काभ्रेपलाञ्चोक- प्रधानमन्त्री केपी शर्मा ओलीले अब छोटो समयभित्र नेपाललाई आधुनिक, विकसित र सम्पन्न राष्ट्र बनाइने बताएका छन्।
काठमाडौँ विश्वविद्यालय (केयू)का कुलपतिसमेत रहेका प्रधानमन्त्री ओलीले शुक्रबार धुलिखेलमा आयोजित केयूको २५औँ दीक्षान्त समारोहलाई सम्बोधन गर्दै अरुले बनाइदिने नभई नेपालीले नै नेपाल बनाउने स्पष्ट पारे।
‘हामीसँग सफल वर्तमान छ, उज्यालो भविष्य छ। अब ढुक्क भएर अगाडि बढ्न सक्ने क्षमता छ‚’ उनले भने‚ ‘नेपाल उर्वर देश भएकाले सबैखाले उत्पादन गर्न सक्ने क्षमता हामीसँग छ।’
‘हामी केही कारणले आर्थिक रुपमा पछाडि पर्यौं तर अब सधैँ पछाडि पर्दैनौँ‚ हिजो पछाडि पर्नुको अनेकौँ कारणमध्ये शिक्षाको अभाव एउटा कारण थियो,’ उनले भने।
प्रधानमन्त्री ओलीले सरकार गुणस्तरीय शिक्षा प्रदान गर्ने बाटोमा जाँदै गरेको बताउँदै केयूमा शुक्रबार दीक्षितमध्ये ५४ प्रतिशत छात्रा रहेकामा खुशी व्यक्त गरे।
नेपालमा उत्पादित चिकित्सा जनशक्ति ‘ग्लोबल लेभेल’को रहेको समेत उनले बताए। ‘यस्तो आकर्षणले बालिकाहरु विद्यालयबाट ड्रपआउट हुने ठूलो चिन्ता हट्दै जानेछ, जनशक्ति उत्पादनमा छात्राको सङ्ख्या बढ्नु पनि ठूलो खुशीको कुरा हो, हामी खुशी छौँ, देश खुशी छ‚’ उनले भने। नयाँ पुस्तालाई उत्साह र आत्मविश्वासका साथ अगाडि बढ्न पनि उनले आह्वान गरे।
सो अवसरमा भारतको जयपुरस्थित मणिपाल विश्वविद्यालय प्रमुख डा के रामनारायणले केयूसँगको सहकार्यमा मेडिकल क्षेत्रमा उल्लेख्य प्रगति भइरहेको बताए। उनले भने, ‘हामी दुई देशको मित्रतासँगै मेडिकल शिक्षामा पनि मित्रवत् रुपमा अघि बढिरहेका छौँ, यो खुशीको विषय हो।’
केयूका उपकुलपति प्रा डा रामकण्ठ माकजू श्रेष्ठले शिक्षा प्रणालीलाई कसरी सान्दर्भिक, सीपमूलक र उच्च गुणस्तरको बनाउने भन्ने विषयमा जोड दिनुपर्ने बताए। उनले भने, ‘हाम्रो मुलुकमा चुनौती र अवसर थुप्रै छन्, शिक्षाले यी चुनौती र अवसरप्रति गहन दृष्टिकोण प्रदान गर्न सक्नुपर्छ।’
कार्यक्रममा एमबिबिएस स्नातक तहमा सबैभन्दा बढी ७९ दशमलव ६७ प्रतिशत अङ्क ल्याउने लुम्बिनी मेडिकल कलेज पाल्पाका विवेक पौड्याललाई भाइस चान्सलर स्वर्णपदक प्रदान गरिएको थियो। केयूका चिकित्सा विधाका स्नातक र स्नातकोत्तर तहका १ हजार ६ सय ४ दीक्षित भएका हुन्।
दीक्षित हुनेमा एमसिएच, डिएम, एमडी, एमएस, एमएस्सी, र एमडीएसका १ हजार ९८, बिडिएसका २ सय १८, बिएस्सी इन नर्सिङका १ सय १६ र बिपिटीका २४ विद्यार्थी छन्। भारत, भुटान, श्रीलङ्का, मालदिभ्स, अमेरिका र बेल्जियमका २ सय ४६ विद्यार्थीसमेत दीक्षित भएका छन्। -रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
