क्वालालम्पुर- नेपाली श्रमिकहरुको प्रमूख गन्तव्य मुलुकका रुपमा रहँदै आएको मलेसियाले स्वच्छ भर्ना प्रक्रियामार्फत् नेपाली श्रमिकहरु लैजान चाहेको जनाएको छ।
मलेसियाली मानव संसाधन मन्त्रालयले सुरक्षा गार्डलगायत काममा स्वच्छ भर्ना प्रक्रियामार्फत् नेपाली श्रमिकहरु भित्र्याउन चाहेको मलेसियाली सञ्चार माध्यम द स्टार अनलाइनले उल्लेख गरेको छ। मानव संसाधन मन्त्रालयका एक प्रवक्तालाई उदृत गर्दै द स्टार लेखेको छ, 'नेपालसँग शून्य लागतको श्रम समझदारी पत्र (एमओयु)मा हस्ताक्षर गरेपछि पनि एक नेपाली श्रमिक भर्ना प्रक्रियाका लागि ६ हजार ३ सयदेखि ७ हजार ९ सय मलेसियन रिंगेटसम्म लाग्दै आएको थियो।'
ति प्रवक्ताका अनुसार आप्रवासी कामदार भर्ना प्रक्रियाका लागि ६ सय ४० रिंगेटदेखि १ हजार ८ सय ५० रिंगेटसम्म लाग्छ। सुरक्षा जाँचका लागि १ सय ५० रिंगेट, मेडिकल जाँचका लागि २ सय ६० रिंगेट तथा मलेसियास्थित नेपाली दूतावासलाई १ हजार रिंगेट तिनुपर्छ। त्यस्तै आप्रवासी श्रमिकहरुका हकमा ७२ रिंगेट क्षतिपूर्ति तिर्नुपर्छ।
'विदेशी कामदारसम्बन्धी क्षतिपूर्ति योजना सोक्सको दायरामा छ। सामाजिक सुरक्षा अन्तर्गत क्षतिपूर्ति सुविधा लिन श्रमिकहरु सोक्समा दर्ता हुनुपर्दछ' ति प्रवक्ताले भनेका छन्। अक्टोबरमा मलेसिया र नेपालबीच शून्य लागतको सम्झौता भइसकेकाले रोजगारदाताहरुले कामदार भर्ना प्रक्रियाको लागत सोही सम्झौता अनुरूप बेहोर्नुपर्ने उनको भनाइ थियो।
नेपाली श्रमिक स्वच्छ भर्ना प्रक्रियाका लागि मलेसियाली सरकार सकारात्मक देखिए पनि रोजगारदाताहरुले असन्तुष्टि व्यक्त गरेका छन्। रोजगार एजेन्सी सघं मलेसियाका अध्यक्ष डाटुक योङ हूईले सरकारले अन्य धेरै स्रोत मुलुकहरुमार्फत कामदार लैजाने सहज वातावरण बनाउन आवश्यक रहेको बताएका छन्।
'हामी स्वीकार गर्छौं स्वच्छ भर्ना प्रक्रियाले अन्तराष्ट्रिय श्रम संगठन (आइएलओ) को मापदण्डअनुसार श्रमिकहरुको हक अधिकार सुनिश्चित गरेको छ। तर तत्काल यो प्रावधान लागू गर्न मलेसिया पूर्ण विकसित मुलुक होइन ' उनले भनेका छन्, 'यो समय हाम्रो लागि निकै ठूलो आर्थिक संकटको समय हो।'
मलेसियाली मानव संशाधन मन्त्री एम. कुलासेगरनले नेपाल र मलेसियाबीच भएको श्रम समझादारीअनुसार नै नेपाली श्रमिक भर्ना प्रक्रिया अगाडि बढाउन जोड दिएका छन्। स्वास्थ्य जाँच, हवाई टिकट, भिसा शुल्क, सुरक्षा जाँचलगायत सम्पूर्ण शुल्क समझदारी अनुरुप हुनुपर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
