काठमाडौं- नेपाल स्टक एक्सचेन्ज लिमिटेड (नेप्से) ले पुँजीबजारको बिस्तार र कारोबार प्रणाली थप सहज बनाउन भन्दै लागू गरेको पूर्ण स्वचालित अनलाईन कारोबार प्रणाली (नट्स) को प्रभावकारिता न्युन देखिएको छ।
नेप्सेले गतवर्ष कात्तिक २० गतेबाट नट्स प्रणालीको औपचारिक सुरुवात गरेको थियो। यो प्रणाली सञ्चालनमा ल्याएको एक वर्षभन्दा बढी समय भइसक्दा पनि यसमा आबद्ध हुने लगानीकर्ताको संख्या भने निकै कम देखिएको हो। नेप्सेले आइतबार सार्वजनिक गरेको तथ्यांकअनुसार करिब सवा १ प्रतिशत लगानीकर्ताले मात्रै अनलाइन कारोबार प्रणाली प्रयोग गरिरहेको देखिएको हो।
नेप्सेको तथ्यांकअनुसार ५० वटा धितोपत्र दलाल (ब्रोकर) कम्पनीमार्फत १३ लाख ५७ हजार ७ सय ५७ जना लगानीकर्ताले पुँजीबजारमा कारोबार गरिरहेका छन्। जसमध्ये अनलाईन प्रणालीबाट कारोबार गर्ने लगानीकर्ताको संख्या १ दशमलव २१ प्रतिशत अर्थात १६ हजार ५ सय ७३ जना मात्रै छ। बाँकी ९८ दशमलब ७८ प्रतिशत अर्थात् १३ लाख ४२ हजार १ सय ५४ जना लगानीकर्ताले अहिले पनि अफलाइनबाटै कारोबार गरिरहेका छन्।
नट्स प्रणाली कार्यान्वयनमा ल्याएको एक वर्ष पुगेको अवसरका नेप्सेले गत कात्तिकमा सार्वजनिक गरेको तथ्यांकमा नट्स प्रणालीबाट कारोबार गर्ने लगानीकर्ताको संख्या १६ हजार २ सय ३४ जना रहेको उल्लेख थियो। पछिल्लो १ महिना अर्थात मंसिरमा ३ सय ३९ जना मात्रै यो प्रणालीमा आवद्ध भएको नेप्सेले आइतबार सार्वजनिक गरेको तथ्यांकले देखाउँछ।
इन्टरनेटको माध्यमबाट संसारका जुनसुकै ठाउँबाट प्रणालीमा प्रवेश गरी धितोपत्रहरुको खरिद बिक्री आदेशबाट प्रविष्ट गरी वास्तविक समयमा कारोबार गर्न सकिने प्रणालीका रुपमा नट्स कार्यान्वयनमा ल्याइएको भए पनि यसको प्रभावकारिता भने अपेक्षाकृत देखिँदैन। नट्स सञ्चालनको सुरुवाती दिनमा डाटा डिस्प्ले, लगानीकर्ताको युनिक क्लाइन्ट कोड (युसिसि) जेनेरेसन, केवाइसी अद्यावधिक, डिएनए लगइन, नयाँ सूचीकरण भएका कम्पनीको पहिलो दिनको कारोबारमा समस्याजस्ता कारण देखिए पनि अहिले त्यस्ता समस्या नरहेको नेप्सेले दाबी गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
