रसुवा– २०७२ बैशाख १२ गतेको भूकम्पले घर भत्किएका प्रभावितहरुलाई नेपाल सरकारले बैंकहरु मार्फत सहुलियत ब्याजदरमा ऋण दिने बताएको थियो।
सरकारले निर्देशन दिए पनि बैंकहरुले प्रभावितहरुलाई सहुलियत ब्याजदरमा ऋण प्रदान गरेका छैनन्। यसको कारण हो, सहुलियत ब्याजदरमा ऋण पाइनेबारे रसुवाका नागरिकहरु अझैसम्म बेखबर छन्।
भूकम्पले घर भत्किएका प्रभावितलाई घर बनाउन सहज होस् भनेर नेपाल सरकारले अनुदान रकम, निब्र्याजी र सहुलियत ब्याजदरमा ऋण प्रवाह गर्ने भनी निर्णय गरेको थियो। तर, भूकम्प प्रभावितलाई सरकारले यस्तो सुविधा दिएको छ भन्ने नै थाहा छैन।
आर्थिक समस्याका कारण घर बनाउन नसकेका रसुवाका प्रभावितहरु सरकारले दिने सहुलियत ब्याजदरमा पाइने ऋणबारे अनभिज्ञ रहेको नौकुण्ड गाउँपालिका ३ लारच्याङका एक प्रभावित रेशम तामाङले बताए।
उनले भने, ‘सरकारले सहुलियत ब्याजदरमा ऋण दिने त भनेको छ। तर के–कस्तो सुविधा छ भनेर मलाई केही थाहा छैन।’
रसुवामा अहिले करिब ७० प्रतिशत भूकम्प प्रभावितले निजी आवास निर्माण गरिरहेका छन्। तर, सहुलियतमा ऋण पाउने जानकारी नपाउँदा गाउँमै ३६ प्रतिशत ब्याजमा ऋण लिएर घर बनाइरहेको आमा छोदिङमो गाउँपालिका ३ का हिमाल तामाङले बताए।
‘किस्ता रकमले घर बनाउन नपुगेपछि गाउँमै ३६ प्रतिशतमा ऋण खोजेर बनाएँ’, तामाङले भने, ‘अहिले मलाई ब्याजले च्यापिरहेको छ। म जस्तो कमाउन सक्नेलाई त यस्तो भएको छ भने अरुको हालत के होला?’
नेपाल सरकारले बैंकहरुलाई सहुलियत ब्याजदरमा वार्षिक २ प्रतिशतमा ऋण प्रवाह गर्न निर्देशन जारी गरे पनि भूकम्प प्रभावितहरुलाई बैंकहरुले अहिलेसम्म सहुलियत ब्याजदरमा ऋण दिएका छैनन्। जिल्लामा अहिले सहुलियत ब्याजदरमा ऋण लिएर घर बनाउन सकिन्छ भन्ने एक जना पनि लाभग्राही भेटिँदैनन्। सहुलियतमा ऋण दिने हो भने चाँडै प्रक्रिया पूरा गरेर पाउने व्यवस्था मिलाए आवास निर्माणमा सहयोग पुग्ने आमा छोदिङमो गाउँपालिका ३ गतलाङका प्रभावित लाक्पा तेम्बा तामाङले बताए।
भूकम्पले घर भत्किएपछि प्रभावितहरुसँग समस्याका चाङ छन्। तर, सरकारको दिने सहुलियत र सेवा–सुविधा ग्रामीण क्षेत्रका बस्तीमा पुग्न सकेको छैन। ऋण पाइन्छ भन्ने सुनेका केही प्रभावितहरु सरकारले ग्रामीण भेगमा १५ लाख र शहरी भेगमा २५ लाख दिन सकिने बताए पनि कहाँबाट र कुन बैंकबाट कसरी लिन ऋण सकिन्छ भन्ने थाहा नहुँदा समस्यामा परेको बताएका छन्।
आमा छोदिङमो गाउँपालिका ३ गतलाङका नविन लामाले भने, ‘सरकारले सहुलियतमा ऋण दिने भने पनि कहाँबाट कसरी लिने भन्ने केही थाहा छैन, जसले गर्दा भनेजस्तो घर बनाउन सकिएको छैन।’
ऋण लिन कुन ठाउँमा जाने भनेर सरकारले खुलस्त रुपमा भनिदिए सबै भूकम्प प्रभावितहरुलाई सहज हुने उनको भनाइ छ।
भूकम्पले घर भत्किएपछि झन्डै ३ वर्ष अस्थायी टहरामा बिताएका प्रभावितहरु यतिबेला आवास निर्माणमा जुटिरहेका छन्। तर, सरकारले बनाएको नीति तथा अन्य निकायलाई दिएको निर्देशन थाहा हुन नसक्दा प्रभावितहरुले सुखको सास फेर्न सकेका छैनन्।
हालसम्म सहुलियतमा ऋण लिन बैंकमा कोही पनि नआएको रसुवामा रहेका बैंकहरुले बताएका छन्। सहुलियतमा ऋणका लागि आवश्यक प्रक्रिया पुर्याएर आएका प्रभावितहरुलाई सहजै रकम उपलब्ध गराउने नेपाल बैंक लिमिटेड जिल्ला शाखा रसुवाका प्रमुख शिव धिमालले बताए।
‘अहिलेसम्म कोही पनि ऋण लिन आएका छैनन्। यदि आवश्यक प्रक्रिया पुर्याएर प्रभावितहरु आउँछन् भने हामी सहुलियत ऋण दिन तयार छौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
