धरान– धरान उपमहानगरपालिकामा मेयरसहित एक वडाध्यक्षको लागि उपनिर्वाचन हुँदैछ। उपनिर्वाचनमा ४ राजनीतिक दलहरूले आफ्नो उम्मेदवारी प्रस्तुत गरेका छन्।
‘समृद्ध धरान’को नारा लिएर चुनावी प्रचारप्रसारमा जुटेका दलहरूले जनताका खास समस्याको बारेमा भने खासै जानकार देखिँदैनन्। अढाइ वर्षे कार्यकालको लागि हुन लागेको उपनिर्वाचनमा महत्वाकांक्षी योजनाका साथ उम्मेदवार निर्वाचनमा होमिएका छन्।
नेकपाका उम्मेदवार प्रकाश राई यसअघि सुरु भएका योजना पूरा गर्ने योजनामा छन्। पर्यटन, खेलकुद शिक्षा र स्वास्थको विषयमा आफूले जोड दिएको उनले बताए। सादा जीवन उच्च विचारका साथ काम गनुपर्ने बताउने उनी कसरी र के काम गर्ने भन्नेबारेमा भने स्पष्ट छैनन्।
उनी प्रतिपक्षी दल कांग्रेसको कारण विकास हुन नसकेको आरोप लगाउँछन्। उद्योग निर्माण गर्नेदेखि निजी शैक्षिक संस्थाको विकास गर्नेसम्मका उनका लक्ष्य छन्। तर, ६ महिनाअघि बनेका सडकमा खाल्डा परेका विषयमा उनी बेखबर छन्। ‘समृद्ध धरान बनाउने लक्ष्य छ।’ उनी भन्छन्।
उता नेपाली कांग्रेसका उम्मेदवार तिलक राई धरान २० वर्ष अगाडि जहाँ थियो त्यो भन्दा पनि बिग्रँदाे अवस्थामा रहेको बताउँछन्। योबीचमा कम्युनिस्टले मात्र धरानमा नेतृत्व गर्ने मौका पाएकोले यस्तो अवस्था भएको उनको तर्क छ। कांग्रेसको सरकारको पालामा धरानमा बिपी प्रतिष्ठान खुलेको भन्दै उनले अब आफू विजयी भए प्रतिष्ठानलाई थप चलायमान बनाउने बताए।
तर, बिपी प्रतिष्ठानमा स्थानीय सरकारको कुनै पनि हिस्सा र अधिकार देखिँदैन। नेकपाको उद्योग खोल्ने योजनाका विरुद्ध उनी उद्योगले प्रदूषण निम्त्याउने भन्दै पर्यटनमै जोड दिनुपर्ने उनकाे तर्क छ।
जनताको खास समस्याका बारेमा खासै जानकार नदेखिएका उनी बारम्बार कम्युनिष्ट सरकारले देश बर्बाद पारेको कुरा दोहोर्याउँछन्। पर्यटनको विकास गर्ने भने पनि कसरी गर्ने भन्ने बारेमा भने उनको खास भिजन देखिँदैन।
समाजवादी पार्टी नेपालका उम्मेदवार गजेन्द्र लिम्बुको भने फरक तर्क छ। उनी आफू सबै विषयमा विज्ञ नभएको कारण शिक्षा, स्वस्थ, पर्यटन र रोजगारीको क्षेत्रमा विज्ञहरू संगको परामर्शमा गुरुयोजना बनाएर काम गर्ने बताउँछन्। यद्यपि, उनी अहिलेको सत्ताको खुलैरै अलोचना गर्छन्।
बहुमतको दम्भ हटाएर काम गर्ने हो भने धरानलाई विकसित र समृद्ध बनाउन सकिने उनको बुझाइ छ। संघीय लिम्बुवान मञ्चका उम्मेदवार अम्बरबहादुर लिम्बु पहिचान सहितको धरानको पक्षमा छन्। आफू धेरै नबोल्ने तर काम गर्ने भएको भन्दै विजयपुरलाई प्रदेशको राजधानी बनाउन लागिपर्ने उनको भनाइ छ। इमान्दारीताका साथ काम गरेपछि विकास र सुशासन आफैं हुनेभन्दै उनी आफू इमान्दार भएको बताउँछन्।
केही दिनअघि नेकपाका प्रदेश १ इन्चार्ज भीम आचार्यले धरान आएर अबको दश वर्ष नेकपाले शासन गर्न पाए देश समृद्ध बन्ने बताए। उनले धरानको स्थानीय समस्यामा भन्दा पनि केन्द्रीय सरोकारका विषयमा भाषण गरे। प्रमुख प्रतिपक्षीले आलोचना गरेजस्तो सरकार असफल नभएको उनको तर्क थियो।
मङ्सिर ५ गते बिहीबार कांग्रेस प्रवक्ता विश्वप्रकाश शर्माले पनि सरकारको असफलताबारे चर्चा गरे। मन्त्रिमण्डल विस्तारदेखि राष्ट्रपतिको विषयमा उनको चासो थियो। तर, धरानमा कांग्रेसको उम्मेदवारी किन र केको लागि भनेर प्रस्ट पार्न भने उनले सकेनन्।
नेपाली अध्ययन संस्था सेयरकास्टले धरानमा गरेको सर्वेक्षण अनुसार सबैभन्दा धेरै बेरोजगारीको समस्या रहेको उल्लेख गरेको छ। अहिले ३९ प्रतिशत बेरोजगार, २२ प्रतिशत सडक, १६ प्रतिशत गरिबी, १५ प्रतिशत खानेपानीको अभाव र ८ प्रतिशत खानेपानीको पहुँचसम्मै पुग्न नसकेको अध्ययनको निष्कर्ष छ।
सेयरकास्टले अध्ययन अनुसारको समस्या समाधानको बारेमा भने उम्मेदवार बेखबर छन्। जसरी पनि चुनाव जित्नुपर्छ भन्ने मानसिकतामा रहेका दलहरू समस्या पहिचान गर्ने र समाधानको उपाय अपनाउन झन्झट मान्ने गरेका छन्।
स्थानीय व्यापारी रबिन श्रेष्ठ व्यापार पलायन भएकोमा चिन्ता व्यक्त गर्छन्। धरानमा हुने व्यापारिक चहलपहल अहिले इटहरी र अझै दक्षिण जोगबनीसम्म पुगेकोमा उनी दुःखी छन्।
यस विषयमा अहिलेका उम्मेदवारहरूले सोच्ने बेला भएको उनी बताउँछन्। यस्तो समस्या समाधान कसरी गर्ने भन्ने बारे स्पष्ट योजना चाहिएको उनको भनाइ छ। तर, कुनै पनि उम्मेदवारले यस विषयमा आफूहरूले नसोचेको बताए।
स्थानीय मौसम राई धरानमा सडक बालबालिकादेखि बेरोजगारी समस्या अत्यधिक भएको भन्दै त्यसको लागि नीतिगत रुपमै काम गर्नुपर्ने बताउँछन्। अर्को स्थानीय प्रेमप्रसाद पराजुली रोजगारकाे व्यवस्था गर्न र गरिबी हटाउन पहल गर्नुपर्ने माग गर्छन्।
१२ हजार २ सय सुकुम्वासीलाई धनीपुर्जा दिने भनेर भोट बैंकको रुपमा मात्र लिइएको उनको आरोप छ। अर्का सुकुम्वासी कुमार कार्की पनि सुकुम्वासीका समस्या समाधान गर्न माग गर्छन्। उनी भन्छन्, 'सुकुम्वासीलाई भोट बैंकको रुपमा मात्र प्रयोग गरियो भने यसले गम्भीर दुर्घटना निम्त्याउन सक्छ। पार्टीहरूले बेलैमा सोच्ने बेला आएको छ।'
सुकुम्वासी टोलमै बस्दै आएका गङ्गाप्रसाद रेग्मीले खानेपानीकाे समस्या रहेकाे बताउँछन्। जलाधार क्षेत्रमा बस्ती बसाउन थालेपछि पानीका मूहान सुकेको भन्दै त्यस विषयमा चासो दिन उनी सुझाउँछन्।
धरानमा देखिएका यस्ता सामान्य समस्याको बारेमा बेखबर दलहरू समृद्ध धरानको नारा लगाउँदै चुनावी मैदानमा छन्। नेकपा पूर्ववत् साख जोगाउने पक्षमा छ भने कांग्रेस सकेसम्म इतिहास निर्माण गर्ने दाउमा लागेको छ।
नेकपा आफ्नो गढ भएकोले विजयी भइसकेको बुझाइमा छ भने कांग्रेस विपी प्रतिष्ठानलाई भोट माग्ने हतियारको रुपमा लिइरहेकोछ। उता दुई साना दलहरु आफ्नो हैसीयतको मापन गर्ने र आगामी रणनिती बनाउने दाउमा देखिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
