काठमाडौं- खाद्य प्रविधि तथा गुण नियन्त्रण विभागका अनुसार नेपाली बजारमा पिउने पानी दूषित तथा दालमोठ, भूजिया, तयारी चाउचाउ, मिठाइ, खुर्सानीको धुलोलगायत खाद्य पदार्थ गुणस्तरहिन भेटिएको छ।
आर्थिक वर्ष २०७६/०७७ को प्रथम चौमासिक अवधिमा विभाग तथा मातहतका कार्यालयहरुले बजार निरीक्षण तथा अनुगमन गर्दा पिउने पानी तथा खाद्य पदार्थहरुमा न्यून गुणस्तर भेटिएको हो।
चौमासिक अवधिमा विभाग तथा मातहतका कार्यालयहरुबाट बजार निरीक्षणका क्रममा पिउने पानी तथा खाद्य पदार्थका ९ सय २५ वटा नमुना संकलन गरिएको थियो।
सो संकलित नमुनाबाट ४ सय ६४ वटा नमुनाको विश्लेषण परीक्षण प्रतिवेदन निकालिएको थियो।
प्रतिवेदनअनुसार ६१ वटा नमुनाहरु मापदण्डअनुसार नपाइएको खाद्य प्रविधि तथा गुण नियन्त्रण विभागका प्रवक्ता मोहन कृष्ण महर्जनले जानकारी दिए।
उनका अनुसार मापदण्डअनुसार नपाइएका नमुनाहरुमध्ये २९ वटा दूषित, २४ वटा न्यून गुणस्तर तथा ८ वटा खाद्य ऐन नियमको प्रावधान विपरीत थिए।
‘खाद्य ऐन तथा नियमअनुसार न्यूनस्तर तथा दूषित उत्पादन तथा बिक्री वितरण गरेको कसुरमा ८ थान मुद्दा विभिन्न जिल्ला प्रशासन कार्यालयमा दायर गरिएको छ, दायर गरिएका ८ थान मुद्दामध्ये सबैभन्दा बढी प्रशोधित पिउने पाीनका तथा दालमोठ, भूजिया, तयारी चाउचाउ, मिठाई, खुर्सानीको धुलोजस्ता विभिन्न खाद्य पदार्थका छन्’ प्रवक्ता महर्जनले भने।
खाद्य पदार्थको गुणस्तर, खाने तेलको गुणस्तर, होटल रेस्टुराँमा पाइने चामलको गुणस्तर लगायतका विभिन्न विषयमा १५ वटाभन्दा बढी उजुरी परेको विभागले जनाएको छ। उजुरी उपर विभागको सम्बोधन टोलीले तत्काल कारबाही प्रकृया अगाडि बढाइएको विभागकी महानिर्देशक मतिना वैद्य जोशीले जानकारी दिइन्।
उनका अनुसार विभाग तथा मातहतका कार्यालयहरुबाट भएको निरीक्षण अनुगमनमा खाद्य ऐन २०२३, खाद्य नियमावली २०२७ तथा निर्देशिका बमोजिम उत्पादन गरेको नपाइएका २२ वटा उद्योग एवं खाद्य व्यवसायीहरुलाई उत्पादन रोक्का तथा सिलबन्दीका साथै नमूनाहरु संकलन गरी विभागले कारबाही प्रकृया अगाडि बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
