लुम्बिनी- नेपाल भ्रमण वर्ष २०२० र अंग्रेजी नयाँ वर्षको पूर्व सन्ध्यामा बुद्ध जन्मस्थल लुम्बिनीमा छैटौं लुम्बिनी सडक खाना महोत्सव २०७६ हुने भएको छ।
‘लुम्बिनी जाऔँ, लुम्बिनीमै खाऔँ, लुम्बिनीमै रमाऔँ’ भन्ने मूल नाराका साथ लुम्बिनीका स्थानीय खानालाई ब्राण्डीङ गर्न, आन्तरिक तथा बाह्य पर्यटकलाई लुम्बिनीमा आकर्षित गर्न र भिजीट नेपाल २०२०लाई स्वागत गर्न महोत्सव आयोजना गरिएको हो।
लुम्बिनी होटल संघको आयोजना तथा लुम्बिनी विकास कोष, लुम्बिनी सास्ंकृतिक नगरपालिका, भिजीट नेपाल २०२० र लुम्बिनी भ्रमण वर्ष २०७६को सहआयोजनामा लुम्बिनीको महिलवारमा अगामी पुस १५ गते (३१ डिसेम्बर) खाना महोत्सव हुन लागेको बिहीबार आयोजित पत्रकार सम्मेलनमा लुम्बिनी होटल संघका अध्यक्ष मिथुनमान श्रेष्ठले जानकारी दिए।
स्थानीय उत्पादन प्रवद्र्धन, लोप हुन लागेको संस्कृति तथा परिकारलाई प्रोत्साहन गर्न सन् २०१२ देखि नै खाना महोत्सव आयोजना भए पनि यसपटक गत वर्षभन्दा दोब्बर खानाका स्टल राखी प्रदेश ५ सरकारको सहयोगमा स्थानीय परिकारका केही खानालाई ब्राण्डिङ गर्ने संघका उपाध्यक्ष गोविन्द ज्ञवालीले बताए।
पाल्पा, अर्घाखाँची, नवलपरासी, कपिलवस्तु लगायतका छिमेकी जिल्लाका आन्तरिक एवं भारतसहित विभिन्न देशका पर्यटकलाई लक्षित गर्दै आयोजना हुँदै आएको महोत्सवमा यस वर्ष लुम्बिनी क्षेत्रमा अवस्थित सम्पूर्ण होटलमा २५ प्रतिशत छुटको व्यवस्था गर्ने आयोजकले जनाएका छन्। खाना महोत्सव भएकाले यस वर्ष सबै स्तरका होटलको परिकार स्टलबाट सस्तो मूल्यमै पाउने छन्।
खाना माहोत्सवको सन्दर्भ पारेर होटल संघले ३ रात ४ दिनको टुर प्याकेजको घोषणा गर्नेछ। विद्यार्थीका लागि हाल १२ सयमा २ दिन एक रातको प्याकेज, र अन्य पर्यटकका लागि होटलको स्तर र खाना अनुसार ५ हजार ५ सयदेखि ८ हजार ५ सयसम्मको प्याकेज रहने होटल संघका महासचिव लिलामणी शर्माले बताए। प्याकेजमा खाना, बास र यातायातसहित लुम्बिनीका ११ वटा स्थानीय गाउँ जोडेर बनेको परिपथ, चराको अवलोकन, तिलौराकोट र लुम्बिनीका पुरातात्विक अवलोकन, लुम्बिनी विकास कोषभित्रका बौद्ध विहारहरुको अवलोकन गाइडमार्फत् गराइने छ।
महोत्सवभित्र फरकफरक ठाउँ र दुरीमा थारु साँस्कृतिक नाच, पञ्चेबाजा, नौमतीबाजा, लाखे नाच, बिरहा, पंजाबी भाँगडा लगायतका स्थानीय साँस्कृतिक कार्यक्रम गरिने स्थानीय परिकारका संयोजक हेम विष्टले बताए। महोत्सवमा विभिन्न जातजातीका दर्जन बढी मौलिक खाना, पकाउने रेसिपीहरुको प्रदर्शन गरी यस वर्ष प्रदेशको ब्राण्डिङ खानाको रुपमा घोषणा गर्ने उनले बताए।
गत वर्ष ब्राण्डिङ गर्न खोजेको भए पनि सोचे अनुसारको मौलिक खानाका परिकारको सहभागिता नभएकाले यस वर्ष प्राथमिकताका साथ यस कामलाई अगाडि बढाएको उनले बताए। मुस्लिम, थारु, यादव लगायतका स्थानीय जातजातीको परिकारका साथै चिनियाँ, जापानी, बर्मेली, कम्बोडियन, थाईका विभिन्न परिकार लोपन्मुख विभिन्न जातजातीको खानाका परिकारलाई प्रवद्र्धन गरिने स्थानीय परिकार संयोजक विष्टले बताए।
पछिल्ला वर्षमा नेपालीको खानपान शैली केही परिस्कृत हुँदै गएकाले लोप हुन लागेका स्थानीय लिट्टी चोखा, सेलरोटी, माटोको भाडामा पकाइएको मासु, रिक्बच, थारु, मुस्लिम, मगर तथा स्थानीय जातजातीको विभिन्न परिकारको पनि सक्दो सहभागिता गराउने बिष्टले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
