राजविराज- सगरमाथा अञ्चल अस्पतालमा गर्भवतीको मृत्यु भएपछि राजविराजको अवस्था तनावग्रस्त भएको छ। पीडितका आफन्तले राजविराजमा आन्दोलन सुरु गरेका छन्।
राजविराज–भारदह सडक खण्डमा टायर बालेर यातायात अवरुद्ध पारिएको छ। गाउँबाट ट्याक्टर र टेम्पोमा राजविराज आएका स्थानीयले अस्पताल घेराउ गर्दै डा दीलिप साहको क्लिनिकमा लागेको बोर्डमा आगो लगाएका छन्। अस्पतालको सम्पूर्ण गतिविधि बिहानैदेखि प्रभावित भएको छ। संलग्न डाक्टरलाई कारबाही र पीडित परिवारलाई क्षतूपूर्तिको माग गरिएको छ।
यता, अस्पतालमा भएको घटनाको वास्तविकता पत्ता लगाई आवश्यक कारबाही प्रक्रिया अगाडि बढाउन राजविराज नगरपालिकाका मेयर शम्भुप्रसाद यादवको संयोजकत्वमा ११ सदस्यिय छानबिन समिति गठन गरिएको छ। छानबिन समितिमा उपमेयर साधना झा, अस्पताल विकास समितिका अध्यक्ष डा. चिरञ्जीवी लाल देव, जिल्ला प्रशासन कार्यालयका प्रशासकीय अधिकृत जनक कोइराला, जिल्ला जनस्वास्थ्य कार्यालयका प्रमुख ज्ञानबहादुर बस्नेत, राजनीतिक दलका तर्फबाट राजपाका दिनेश यादव, नेपाल पत्रकार महासंघका केन्द्रीय सदस्य अवधेश झा, कानुन व्यवसायी शम्भुकुमार यादव, अस्पतालका मेडिकल अफिसर डा ब्रजेशकुमार झा, विष्णुपुर गाउँपालिकाका सदस्य लीला यादव र पीडितका आफन्त ब्रह्मदेव यादव सदस्य छन्।
पीडितका आफन्तले डाक्टरको लापरबाहीका कारण अस्पतालमा बिरामीको मृत्यु भएको आरोप लगाउँदै नाराजुलुस गरेका छन्।
सुत्केरी व्यथाले च्यापेपछि जिल्लाको विष्णुपुर गाउँपालिका १ पिप्राहिकी २५ वर्षीया अनिता यादवलाई २ दिनअघि अस्पताल भर्ना गरिएको थियो। सुरुदेखि नै चेकजाँच गर्दै आएका डाक्टर दीलिप साहले नै अनितालाई अस्पताल भर्ना गर्न सल्लाह दिएका थिए। तर, व्यथा चर्किंदै गएपछि डाक्टरले वास्ता नगरेको मृतकका पति रमेश यादवले आरोप लगाएका छन्।
बुधबार राति १० बजेदेखि नै अनितालाई दुखाइ बढेपछि आफूले पटकपटक फोन गर्दासमेत डाक्टरले फोन नउठाएको यादवले बताए। अस्पतालले पनि सहयोग नगर्दा आफ्नी पत्नी र बच्चा दुवैको मृत्यु भएको उनको भनाइ छ। ‘डाक्टर नै नआएपछि बच्चाको टाउको बाहिर निस्केको अवस्थामा राति करिब १ बजे अनिता र बच्चा दुवैको मृत्यु भयो,’ उनले भने।
बिरामीको मृत्यु भइसकेपछि राति २ बजे आइपुगेका डाक्टर साह तक्कालै भागेको पनि उनले आरोप लगाएका छन्। मृतकका ४ वर्षीय छोरा आकाश र २ वर्षीया छोरी सरस्वती छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
-1789631269.jpg)
