काठमाडौं- पर्वत घर भई काठमाडौंको एक कलेजमा स्नातक पढ्ने पवि क्षेत्रीलाई ३ महिनाअघि फेसबुकमा एउटा ‘फ्रेन्ड रिक्वेष्ट’ आयो ।
ब्रायन नामक बेलायतीको ‘फ्रेन्ड रिक्वेष्ट’ थियो त्यो । उनले त्यो रिक्वेष्टलाई एसेप्ट गरिन् । तीनै ब्रायनलाई फेसबुकमा साथी बनाउँदा उनले महंगो मूल्य चुकाउनुपरेको छ । उनको यतिबेला बिचल्ली भएको छ । तीनै ब्रायनले नाटकीय रुपमा उनको ५१ लाख रुपैयाँ ठगी गरेका छन् ।
फेसबुकमा साथी भएपछि उनीहरुबीच च्याट हुन थाल्यो । ब्रायनले बारम्बार फोन पनि गर्न थाले । आफू बेलायतको धनी व्यक्ति भएको र उदार स्वभावको प्रभाव पवीलाई पारे । आफूहरु सहयोगी भावनाको भएको भन्दै सहयोगको प्रस्ताव पनि गरे ।
एक दिन उनलाई आफूले उपहार किनेर ल्याएको भन्दै फोटो खिचेर पठाए । उनी दंग भइन् । त्यसको केही दिनपछि उनलाई भारतबाट फोन आयो । तपाईंको ४० हजार पाउण्ड र महंगा गहनाहरु आएका छन्, त्यो लिनका लागि करवापत केही रकम पठाइदिनु होला ।
उनी विद्यार्थी थिइन् । धेरै पैसा थिएन । साथी लक्ष्मी चापागाईंलाई पनि त्यसबारे थाहा थियो । दुवै जनाले आफन्तहरुसँग पैसा मागेर पटक–पटक गरी ५१ लाख रुपैयाँ पठाए । तर, सामान आएन । ब्रायन पनि फेसबुकमा बोल्न छाडे । त्यसपछि उनीहरु छाँगाबाट खसेजस्तो भए । त्यसपछि उनीहरु उजुरी लिएर काठमाडौं प्रहरीमा पुगे । काठमाडौं प्रहरीले घटनामा संलग्न तीन जनालाई पक्राउ गरी अनुसन्धान अघि बढाएको छ । तर, ठगीका मुख्य नाइके ब्रायन भने पक्राउ पर्ने सम्भावना छैन ।
प्रहरीका अनुसार उक्त सामानको कर लाग्ने भन्दै एक व्यक्तिले दिल्लीबाट उनीहरुलाई फोन गरेका थिए । लाखौंको सामान आउने भएपछि उनीहरु पनि लोभिएर ५१ लाख रुपैयाँ करवापत तिरे । तर, सामान आएन, उल्टो थप करको रकम मात्र माग भइरह्यो ।
उनीहरुलाई हुन्डीमार्फत् करको रकम पठाउन लगाइएको थियो । त्यसरी हुन्डीमार्फत् पैसा पठाउन उनीहरुले कुरियरमा काम गर्ने जयराम कार्कीलाई पैसा दिएका थिए । कार्कीले खिचापोखरीस्थित जय दुर्गा ट्रेड इन्टरनेशनल नामक कम्पनीका प्रबन्धक नारायण अग्रवाललाई पैसा दिएका थिए । नारायणले पंकज अग्रवाललाई दिल्लीमा पैसा पठाएका थिए । नारायण हाल फरार छन् । त्यस्तै उनीसँगै हुन्डीको काम गर्ने राकेश गुप्ता पनि फरार रहेको काठमाडौं परिसरका एसएसपी विश्वराज पोखरेलले बताए ।
प्रहरीले नारायण अग्रवालको नाममा रहेको कस्मेटिक पसलबाट १५ लाख ९२ हजार ६२ रुपैयाँ बरामद भएको छ । उनको मोबाइलमा हुन्डीसम्बन्धी म्यासेजहरु भेटिएकाले परिसरका डिएसपी मोहन थापाले बताए । सो समूहले हरेक महिना करोडौंको हुन्डी गर्दै आएको अनुसन्धानमा खुलेको छ । सो समूहसँग ठगी गर्ने समूहको अनुसन्धान अघि बढाइएको डिएसपी थापाले बताए । यस्तै किमिसका ठगी घटना बारम्बार प्रहरीमा पुग्ने गरेका छन् ।
नाइजेरियन गिरोह नेपालमा सक्रिय
सिआईबीले शनिबारमात्र फेसबुकबाट ठगी गर्ने एक जना नाइजेरियनलाई ठमेलबाट पक्राउ गरेको थियो । उनको नाम मार्सेलुस सिगोन्जी चिमुईजे हो । ठमेलको एक होटलमा बसेका उनले सोही होटलका कर्मचारीको बैंक खाता प्रयोग गरी ठगी गर्न खोजेका थिए ।
उनले कम्तिमा ३ जना नेपाली महिलाबाट पैसा लिइसकेका थिए । ती महिलासँग आफुलाई बेलायती व्यापारी बताउने व्यक्तिले उपहार पठाइदिएको भन्दै फेसबुकमा उपहारको फोटो पठाइदिएका थिए । त्यसको केही दिनपछि भारतको विमानस्थलबाट एक जना व्यक्तिले फोन गरे । ‘तपाईंको सामान आइपुगेको छ, त्यसवापत कर रकम पठाइदिनु होला । महंगो उपहार आउने भएपछि ती महिलाहरुले पैसा पठाउन सुरु गरे ।
यसरी एक नेपालीकै खातामा पैसा पठाउन लगाइएको थियो । त्यो खाता ठमेलको एक होटलको कर्मचारीको थियो । खातामा पैसा आए पनि नाइजेरियनले निकाल्न पाएनन् । सिआईबीले सूचना पाएपछि उनलाई पक्राउ गरेको हो । सिआईबीले विगतमा पनि यस्तो ठगीमा संलग्न विभिन्न समूहलाई पक्राउ गरिसकेको छ ।
पाकिस्तानबाट नेपालमा ठगी
एक पाकिस्तानी गिरोहले भाइबरबाट नेपालमा ठगी गर्दै आएको छ । चिठ्ठा परेको भन्दै सो समूहले एकै व्यक्तिसँग २५ लाख रुपैयाँसम्म ठगी गरेका थिए । यस्ता ठगीमा संलग्न केही व्यक्ति धरानमा पक्राउ परेका छन् । विराटनगरका २३ वर्षीय असिम महत, उनी आमा ४० वर्षीय अनिता महत नवलपरासी घर भई काठमाडौँ बस्ने ३० वर्षीय यसकुमार थापामगर, लमजुङ घर भई काठमाडौँ बस्ने ३७ वर्षीय प्रितम गुरुङ र बाग्लुङ घर भई काठमाडौं बस्ने टीकाराम जैसीलाई पक्राउ गरी अनुसन्धान अघि बढाइएको डिएसपी रामेश्वर पौडेलेले बताए ।
पक्राउ परेका असिम महत दिल्लीमा बसेर अध्ययन गरी झण्डै डेढ वर्षअघि नेपाल फर्किएका विद्यार्थी हुन् । यसकुमार भने भारतको केरालामा चौकीदार थिए । उनीहरुलाई गिरोहले प्रलोभनमा पारी ठगी गरेका हुन् । उनीहरूले पीडितहरुसँग लिएको केही रकम भारतीय बैंकमा पनि जम्मा गरिदिएका थिए । पाकिस्तानी नम्बरबाट पीडितहरुलाई भाइबरमा चिठ्ठा परेको म्यासेज आएको थियो ।
चिठ्ठाको पैसा लिन सुरुमा केही पैसा पठाउनुपर्ने भन्दै ठगी भएको थियो । पेप्सी लगायत विभिन्न कम्पनीको करोडको चिठ्ठा परेको भनेर ठगी भएको प्रहरीले जनाएको छ । यस्तै किमिसको चिठ्ठा ठगीमा संलग्न गिरोहलाई गत महिना विराटनगरमा प्रहरीले पक्राउ गरेको थियो । फेसबुकमा चिनेकै भरमा विश्वास गर्ने तथा चिठ्ठाको लोभमा फस्दा धेरै जना ठगीएका छन् । जसकारण फेसबुक तथा भाइबर चलाउनेहरु सचेत हुनुपर्ने प्रहरी अधिकारीहरु बताउँछन् ।
‘कौन बनेगा करोडपति’ का नाममा ठगियो
सोनी टेलिभिजनको चर्चित कार्यक्रम ‘कौन बनेगा करोडपति’का नाममा समेत ठगी भएको छ । उक्त कार्यक्रमको लक्की ड्रमा २५ लाख भारतको चिठ्ठा परेको भन्दै रुपन्देहीमा ठगी भएको हो । उक्त चिठ्ठाको बैंक डिपोजिट स्वरुप ६० हजार चाहिने भन्दै पैसा लिएर ठगी भएको हो । रुपन्देही प्रहरीले यस्तो ठगीमा संलग्न ३ जनालाई पक्राउ गरेको छ ।
प्रहरीले रुपन्देहीका अंगदकुमार यादब, लुम्बिनीका इवरार हुसेन शेष र राधेश्याम कोइरीलाई पक्राउ गरेको हो । उनीहरुले बुर्तिवाङ बागलुङका नरविर चलाउनेबाट ३० हजार ३ सय, वर्दिवासका नविन कुमार राउतबाट ३७ हजार ५ सय, अमरदहका बसन्तकुमार राजवंशीबाट ३० हजार, चावहिलका टिकादेवी पुलामी मगरबाट ६० हजार, गोर्खाका लक्ष्मी सुनारबाट २५ हजार, स्याङ्जाका दिपक दर्जीबाट ३५ हजार, म्याग्दीका दुर्गा चोचाङ्गीबाट ७५ हजार रुपैयाँ लिएका थिए ।
त्यस्तै काठमाडौका टोपिन्द्र प्रसादबाट ६० हजार, काठमाडौका सुरेश रामबाट ३० हजार, सर्लाहीका मनिषा श्रेष्ठबाट ४० हजार, सिन्धुपाल्चोकका नुर्पु तामाङ्गबाट ४४ हजार ७ सय, सविता थापाबाट २५ हजार र पर्वतका सुनिल बाट २९ हजार ७ सय रुपैयाँ लिएका थिए । ती व्यक्तिहरुलाई एसमएस पठाई भ्रममा पारेर ठगी गरेका हुन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
