ललितपुर– ललितपुर उद्योग वाणिज्य संघको ५१औं स्थापना दिवस तथा स्वर्ण जयन्ती मनाएको छ।
संघले ललितपुरको पाटन दरबार क्षेत्र परिसरमा स्वर्ण जयन्तीका अवसरमा वर्षभरि गरिएका कार्यक्रमहरुको जानकारी गराउँदै ५१औं स्थापना दिवस समापन समारोह मनाइएको हो।
स्वर्ण जयन्तीकै अवसरमा संघले गत असोजमा ललितपुरको जावलाखेलमा स्वर्ण जयन्ती स्मारक अनावरण गरिएको थियो। यस्तै, फागुण ३० मा आयोजना गरिएको चारदिने ललित अन्तर्राष्ट्रिय व्यापार मेलाको अवधिमा स्वर्ण जयन्ती लोगो अंकित १ हजार रुपैयाँको चाँदीको सिक्का, मंगलबजारको ढुंङ्गेधारा अंकित १ सय रुपैयाँको सिक्का निष्काशन गरेको थियो। त्यसैगरी, संघको सामाजिक दायित्व अन्तर्गत ८९ वर्ष नाघेका ललितपुर जिल्लाभरिका १ सय ६० जना ज्येष्ठ नागरिकलाई सम्मान गरिएको थियो।
स्वर्ण जयन्तीको समापन समारोहमा अर्थमन्त्री डा युवराज खतिवडाले मुलुकको आर्थिक समृद्धि र विकास नै वर्तमान सरकारको मुख्य लक्ष्य रहेको बताउँदै त्यसतर्फ अघि बढ्न निजी क्षेत्रले आ–आफ्ना क्षेत्रमा सहयोग गर्नुपर्ने बताएका थिए।
उनले ललितपुरले हस्तकला, संस्कृतिसँग जोडिएको पर्यटन, कृषिजन्य सामग्रीको उत्पादन बढाएर जिल्लाको आर्थिक विकास गर्न सकिने बताए।
त्यसैगरी, समापन समारोहकै अवसरमा विभिन्न देशका राजदूत र कूटनीतिक नियोगका प्रमुख, पदाधिकारीलाई ललितपुरको भित्री शहर, सम्पदा, जातीय संग्रहालयको अवलोकन ‘सम्पदा अवलोकन भ्रमण’ गराइएको थियो।
‘संघले सामूहिक प्रयासमा स्वर्ण जयन्तीलाई गौरवबोध र आर्थिक समृद्धिका लागि प्रस्थान बिन्दुका रुपमा मनाएको छ। यसले आम उद्यमी व्यवसायीलाई उत्साहित बनाएको छ,’ संघका अध्यक्ष एवं स्वर्ण जयन्ती मूल समारोह समितिका संयोजक कृष्णलाल महर्जनले भने।
‘ललित व्यापार मेला र मेला अवधिभर भएका कार्यक्रमले यहाँको आर्थिक विकासका सम्भावनालाई उजागर गरेको छ। अबको पालो भनेको त्यस सम्भावनालाई साकार बनाउनु हो। यस कार्यमा संघले अग्रसरता लिनेछ,’ अध्यक्ष महर्जनले भने।
भारत, बंगलादेश, पाकिस्तान लगायतका देशको सहभागिता रहेको मेलाको करिब २ लाखले अवलोकन गरेको अध्यक्ष महर्जनले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778588614.png)
-1778551198-1778552039.jpeg)
-1764146706.png)
