काठमाडौं- मंसिर १४ गते हुने उपनिर्वाचनमा प्रतिनिधिसभा सदस्यका लागि कास्की-२ का उम्मेदवार खेमराज पौडेलका पक्षमा जित निकाल्न प्रमुख प्रतिपक्षी दल नेपाली कांग्रेसले आफ्नो शक्ति पोखरा केन्द्रित गरेको छ।
जिल्ला पार्टी कार्यसमितिबाट सिफारिस भएका १६ जनालाई उछिन्दै उम्मेदवार बन्न सफल भएका पौडेलका पक्षमा मत माग्न कांग्रेसका शीर्ष नेताहरूको पोखरा दौड बाक्लिएको छ। पार्टीले उच्च प्राथमिकतामा राखेको कास्की-२ को घरदैलो कार्यक्रममा कांग्रेसका शीर्ष नेताहरू सक्रिय भएर लागेका छन्।
सो निर्वाचन क्षेत्रमा पर्ने पोखरा महानगरपालिकाका ११ वडामध्ये ९ वडामा कांग्रेसले घरदैलो प्रचार सकिसकेको छ। १६ र २१ नम्बर वडामा चुनावी घरदैलो बाँकी छ। कांग्रेसले ठूला चुनावीसभा भन्दा प्रत्येक वडामा कोणसभालाई प्राथमिकता दिएको कास्की कांग्रेसका सभापति कृष्ण केसीले बताए। पहिलो चरणको प्रचारप्रसार सकिएपछि दोश्रो पटक पुनः घरदैलो अभियानमार्फत् मतदाताकहाँ पुग्ने तयारी रहेको जिल्ला सभापति केसीको भनाइ छ।
कार्तिक २१ मा भएको उम्मेदवारी मनोनयन दर्तामा उपसभापति विमलेन्द्र निधि पोखरा पुगेका थिए।
उम्मेदवारी दर्तालाई कांग्रेसले शक्ति प्रर्दशनकै रुपमा उपयोग गरेको थियो।
गत शनिबार पोखरा महानगरपालिका-११ को घरदैलो तथा कोणसभामा नेता कृष्णप्रसाद सिटौला सहभागी थिए।
सोही दिन नेतृ डिला संग्रौला पनि घरदैलोमा सहभागी भइन्।
सरकार लोकतान्त्रिक प्रक्रियामा नहिंडेको जनाउँदै नेता सिटौलाले कांग्रेसले जित्नैपर्ने अवस्था आएको बताएका थिए। अर्का नेता प्रदीप पौडेलले आइतबार घरदैलो प्रचारमा सहभागी भई उम्मेदवार पौडेललाई साथ दिएका थिए। केन्द्रीय सदस्यसमेत रहेका पौडेलले चुनावी प्रचारपछि भएको सभामा बोल्दै भ्रष्टचारीको संरक्षणकर्ता वर्तमान सरकार भएको आरोप लगाए। प्रचारका क्रममा पुगेका नेताहरुले कांग्रेसका एजेन्डा प्रस्तुत गर्नेभन्दा बढी समय सरकारको आलोचनामा खर्चिएका छन्।
चुनावी अभियान थप प्रभावकारी बनाउन पार्टी सभापति शेरबहादुर देउवा, वरिष्ठ नेता रामचन्द्र पौडेल, प्रवक्ता विश्वप्रकाश शर्मा र नेता गगन थापा पोखरा जाने कार्यतालिका तय भएको छ। मंसिर ६ मा सभापति देउवा र वरिष्ठ नेता पौडेल पोखरा जाने निर्धारण भएको छ। मंसिर ७ गते बिहानको चुनावी अभियानमा देउवा र पौडेल सहभागी हुनेछन्। प्रवक्ता शर्मा र नेता थापा पोखरा गएका बेला अधिकतम समय कोणसभा गर्ने पार्टीको तयारी छ।
थापाले मंसिर ६ र ७ मा वडास्तरमा हुने कोणसभालाई सम्बोधन गर्नेछन्। त्यसलगत्तै पार्टी प्रवक्ता चुनावी अभियानमा सहभागी हुनेछन्। मंसिर ९, १० र ११ मा हुने चुनावी कोणसभामा शर्मा सहभागी हुनेछन्। उम्मेदवार पौडेलको पक्षमा मत माग्न कोणसभामा सहभागी हुने प्रवक्ता शर्मा पछिल्लो केन्द्रीय वक्ता हुनेछन्। मंसिर १२ गतेबाट मौन अवधि सुरु हुने निर्वाचन आयोगले सूचना जारी गरिसकेको छ।
पोखरा महानगरपालिकाका ११ वटा वडा समेटेर कास्की-२ निर्वाचन क्षेत्र बनाइएको छ। यस निर्वाचन क्षेत्रमा पोखरा महानगरपालिकाका ४, ७, ८, ९, ११, १५, १६, १७, २०, २१ र २३ नम्बर वडाहरु पर्दछन्। संघीय संरचनाका क्रममा तत्कालीन निर्वाचन क्षेत्र नम्बर २ र ३ का केही स्थानहरू समावेश गरी हालको कास्की-२ निर्वाचन क्षेत्र बनाइएको छ।
२०७४ मा भएको स्थानीय निर्वाचनमा कांग्रेसले ४, ९ र ११ वडामा विजयी भएको छ। गत निर्वाचनमा भन्दा यसपटक एक हजार १ सय ७० मतदाता थपिएका छन्। उपनिर्वाचनका लागि मतदाताको संख्या ७१ हजार ८२१ पुगेको छ। यसअघि ७० हजार ६५१ मतदाता थिए। गत संसदीय निर्वाचनमा ४९ हजार ९१३ मत खसेको थियो।
२०७४ कै मंसिरमा भएको संसदीय निर्वाचनमा पूर्वपर्यटनमन्त्री रवीन्द्र अधिकारीले २७ हजार २ सय ७ मत प्राप्त गरेका थिए। निकटतम प्रतिस्पर्धी कांग्रेसका उम्मेदवार देवराज चालिसेले १८ हजार ६ सय ६१ मत ल्याएका थिए। उनीहरुबीचको मतान्तर ८ हजार ५ सय ४६ थियो। विगतका ६ संसदीय निर्वाचन हेर्दा ५ पटक विजयी भएको छ। २०५६ मा कांग्रेसका महादेव गुरुङले विजयी निकालेका थिए। त्यसअघि र पछि पनि तत्कालीन एमालकै आधिपत्य रहेको क्षेत्र हो हालको कास्की-२। २०६४ सालको निर्वाचनमा एकछत्र विजयी भएको तत्कालीन माओवादीले यो क्षेत्रमा भने जित्न सकेको थिएन। २०६४ पछिका तीनै संसदीय निर्वाचनमा यो क्षेत्रबाट पूर्वमन्त्री अधिकारी विजयी भएका थिए।
वर्तमान सरकारले जनअपेक्षा अनुरुप कार्य गर्न नसकेको आवाज उठिरहँदा प्रमुख प्रतिपक्षी दलले त्यसै मुद्दालाई चुनावी प्रचारको अस्त्र बनाएको छ। घरदैलो प्रचारका क्रममा सरकारप्रति जनताको आक्रोश व्यक्त हुने गरेको कास्की कांग्रेसका सभापति केसीले बताए। सरकारप्रति जनताको वितृष्णा बढेको जनाउँदै केसीले भने, ‘निर्वाचन क्षेत्रका जनतामा आक्रोश र निराशा व्याप्त छ। हामीले उठाएको उम्मेदवारको निष्ठा र कांग्रेसका सबै नेता कार्यकर्ता एकढिक्का भएकाले चुनाव जित्छौं।’
यो निर्वाचन क्षेत्रमा सत्तारुढ दल नेकपाले पूर्वमन्त्री अधिकारीकी श्रीमती विद्या भट्टराईलाई उठाएको छ भने चुनावी प्रतिस्पर्धामा २१ जना छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
