काठमाडौं- बंगलादेशमा भइरहेको एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपको फाइनलमा आज नेपालले माल्दिभ्सविरुद्ध खेल्दैछ।
बंगलादेश ढाकास्थित शहीद सुहरावर्दी इन्डोर स्टेडियममा हुने खेल नेपाली समयअनुसार दिउँसो २ः४५ मा सुरु हुनेछ। नेपाल समूह चरणका खेलमा अपराजित रहँदै फाइनलमा पुगेको हो।
समूह चरणमा अफगानिस्तान, कीर्गिस्तान, बंगलादेश सबैलाई हराएको नेपालले समूह चरणकै अन्तिम खेलमा माल्दिभ्सलाई नै ३–० को सोझो सेटमा हराएको थियो। यसले पनि फाइनलमा नेपालको मनोबल उच्च रहेको छ। राउण्ड रोबिन लिगका आधारमा सञ्चालन भइरहेको प्रतियोगितामा नेपाल र माल्दिभ्स शीर्ष दुईमा पर्दै उपाधिका लागि भिड्न लागेका हुन्।
नेपाली टोलीमा रहेकी स्पाइकर सरस्वती चौधरीले आफूहरु उपाधि जित्ने लक्ष्यका साथ बंगलादेश आएको र खेलहरु त्यहीअनुरुप भइरहेकाले उपाधि जित्नेमा विश्वस्त रहेको बताइन्।
‘हुन त हामीले विपक्षी टिमलाई कहिल्यै पनि कमजोर सोच्नु हुँदैन। हामी आफ्नो मेहनतमा विश्वास गरेर नै अगाडि बढेको हो। माल्दिभ्स त्यति राम्रो पनि होइन र नराम्रो टिम पनि होइन, यसैले हामीले पहिलेजस्तै खेल्न सके उपाधि जित्ने छौँ’ उनले भनिन्।
आफूहरु सबैको तालमेल मिलेको र समूह चरणका खेलमा जस्तै प्रदर्शन गर्न सके उपाधि जित्नेमा विश्वस्त रहेको उनको भनाइ छ।
सरस्वतीले माल्दिभ्सविरुद्धको खेलमा ‘प्लेयर अफ दि म्याचको’ अवार्ड पनि पाएकी थिइन्। अफगानिस्तानसँगको पहिलो खेलमा उनी चोटका कारण बाहिर थिइन्। दोस्रो खेलमा कीर्गिस्तानविरुद्ध उनले तेस्रो सेट खेलेकी थिइन्। त्यसपछि बंगलादेशविरुद्ध पहिलो सेटमा मात्रै खेलेकी उनले माल्दिभ्सविरुछ तीनै सेट खेल्दै उत्कृष्ट प्रदर्शन गरेकी थिइन्।
नेपालले समूह चरणमा सबै टिमलाई सोझो सेटमा नै पराजित गरेको थियो। पहिलो खेलमा अफगानिस्तानलाई २५–४, २५–९ र २५–६ ले हराएको नेपालले त्यसपछि कीर्गिस्तानलाई २५–१५, २५–१९ र २५–२०, बंगलादेशलाई २५–७, २५–६ र २५–६ र माल्दिभ्सलाई २५–१४, २५–६ र २५–१३ ले हराएको थियो।
एसियन सिनियर महिला सेन्ट्रल जोन भलिबल प्रतियोगिता पहिलोपटक आयोजना भइरहेको हो। जसमा सहभागिताले नेपालले झण्डै दुई वर्षपछि महत्वपूर्ण अन्तर्राष्ट्रिय प्रतियोगिता खेल्न पाएको छ। पहिलो प्रतियोगितामा नै उपाधि जित्न सके नेपाली भलिबलका लागि यो ऐतिहासिक हुनेछ।
नेपालका प्रशिक्षक जगदिश भट्ट पनि नेपाली टोलीको प्रदर्शनले उपाधि जित्नेमा मेहनत गरिरहेको बताउँछन्। उनले टिममा रहेका नयाँ खेलाडीहरुलाई पनि उसैगरी मौका दिइरहेका छन्। स्पाइकर निरुता ठगुन्ना, मिडिल ब्लकर सुनिता खड्का र लिब्रो सलिना श्रेष्ठदेखि सेटर जानकी भण्डारी, मिडिल ब्लकर सोफिया पुन र स्पाइकर पूनम चन्द सबैले आफ्नो खेल प्रमाणित गर्ने मौका पाइरहेका छन्।
यो प्रतियोगिताले नेपालमा नै मंसिर १५ देखि हुने १३ औँ दक्षिण एसियाली खेलकुद (साग) का लागि राम्रो तयारी हुने बताइएको छ। नेपालले अहिलेसम्म साग खेलकुदको महिला भलिबलमा तीन पटक कास्य पदक मात्रै जित्न सकेको छ। अहिले अन्तर्राष्ट्रिय खेलहरुमा भइरहेको सहभागिताले नेपालले पहिलो पटक स्वर्ण जित्ने लक्ष्यका साथ बढिरहेको छ।
नेपाली महिला भलिबल टोलीले अहिलेसम्म कुनै पनि ठूला प्रतियोगितामा स्वर्णपदक जित्न सकेको छैन। २०१४ मा काठमाडौंमा आयोजना भएको दक्षिण एसियाली आमन्त्रण महिला भलिबल च्याम्पियनसिपमा नेपालले रजत पदक भने जितेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107798.jpeg)
-1791106876.png)
-1786602170.png)
