राजविराज- राजविराजको मविव (महेन्द्र विन्देश्वरी बहुमुखी) क्याम्पसमा तालाबन्दीसहित जारी आन्दोलनमा सिरहा सदरमुकामस्थित सूर्यनारायण सत्य नारायण मोरबैता यादव बहुमुखी क्याम्पस र धनुषाको जनकपुरस्थित रामस्वरुप रामसागर बहुमुखी क्याम्पसले पनि ऐक्यबद्धता जनाएका छन्।
तीन वटै क्याम्पसलाई राजर्षि जनक विश्वविद्यालयमा गाभ्ने निर्णयविरुद्ध राजविराज क्याम्पसकमा अनिश्चितकालीन तालाबन्दी गरिएको छ। माघ १९ गतेदेखि नै आन्दोलन सुरु गरेका प्राध्यापक तथा कर्मचारीहरुले सरकारले आफूहरुको मागप्रति बेवास्ता गरेको भन्दै आइतबार तालाबन्दी गरेका हुन्।
तालाबन्दीलगत्तै तीन वटै क्याम्पसमा प्राध्यापक तथा कर्मचारीद्वारा गठित संघर्ष समितिले सोमबार संयुक्त प्रेस विज्ञप्ति जारी गर्दै आन्दोलनमा ऐक्यबद्धता जनाएका छन्।
तत्कालीन व्यवस्थापिका संसद्ले पारित गरेको राजर्षि जनक विश्वविद्यालय सम्बन्धी विधेयकको ३ (३) अनुसार जनकपुर क्याम्पसलाई आधार क्याम्पस तथा राजविराज र सिरहा क्याम्पसलाई आङ्गिक क्याम्पसको रुपमा गाभ्ने प्रावधानले पुराना क्याम्पसको अस्तित्व संकटमा परेको विज्ञप्तिमा उल्लेख छ।
संसदले गत असोज २६ गते राजर्षि जनक विश्वविद्यालय सम्बन्धी विधेयक पारित गरेको थियो।
विज्ञप्तिमा विधेयकको प्रावधान नसच्याएसम्म आन्दोलन जारी रहने जनाइएको छ। प्रदेश २ अन्तर्गत पर्ने त्रिभुवन विश्वविद्यालयका ४ आंगिक क्याम्पसमध्ये वीरगञ्जबाहेक सप्तरी, सिरहा र जनकपुरका क्याम्पस विश्वविद्यालयमा गाभ्ने निर्णय गलत भएको जनाइएको छ।
पुराना क्याम्पसलाई सेवा र सर्तहरु नै अन्यौलमा रहेको विश्वविद्यालयमा गाभेर प्राध्यापक, कर्मचारी र विद्यार्थीहरुको भविष्य अन्यौलमा पार्न खोजिएकाले विरोध गर्नुपरेको मविव क्याम्पस राजविराज संघर्ष समितिका संयोजक सिंहेश्वर प्रसाद यादवले बताए।
‘कार्यरत कर्मचारी र प्राध्यापकसँग परामर्शसमेत नगरी लादिएको विधेयक आपत्तिजनक छ’, उनले भने, ‘हामी त्रिवि अन्तर्गत नै रहन चाहन्छौं, त्यसको ग्यारेन्टी नभएसम्म आन्दोलन जारी रहन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
