ। केन्द्राध्यक्ष र स्रोत व्यक्तिहरुलाई आचारसंहिताको बारेमा जानकारी गराउने काम पनि सकिएको कार्यालयको भनाइ छ।
परीक्षालाई प्रभावकारी बनाउन अनुगमन टोली पनि तयार गरिएको छ। शिक्षा समितिका पदाधिकारी, परीक्षा समन्वय समितिका पदाधिकारी, शिक्षासँग सम्बन्धित विभिन्न पेसागत संगठन, जिल्ला शिक्षा कार्यालयका कर्मचारी, विद्यालय निरीक्षक, स्रोत व्यक्ति लगायतको अगुगमन टोली बनाइएको कार्यालयले जनाएको छ। परीक्षालाई शान्तिपूर्ण र मर्यादित बनाउन विद्यार्थी, अभिभावक, शिक्षक र राजनीतिक दलका प्रतिनिधि एवम् सबै सरोकारवालालाई आग्रह गरेको छ।
प्राविधिकमा दोब्बर
यस वर्ष रुपन्देहीबाट प्राविधिक विषयका ७ वटा विद्यालयका परीक्षार्थी पनि सहभागी हुँदैछन्।
गत वर्ष १२७ जना मात्र रहेको प्रविधिक तर्फका परीक्षार्थी यस वर्ष दोब्बर बढेर २५३ जना भएका छन्। सिभिल इन्जिनियरिङ, कम्प्युटर इन्जिनियरिङ र कृषि विज्ञान विषयमा अध्ययन गर्ने प्राविधिक संख्यामा आकर्षण बढ्दै गएको कार्यालयले बताए। प्राविधिक विद्यार्थीहरुका लागि रुपन्देहीको तिलोत्तमास्थित मधवलिया माविमा केन्द्र तोकिएकोे छ।
५५ वटा परीक्षा केन्द्र
एसइई परीक्षाका लागि जिल्लाका विभिन्न स्थानमा ५५ परीक्षा केन्द्र तोकिएको छ। जसमा संस्थागत र सामुदायिकका गरी ३०२ विद्यालयका विद्यार्थी सहभागी हुनेछन्। जसका लागि केन्द्राध्यक्ष, सहायक केन्द्राध्यक्ष, निरीक्षक, सहयोगी र सुरक्षाकर्मी सहित १ हजार ६ सय जनशक्ति परिचालित हुने जिल्ला शिक्षा कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
