फिल्म क्षेत्रका ‘रियल जोडी’ हुन्, निश्चल बस्नेत र स्वस्तिमा खड्का। दुवै नेपाली दर्शकमाझ परिचित नाम हो। ‘लुट’ निर्देशन गरेर चम्किएका निश्चल पछिल्लो समय अभिनयमा समेत सक्रिय देखिएका छन्। स्वस्तिमाले त फिल्म ‘बुलबुल’बाट उत्कृष्ट अभिनेत्रीको नेसनल अवार्ड नै जितिसिकन्।
यसअघि ‘नाच फिरिरी...’बोलको गीतमार्फत म्यूजिक भिडियोमा देखापरेको यो जोडीलाई हालसालै दर्शकले फिल्ममा पनि देखे। ‘घामड शेरे’ फिल्ममा यी दुई साली-भेनाको भूमिकामा देखिए।
पर्दाबाहिर ‘हिट’ यो जोडी बक्सअफिसमा ‘फ्लप’ भइदियो। यद्यपि यो जोडीलाई पछिल्लो समय फिल्म क्षेत्रमा ‘आर्दश जोडी’ का रुपमा सम्मान गर्न थालिएको छ।
धेरैलाई उत्सकुता हुँदो हो– ‘रियल लाइफ’का श्रीमान्–श्रीमतीलाई पर्दामा ‘साली-भेना’ बनेर काम गर्न कतिको सहज थियो होला!
‘अनि, फिल्मको सुटिङ सेटमा वास्तविक सम्बन्ध कतिको हाबी हुन खोज्थ्यो?’
‘नचाहँदा–नचाँहदै कहिलेकाँही हाबी त हुन्थ्यो,’ हालसालकै एक भेटमा निश्चल लजालु भावसहित सुटिङ सेटका रमाइला किस्सा सुनाउन तयार भए।
‘घामड शेरे’ सुटिङका क्रममा कतिपय सिनमा निश्चल ‘यो त नगर्दा हुँदैन?’ भनेर हल्का असहमति प्रकट गर्थे।
अनि, स्वस्तिमा तत्काल जवाफ फर्काउँथिइन्, ‘यो हजुर र मेरो साँच्चिैकै हो र?’
‘जस्तो, एउटा उदाहरण दिनुस् न,’ हामीले जिज्ञासा राख्यौं।
निश्चल उदाहरण दिन थाले, ‘जस्तो, एउटा फिल्ममा सिनले हाफपाइन्ट डिमान्ड गरेको छ। मैले ‘हाफपाइन्ट नै त किन पर्यो होला र, पाइन्ट लाए नि हुन्छ त’ भनेर असहमति प्रकट गर्छु। त्यसपछि उनले ‘हेर न, डिरेक्टर भएर होइन, बुढा भएर सोच्न थाल्यो’ भन्दै जवाफ फर्काउँछिन्।’
‘सुटिङ सेटमा यस्तै भएको थियो, हो?’
‘ठ्याक्कै यस्तै त होइन, तर केही सिन गर्दा यस्तैयस्तै भएको थियो।’
त्यतिबेला स्वस्तिमा निश्चललाई जिस्काउँदै भन्थिन् रे, ‘हेर न बुढालाई आरिस लागेको।’
डिरेक्टर हेमराज बिसी झन् आँगोमा घिउ थप्थे रे,‘ हो, स्वस्तिमाले भनेको ठिक हो। यसरी ‘जेलस’ हुन पाइन्छ?’
‘अनि म रिसाउँदै सेटबाट फन्किएर हिड्थेँ,’ निश्चलले हाँस्दै सुटिङ सेटका ती किस्सा सम्झिए।
त्यस्तै, फिल्ममा निश्चलको श्रीमतीको भूमिका निर्वाह गरेकी कलाकार सुष्मा निरौलासँग ‘बेड सिन’ गर्दाको किस्सा पनि कम रोचक रहेनछ।
निश्चललाई साह्रै गाह्रो भएछ- सुष्मासँग अन्तरंग दृश्य दिन। कारण, फिल्ममा सालीको भूमिका निर्वाह गरिरहेकी आफ्नै श्रीमती।
जब निश्चल बेडको सिन गरिरहेका हुन्थे, स्वस्तिमा डिरेक्टर छेउ ‘मोनिटर’अघि उभिएर दृश्य नियाल्थिन्।
‘त्यतिबेला मलाई यसरी किन हेरिरहेको होला भनेर निकै उकुसमुकुस भएको थियो,’ निश्चलले लजाउँदै सुनाए,‘सायद उसलाई पनि लाग्यो होला, ह्या यो सिन त नराखेको भए नि हुन्थ्यो। यता मलाई जति सहज तरिकाले काम गर्न खोजेपनि मेरो बुढीले बाहिरबाट हेरिरा’छ भन्ने दिमागमा कता कता भइरहेको थियो।’
‘काममा हस्तक्षेप गर्दिनँ’
निश्चल-स्वस्तिमा दुवै एकै क्षेत्रका हुन्। यसो हुँदा प्रायः दर्शकलाई लाग्दो हो, दुवैबीच कामलाई लिएर खुब सहकार्य हुँदो हो! दुवै एकअर्काको सल्लाहबिना कुनै पनि प्रोजेक्टमा हात नहाल्दा हुन्!
तर दुवैको जवाफ पत्याउने हो भने यथार्थ यस्तो छैन। ‘एउटै प्रोजेक्टमा काम गर्यौं भने त कुराकानी हुन्छ,’ निश्चल भन्छन्, ‘नत्र त खासै गफ हुन्न। म मेरो कुरा अलिअलि भन्छु उसलाई। उसले पनि थोरैमात्र भन्छ।’
‘फिल्मप्रतिको अवधारणा त पक्कै मिल्दैन होला?’
‘कहाँ मिल्नु? हाम्रो मेन्टालिटी नै फरक छ नि,’ उनी भन्छन्, ‘उसको सोचाइ अर्कै खालको, मेरो अर्कै। मलाई झुर लागेका फिल्म उसलाई खतरा लागेको पनि छ, मलाई मज्जा लागेको फिल्म उसलाई ‘ताइ न तुइको’ लागेको पनि छ।’
स्वस्तिमाको काममा रत्तिभर पनि हस्तक्षेप गर्दैनन् रे निश्चल। भन्छन्, ‘म उसले सल्लाह माग्यो भनेमात्रै दिन्छु नत्र उसको काममा हस्तक्षेप त म गर्दै गर्दिनँ।’
केही महिनाअघि एक भेटमा स्वस्तिमाले भनेकी थिइन्, ‘म कति पारिश्रमिक लिन्छु, त्यसबारे मेरो निश्चललाई केही थाहा हुँदैन।’
यसबारे हामीले निश्चलसँग ‘क्रस-भेरिफाइ’ गर्न खोज्यौँ। जवाफ उही आयो, ‘अहँ, थाहा हुँदैन। म सोध्दा पनि सोध्दिनँ।’
बेलाबेला निश्चल ठट्यौली पारामा स्वस्तिमालाई सोध्छन् रे, ‘कति लिन्छौ हौ तिमी?’
स्वस्तिमा जवाफ फर्काउँछिन्, ‘हजुरकोभन्दा कमै हो क्या।’
त्यसपछि दुवै हाँस्छन्। उनीहरुको दाबी पत्याउने हो भने सायद त्यसपछि पारिश्रमिकको विषय अन्तै मोडिन्छ!
मूल तस्वीर फेसबुकबाट साभार
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
