धरान- नेपाल कम्युनिस्ट पार्टी नेकपाका अध्यक्ष पुष्पकमल दाहाल प्रचण्डले नेकपाभित्र खेल्ने कोसिस नगर्न चेतावनी दिएका छन्।
उपनिर्वाचनको मौनअवधिको पूर्वसन्ध्यामा धरानको चुनावी सभालाई सम्बोधन गर्दै प्रचण्डले पार्टी एकता हुन नदिन कांग्रेसले तल्लोस्तरको कदम चालेको बताए।
मंगलबार सोही स्थानमा कांग्रेसले गरेको चुनावी सभामा नेकपाभित्र अझै विवाद रहेको र जुनसुकै बेला पार्टी विभाजन हुनसक्ने युवा नेता गगन थापाले बताएका थिए। त्यसको प्रत्युत्तर दिने क्रममा बिहिबार 'प्रचण्ड'ले पार्टी एकता हुन नदिन कांग्रेसले अनेक प्रपञ्च रचेको आरोप लगाएका छन्।
'कम्युनिस्ट पार्टीहरु एक हुन नदिन कांग्रेसले आफुलाई पाँच वर्ष प्रधानमन्त्री पद अफर गरेको थियो', प्रचण्डले भने, 'अर्काको भन्दा आफ्नो चासो लिनु, नत्र म्युजियममा राख्ने खालको कांग्रेस होला।'
महिला र मधेसी समुदायबाट राष्ट्रपति बनाउने पार्टी नेकपा भएकाले समानुपातिक समावेशीको विषय आफुहरुलाई नसिकाउन प्रचण्डले आग्रह गरे। दुई अध्यक्षबीच लडाइँ गराएर फाइदा लुट्न कांग्रेसले खोजे पनि नेकपाको एकतामा केही असर नपर्ने जिकीर उनको थियो।
कांग्रेसले लगाएको आरोप खण्डनमै लामो समय खर्चेका प्रचण्डले पार्टी एकतामा कहीँकतै द्विविधा नरहेको बताए। आलोपालो सरकार चलाउँदा अलिक द्विविधा हुने बताउँदै उनले सरकारले पूरा कार्यकाल काम गर्ने स्पष्ट पारे।
सोही सभामा सम्बोधन गर्दै पूर्व सभामुख तथा नेकपा नेता सुवासचन्द्र नेम्वाङले अहिलेको सरकार भ्रष्टाचार न्यूनीकरणमा लागेको बताए। अहिले भ्रष्टाचार बढेको नभई भ्रष्ट्राचार बाहिर ल्याउन सुरु गरेको उनको भनाइ छ।
कांग्रेसले मंगलबारको चुनावीसभामा केपी शर्मा ओलि नेतृत्वको सरकार भ्रष्ट्राचारमा लीन भएको आरोप लगाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
