गोजीको भारु र फोटो, जसले खोल्यो झाँक्री हत्याको पोल

सुरक्षा/अपराध

नेपाल लाइभ मंगलबार, मंसिर ३, २०७६ १४:५०

काठमाडौं- शरीरका विभिन्न भागमा छिया–छिया पारेर काटिएको चोट। घाँटी छिन्न केही अंशमात्रै बाँकी। एक अधवैसें पुरुष मृत अवस्थामा गत कात्तिक २१ गते सिरहा नगरपालिका–१२ गम्हरियास्थित कमला नदीको तटमा भेटिए।

स्थानीयले खबर गरेपछि घटनास्थल पुगेको प्रहरीले शव मुचुल्का तयार पार्‍यो। त्यतिन्जेलसम्म मृतक को हुन् भन्ने केही खुलेको थिएन।

‘निकै दर्दनाक अवस्थामा फेला परेको शव कसको हो भन्ने नै पत्ता लगाउनु हाम्रो पहिलो कडी थियो,’सिरहाका एसपी उमा चुतुर्वेदीले भने, ‘मृतकको सर्टको खल्तीमा केही महत्पवूर्ण क्लु भेटियो।’

मृतकको सर्टको खल्तीमा केही भारु नोट र मृतक स्वयमको फोटो भेटिएको थियो। ‘मृत व्यक्ति मधेशी मूलको जस्तो देखिनु। खल्तीमा भारु नोट भेटिनु र घटनास्थलमा वरपर भेटिएका व्यक्तिले मृतक आफ्नो गाउँको नभएको बताउनुले उनी भारतीय नागरिक भएको शंका हामीले गर्‍यौं,’ एसपी चतुर्वेदी भन्छन्, ‘त्यसपछि ती व्यक्तिको पहिचान गर्न हामी सीमा पारी भारत गयौं।’

यिनै शंकाको सुईलाई पछ्याउँदै भारतीय प्रहरीसँग समन्वय गरेर सिरहा प्रहरीले मृत व्यक्ति भारतीय भएको पहिचान गर्‍यो। भारतको विहार राज्य, मधुवनी, थाना ललमनिया ग्राम, वेल्हा पञ्चायत कारमेघ पश्चिकम–६ का ४० को राजकुमार यादव रहेको खुल्यो। मृत भेटिएका व्यक्ति श्रीमान् भएको भन्दै उनकी श्रीमतीले सनाखत गरिन्।

उनीसँगको सोधपुछको क्रममा मृतक झाँक्रीको काम गर्ने र नेपाल-भारत ओहोरदोहोर गरिरहने गरेको खुल्यो। सिरहाको धनगढीमाई नगरपालिका-१० धनगढी टोल बस्ने ३८ वर्षीय फुलगेन साहसँग एक वर्षअघिसम्म वैदेशिक रोजगारीको लागि कतारमा थिए। सोही बेला उनकी श्रमती गाउँमा बिरामी परेकी थिइन्।

सीमा पारी भारतका यादवले झारफुक गर्ने र उनले ठीक पार्ने भन्ने खबर फुलगेनकी श्रीमतीले पाएपछि उनी यादवको सम्पर्कमा पुगेकी थिइन्। श्रीमान् वैदेशिक रोजगारीमै भएका बेला तिनै झाँक्रीसँग सम्पर्कमा पुगेकी उनी झाँक्रीसँग नजिकिएकै थिइन्।

‘यतिसम्म नजिक भएको देखियो कि। विदेशबाट फर्कने बेला फुलगेनलाई श्रीमतीले झाँक्रीका लागि मोबाइलसमेत ल्याउन लगाएको देखियो,’हत्या कारणमा अनैतिक सम्बन्धतर्फ पनि संकेत गर्दै एसपी चुतुर्वेदी भन्छन्।

करिब एक वर्षअघि कतारबाट फुलगेन घर फर्किएका थिए। त्यसपछिका दिनहरुमा पनि झाँक्री आफ्नो घर आउने गरेको फुलगेनको भनाइ छ। सिरहाको सीमावर्ती ठाउँमा झारफुक गर्न भन्दै उनी बारम्बार नेपाल आइरहन्थे।

फुकफाककै क्रममा फुलगेनसमेत झाँक्री यादवसँग नजिक भएका थिए। झाँक्री यादवले आफ्नो छोरीको विवाह गर्न लागेकाले आर्थिक सहयोग गर्न भन्दै फुलगेनसँग ८६ हजार रुपैयाँ ऋणसमेत लिएका थिए।

फुलगेनकै माध्यमबाट धनुषाको कमला नगरपालिका–६ बस्ने अजय कुमार महतो, सिरहा धनगढीमाई नगरपालिका-११ बस्ने रामकुमार साहसँग झाँक्रीको चिनजान भएको थियो। उनले झारफुक गर्ने भूत भगाउने भन्दै उनीहरुसँग पनि केही पैसा लिएका थिए। तर झारफुकबाट बिरामी सञ्चो हुनुको साटो उल्टै जादुमन्तर लगाएर समस्या बढाउने गरेको पक्राउ परेका व्यक्तिको भनाइ छ।

झारफुक गर्ने बाहनामा यादव भने एकल महिला र घरमा श्रीमान् नभएका महिलासँग नजिक भएर अनैतिक सम्बन्ध राख्ने गरेको अनुसन्धानमा खुलेको एसपी चुतुर्वेदी बताउँछन्।

झाँक्रीको पोल खुल्दै गएपछि फुलगेनसहित पैसा सापट दिएका अन्य व्यक्तिले रकम फिर्ता गर्न भन्दै पटकपटक फोन गर्न थालेका थिए।

पैसा मागेपछि झाँक्रीले रामकुमार साहलाई फोन गरेर फुलगेनसहितका मान्छेलाई मार्ने धम्की दिएका थिए। झाँकीले भनेको कुरा पक्राउ परेका रामकुमार साहको भनाइ उद्धृत गर्दै एसपी चतुर्वेदीले भने, ‘भूतप्रेत लगाएर फुलगेनसहित केही मान्छे दसैंअघि नै मार्छु।’

धामीले मार्ने चेतावनी दिएको कुरा फुलगेनले रामकुमार साहमार्फत् जानकारी पाएका थिए। त्यसपछि फुलगेनले नै योजना बनाएर उनकै निर्देशनमा झाँक्री यादवको हत्या भएको देखिन्छ।

कात्तिक २० गते सिरहामा झाँकी काम गर्न आएको बेला रामकुमार साहले साँझ सवा ६ बजे फोन गरेर झाँक्रीलाई भेट्न बोलाए। गम्हरियास्थित कमला नदीको पूर्व तटबन्ध भएको स्थानमा झाँक्री यादवलाई लगेको अनुसन्धानबाट खुलेको छ। सोही ठाउँमा खुकुरी प्रहार गरेर हत्या गरिएको अवस्थामा झाँक्रीको शव भेटिएको हो।

सुरुमा प्रहरीले झाँक्री हत्याको आशंकमा फुलगेनलाई पक्राउ गरेको थियो। उनले हत्या गरिएको स्वीकार गर्दै रामकुमार साह र सिरहाकै मिर्चैया नगरपालिका–४ का जितेन साहको नाम लिएका थिए।

फुलगेनमार्फत् उनीहरु दुवैलाई प्रहरीले पक्राउ गरेको थियो। उनीहरुले पनि हत्यामा धनुषा कमला नगरपालिका–६ सखुवामडानका २५ वर्षीय अजयकुमार महतो र सोही ठाउँका २१ वर्षीय राजलाल महतो पनि पक्राउ परेका छन्।

यसरी झाँक्री हत्याका योजनाकार फुलगेन, झाँक्रीलाई फोन गरेर बोलाउने रामकुमार, खुकुरी प्रहार गर्ने जितेन, अजय र राजलालले हत्यामा सहयोगी भूमिका निभाएको पाइएको छ।

प्रहरीले हत्यामा प्रयोग भएको खुकुरी र जितेन साहले लगाएको सर्ट सारस्वार बेलहा जाने बाटोको कल्भर्ट नजिक पानीजमेको स्थानमा फालेको अवस्थामा बरामद गरेको छ। झाँक्रीलाई रेटेपछि रगत लत्पतिएकाले जितेनले आफूले लगाएको सर्टसमेत फालेका थिए।

त्यसैगरी अजय महतोबाट मृतकको झोला र मोबाइल बरामद गरिएको एसपी चतुर्वेदीले बताए। जितेन साहको टिसर्ट राखेको झोला धनगढीको पोखरीमा फालेको अजयले नै बताएका थिए। उनकै सूचनाका आधारमा ती प्रमाण बरामद गरेको सिरहा प्रहरीले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

रवीन्द्र मिश्रलाई थप पाँच दिन हिरासतमा राख्न अनुमति

राप्रपा रुपन्देही उपाध्यक्षसहित तीन नेताले दिए राजीनामा

सांसद माया राईविरूद्ध ३७ लाख ३५ हजार बिगाेसहित पुरक अभियाेजनमार्फत मुद्दा दायर