सुर्खेत- ‘डिजिटल प्रदेश’ बनाउने कर्णाली प्रदेश सरकारको निर्णय कार्यान्वयनमा ल्याइएको छ। उक्त योजना कार्यान्वयन अन्तर्गत पहिलो पटक प्रदेश राजधानी वीरेन्द्रनगरमा शुक्रवार ‘कम्युनिटी साईरन’ जडान गरिएको छ।
वीरेन्द्रनगर–६ प्रगतिनगर टोलमा साइरन जडान गरिएको हो। प्रगतिनगरमा राखिएको साइरनमा ३० घरका ६० जनाको नाम र मोवाइल नम्बर राखिएको छ। टोलमा चोरी, डकैती, लुटपाट तथा यस्ता कुनै पनि अापराधिक क्रियाकलाप, प्राकृतिक प्रकोपजस्ता घटना भएमा उक्त टोलका नागरिकले साइरनमा फोन डाइल गर्नेछन्। साइरनमा राखिएको नम्बरहरुको प्रयोगकर्तालाई विशेष कोड उपलव्ध गराइएको छ। जुन कोडमा प्रगतिनगरका ६० जनाले फोन डाइल गर्दा ‘अटो’ साइरनमा प्रेस हुनेछ र साइरन बज्नेछ।
साइरन बजेसँगै ६ वटा मोवाइलमा म्यासेज जानेछ। जसमा ५ जना स्थानीयवासी छन् भने एउटा म्यासेज प्रहरीलाई जानेगरी नम्बर साइरन सेटमा जडान गरिएको छ।
साइरनबाट प्राप्त एसएमएस भने अंग्रेजीमा हुनेछ। कहाँ, कसले साइरन बजायो भन्ने बारे नामसहितको एसएमएस (सन्देश) ६ जनाको मोबाइलमा जानेछ। समुदायका जिम्मेवार, पढेलेखेका र जिल्ला प्रहरी कार्यालयलाई एसएमएस जानेगरी प्रविधि जडान गरिएको छ। जसबाट कहाँ, को, मान्छेलाई समस्या पर्यो भन्ने बारे समुदायका अगुवा र प्रहरीले जानकारी लिनेछन्। समस्याको समाधानका लागि साइरनको घन्टी बज्नासाथ समुदायमा बसोबास गर्ने नागरिकले थाहा पाउनेछन् भने एसएमएसबाट प्रहरी तथा अन्य जिम्मेवार व्यक्तिले समस्याबारे जानकारी पाउनेछन्।
साइरन जडान भएको क्षेत्रमा बसोबास गर्ने नागरिकले समुदायमा कुनै अपराध भए वा आपतकालीन अवस्थामा छिमेकीहरुलाई एकजुट हुनसमेत सहज हुने आन्तरिक मामिला तथा कानुन मन्त्री नरेश भण्डारीले बताए। कसैको घरमा आगलागी, मृत्यु, प्राकृतिक प्रकोप वा कुनै पनि समस्या भएमा सरोकारवाला निकाय, छिमेकीलाई गुहार्नसमेत साइरनले मद्दत गर्ने उनको भनाइ छ।
उक्त साइरन बज्नासाथ जिल्ला प्रहरी कार्यालयमा एसएमएस (सन्देश) जाने भएकाले सामान्य घटनाको समेत अनुसन्धानमा सहज हुनेछ। एसएमएस नआएका व्यक्तिहरुले साइरन बजेको सुन्नासाथ घरबाहिर निस्केर टोलको समस्या समाधान र अप्रिय घटनाको सामूहिक प्रतिवाद गर्ने विश्वास लिइएको छ। समुदायमा जुनसुकै समयमा पनि आपत्तविपत पर्न सक्ने भएकाले २४ घन्टै साइरन खुल्ला हुनेछ। लोडसेडिङ हुँदा साइरन बन्द नहुने गरी आवश्यक व्याट्रि जडान गरिएको छ। उक्त व्याट्रिले करिब ५० घन्टासम्म लोडसेडिङ भए पनि काम गर्न सक्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
