सुर्खेत– कर्णाली प्रदेशका सात वटा मन्त्रालयमा तत्कालका लागि दुई सय १५ जना कर्मचारीको दरबन्दी कायम गरिएको छ। जसमा हालसम्म ७० जना कर्मचारी मात्रै हाजिर भएका छन् भने करिब डेढ सय जना कर्मचारी अझै अनुपस्थित छन्।
केन्द्र सरकारले खटाएका कर्मचारी नआएपछि प्रदेश सरकारका मन्त्रालयमा काम गर्न कठिनाइ भएको छ। पटकपटक ताकेता गर्दा पनि कर्मचारी नआएको भौतिक पूर्वाधार विकास मन्त्री खड्गबहादुर खत्रीले बताए।
केन्द्रले खटाएका एक सय ४५ जना कर्मचारी हाजिर भएका छैनन्। कतिपय मन्त्रालयमा सचिव नै हाजिर भएका छैनन्। जसका कारण मन्त्रालयको दैनिक प्रशासन सञ्चालनमा पनि कठिनाइ भइरहेको छ।
भौतिक पूर्वाधार विकास मन्त्रालयका सचिव प्रकाशबहादुर रघुवंशी नै हाजिर भएका छैनन्। सचिव नभएपछि अन्य कर्मचारीको व्यवस्थापनमा समस्या देखिएको छ।
मन्त्री खत्रीले केन्द्रले कर्मचारी पठाइसकेको जनाए पनि प्रदेशमा अझैसम्म हाजिर नहुँदा मन्त्रालयले काम–कारबाही अगाडि बढाउन नसकेको बताए।
‘केन्द्रले कर्मचारी खटाइसकेको जवाफ दिन्छ, यहाँ कर्मचारी नै हाजिर भएका छैनन्। कर्मचारी नहुँदा काम गर्नै मुश्किल भयो’, मन्त्री खत्रीले भने।
मन्त्रिपरिषद् कार्यालयका प्रमुख सचिव सुरेश प्रधानले अन्य मन्त्रालयमा कामचलाउ कर्मचारी भए पनि भौतिक विकास मन्त्रालयमा सबैभन्दा बढी समस्या रहेको बताए। कर्मचारी अभावका कारण मन्त्रालयको योजना तर्जुमा र विकास सम्बन्धी सम्भाव्यता अध्ययन नै गर्न नसकिएको उनले बताए। केन्द्रमा कर्मचारीका लागि बारम्बार आग्रह गर्दा कर्मचारी पठाइसकेको जवाफ आउने गरेको उनको भनाइ छ।
मन्त्रीहरु जतिसक्दो छिटो काम गर्नुपर्ने दबावमा छन्। आम नागरिकको अपेक्षा सरकारसँग बढी नै भएकाले काम तीव्र रुपमा गर्नुपर्ने भए पनि कर्मचारी नै नहुँदा सरकार सुस्त भएको मन्त्रीहरु बताउँछन्।
कर्मचारीकै अभावमा मन्त्रालयमा आवश्यक ऐन, नियम, विधेयक तथा नीति निर्माणमा ढिलाइ भएको मन्त्रीहरूको गुनासो छ। केन्द्र सरकारले खटाएका कर्मचारीहरू समेत मन्त्रालयको सम्पर्कमा छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
