काठमाडौं- नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले पार्टी पंक्तिमा देखिएको 'कन्फ्युजन क्लियर' गर्न पछिल्लो निर्णय गरिएको बताएका छन्।
केही दिनअघि सचिवालय बैठकले प्रचण्डलाई कार्यकारी अधिकार दिएको थियो र उनले पार्टीको काममा केन्द्रित हुने निर्णय गरेको थियो। सो बैठकले केपी ओलीले बाँकी कार्यकाल सरकार चलाउने निर्णय पनि गरेको थियो।
'पछिल्लो निर्णयको उद्देश्य पनि कन्फ्युजन क्लियर गरौं भन्ने नै हो', आज प्रदेश ३ का मुख्यमन्त्री डोरमणि पौडेलको निवास हेटौंडामा आयोजित एक कार्यक्रममा प्रचण्डले भने।
उनले सरकार चलाउनेले ढुक्कसँग सरकार चलाऔं, पार्टी चलाउनेले पनि राम्रोसँग चलाऔं भनेरै सो सहमति गरिएको बताए। 'जनताको सेवा गर्ने हो', उनले भने, 'सबै मिलेर जनताको सेवा गर्नेतिर जाऔं भन्ने बाहेक अर्को उद्देश्य होइन।'
उनले पार्टीमा अलि बढी जोड र ध्यान आफूले दिने र ओलीले सरकारका अलि बढी ध्यान र जोड दिने बताए। 'अध्यक्ष त हामी दुवै छौं', उनले भने, 'त्यसो भएर म देशभर दौडिरहेको छु, पार्टीमा ध्यान दिनलाई। देशभरि दौडिने कारण पनि त्यही हो। परिणाम पनि राम्रै भएको देख्छु।'
त्यस्तै, प्रदेश २ को राजधानी र नाम अबको केही दिनभित्रैमा टुंग्याउने पक्षमा आफू रहेको पनि प्रचण्डले बताए। 'त्यसमा तपाईंहरुलाई सहयोग हुन्छ', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
