सप्तरी– राजविराको महेन्द्र विन्देश्वरी बहुमुखी क्याम्पसलाई राजर्षि जनक विश्वविद्यालयमा गाभ्ने निर्णय विरुद्ध आन्दोलनरत संघर्ष समितीले आइतबार क्याम्पसमा अनिश्चितकालीन तालाबन्दी गरेको छ।
क्याम्पसको सम्पूर्ण कामकाज ठप्प हुनेगरी तालाबन्दी गरिएको छ। तत्कालीन व्यवस्थापिका संसदले पारित गरेको राजर्षि जनक विश्वविद्यालय सम्बन्धी विधेयकको कतिपय प्रावधानले त्रिभुवन विश्वविद्यालयका कतिपय आंगिक क्याम्पसको अस्तित्व संकटमा परेको भन्दै त्यसको विरोधमा गत माघ १९ गतेदेखि नै आन्दोलन सुरु भएको थियो। संसदले गत असोज २६ मा राजर्षि जनक विश्वविद्यालय सम्बन्धी विधेयक पारित गरेको थियो।
विधेयकको विरोधमा त्रिवि प्राध्यापक संघका सभापति सिंहेश्वरप्रसाद यादवको संयोजकत्वमा गठित संघर्ष समितीले ऐनको प्रावधान नसच्याएसम्म आन्दोलन जारी रहने जनाएको छ। प्रदेश २ अन्तर्गत पर्ने त्रिभुवन विश्वविद्यालयका ४ आंगिक क्याम्पसमध्ये वीरगञ्ज बाहेक सप्तरी, सिरहा र जनकपुरका क्याम्पस राजर्षि जनक विश्वविद्यालयमा गाभ्ने निर्णय गलत भएको संयोजक यादवले जनाए।
पुराना क्याम्पसलाई सेवा र सर्तहरु नै अस्पष्ट रहेको विश्वविद्यालयमा गाभेर प्राध्यापक, कर्मचारी र विद्यार्थीको भविष्य अन्यौलमा पार्न खोजिएकाले विरोध गर्नुपरेको प्राध्यापक सुरेन्द्र गुप्ताले बताए।
‘कार्यरत कर्मचारी र प्राध्यापकसँग परामर्श समेत नगरी लादिएको विधेयक आपत्तिजनक छ’, उनले भने, ‘हामी त्रिवि अन्तर्गत नै रहन चाहन्छौं, त्यसको ग्यारेन्टी नभएसम्म आन्दोलन जारी रहन्छ।’
जनकपुरधाममा स्थापना हुने भनिएको उक्त विश्वविद्यालयमा प्राविधिक, सांस्कृतिक, कृषि लगायतका विषयमा पठनपाठन हुने विधेयकमा जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789992067.jpeg)
-1786602170.png)
-1789631269.jpg)
