काठमाडौं- अख्तियार दुरुपयोग अनुसन्धान आयोगले १ अर्ब रुपैयाँभन्दा बढी भ्रष्टाचार भएको भनी पर्यटन बोर्डका तत्कालीन प्रमुख सुवास निरौलासहित २३ जनाविरुद्ध १० अभियोग लगाउँदै भ्रष्टाचार मुद्दा दायर गरेको थियो।
अख्तियारले लगाएको आरोपमध्ये विशेष अदालतले ३ वटामा मात्र अनियमितता भएको ठहर गरेको छ।
'हामीले करिब एक महिना लगाएर सम्पूर्ण प्रमाणको अध्ययन गर्दा तीन वटा प्रकरणमा मात्र अनियमितता भएको पाएका छौं,' विशेष अदालतका अध्यक्ष बाबुराम रेग्मीले भने । उक्त प्रकरणमा तत्कालीन प्रमुख सुवास निरौला, लेखा प्रमुख अनिलकुमार दास र एसियन वर्ल्ड वाईड ट्राभल्स एन्ड टुर्सका सञ्चालक महेन्द्र खनाललाई मात्र दोषी ठहर गरेको छ।
विशेषले भ्रष्टाचार निवारण र अख्तियार दुरुपयोग अनुसन्धान आयोग ऐन अनुसार निरौला र दासलाई जनही ६ वर्ष कैद सजाय हुने तथा निरौलाको हकमा पदीय जिम्मेवारीको प्रमुख भएकाले एक वर्ष थप सजाय हुने फैसला सुनाएको छ।
विशेषले मदिरा खरिद, व्यक्तिगत खातामा रकम ल्याई खर्च गरेको र हवाई टिकट नक्कली खरिद प्रकरणमा उनीहरुलाई दोषी ठहर गरेको हो।
मदिरामा बोर्डको अनावश्यक पैसा खर्च गरेकोमा विशेषले निरौलालाई मात्र दोषी ठहर गरेको छ भने व्यक्तिगत खातामा रकम सारेको प्रकरणमा लेखा प्रमुख दासलाई र नक्कली हवाई टिकटमा महेन्द्र खनाललाई दोषी ठहर गरेको हो।
यस्ता छन् १० अभियोग र विशेषको फैसला
१. कार्यक्रम नै नगरी बिल भरपाई पेश गरी भ्रष्टाचारः
अख्तियारले पहिलो प्रकरणमा बोर्डले कार्यक्रम गरेको भनी बिल भरपाई पेश गरी रकम निकासा गरेको तर कार्यक्रम नगरेको विशेष अदालतको आरोपपत्रमा जिकीर गरेको थियो। ७ करोड ४३ लाख दाबी गरिएको यो प्रकरणमा अख्तियारको आरोप पुष्टि गर्ने प्रमाण प्राप्त नभएको विशेषले ठहर गरेको छ। यो प्रकरणमा अख्तियारले विपक्षी बनाएका सबैलाई विशेषले सफाइ दिएको छ।
२. समान खरिद नै नगरी बिल भरपाई पेश गरी भ्रष्टाचारः
अख्तियारले पर्यटन प्रवर्धनका लागि भन्दै बोर्डले सामान खरिद गरेको बिल भरपाई पेश गरेको तर उक्त सामान अनुसन्धानका क्रममा नपाइएको दाबी आफ्नो आरोपपत्रमा गरेको थियो। तर, विशेषले त्यसलाई अस्वीकार गरेको छ। विदेशमा र स्वदेशमा हुने पर्यटन प्रर्वर्धन कार्यक्रमका लागि सामाग्रीहरु खरिद भएको ठहर गर्दै विशेषले सबै प्रतिवादीलाई यी आरोपमा सफाइ दिने फैसला सुनाएको छ। अख्तियारले यो प्रकरणमा २ करोड भ्रष्टाचार भएको दाबी गरेको थियो।
३. सवारी साधान भाडामा देखाएर भ्रष्टाचारः
अख्तियारको आरोपपत्रमा अनावश्यक सवारी साधान भाडामा लिएको देखाएर समेत निरौला लगायतले बोर्डको रकम अनियमितता गरेको दाबी थियो। तर, विशेषले उक्त आरोपलाई पनि अस्वीकार गर्योे। विशेषले आफ्नै सवारी साधन नहुदाँ भाडामा लिएको देखिएको भन्दै सबै प्रतिवादीलाई यो आरोपमा सफाई दियो।
४. मदिरा खरिद गरी बोर्डमा बिल पेश गरेर भ्रष्टाचारः
व्यक्तिगत प्रयोजनका लागि बोर्डको रकमबाट मदिरा खरिद गर्दै भ्रष्टाचार गरेको अख्तियारको आरोपलाई भने विशेषले सदर गरेको छ। बोर्डमा रकम निकासाका लागि पेश भएका केही बिलमा निरौलाले भ्रष्टाचार गरेको विशेषको फैसलामा उल्लेख छ। विशेषले यो प्रकरणमा निरौलालाई मात्र दोषी ठहर गरेको छ। विशेषले १ लाख ३८ हजार रुपैयाँ बराबरको रकम बोर्डबाट निरौलाले भ्रष्टाचार गरेको ठहर गरेको छ।
५. अन्तर्राष्ट्रिय मेलाको नाममा भ्रष्टाचारः
अख्तियारले अन्तर्राष्ट्रिय पर्यटन मेलाका नाममा समेत निरौला लगायतले भ्रष्टाचार गरेको दाबी गरेको थियो। तर, विशेष अदालतले मेलामा भाग लिएको र त्यसमा खर्च भएको ठहर गरेको छ। मेलामा सहभागी भएको देखिएको भन्दै विशेषले यो प्रकरणमा सबैलाई सफाइ दिएको छ।
६. बोर्डको रकम व्यक्तिगत खातामा र काममा प्रयोग गरी भ्रष्टाचारः
अख्तियारले जनताको करबाट संकलन भएको राज्यको रकम व्यक्तिगत बैंक खातामा राख्ने र व्यक्तिगत प्रयोगमा चेक काट्ने कार्य गर्दै भ्रष्टाचार गरेको आरोप लगाएको थियो। उक्त प्रकरणमा आशिंक सहमत हुँदै विशेषले १ करोड २६ लाख रुपैयाँ बराबर भ्रष्टाचार भएको ठहर गरेको छ। अख्तियारले यो शीर्षकमा ४ करोड ६४ लाख ९७ हजार रुपैयाँ भ्रष्टाचार भएको दाबी गरेको थियो। विशेषले यो प्रकरणमा प्रमुख निरौला र लेखा प्रमुख अनिलकुमार दासलाई दोषी मान्दै निरौलाले ७७ लाख ५८ हजार र दासले ४८ लाख ७४ हजार भ्रष्टाचार गरेको ठहर गरेको छ।
७. बैंक खाताबाट रकम हिनामिना गरी भ्रष्टाचारः
अख्तियारले बोर्डको रकम व्यक्तिगत नाममा चेक काटेर भ्रष्टाचार गरेको आरोप लगाएको थियो। तर, विशेषले अख्तियारको दाबी अनुसार व्यक्तिगत रुपमा काटिएको चेकबाट रकम हिनामिना नभएको ठहर गरेको छ। व्यक्तिगत नाममा काटिएको रकम बोर्डको खातामा दाखिला भएको भन्दै सबै प्रतिवादीले उक्त आरोपमा सफाइ पाएका छन्।
८. नक्कली हवाई टिकट बनाएर भ्रष्टाचारः
अख्तियारले बोर्डले विदेश र स्वदेश भ्रमणमा नक्कली यात्रु र टिकट बनाई भ्रष्टाचार गरेको आरोप लगाएको थियो। उक्त प्रकरणमा विशेषले ट्राभल एजेन्सीका सञ्चालकसहित बोर्डका प्रमुख निरौला र लेखा प्रमुख दासलाई दोषी ठहर गरेको छ। एसियन वर्ल्ड वाइड ट्राभलका सञ्चालक महेन्द्र खनालले ७-७ जनाको नाममा नक्कली टिकट निर्माण गरेको विशेषको फैसलामा उल्लेख छ। विशेषले उक्त प्रकरणमा प्रमुख निरौला र लेखा प्रमुख दास तथा खनालले १ लाख ५४ हजार रुपैयाँ भ्रष्टाचार गरेको फैसलामा उल्लेख गरेको छ।
९. कार्यालय सहायक र कर्मचारीको नाममा रकम निकासा गरी भ्रष्टाचारः
बोर्ड प्रमुख निरौला र लेखा प्रमुख दासले मिलेमतो गरी करारमा रहेका कार्यालय साहायक र अन्य कर्मचारीको नाममा समेत चेक काटेर भ्रष्टाचार गरेको आरोप अख्तियारले लगाएको थियो। तर, विशेषले उक्त प्रकरणमा बोर्डको रकम कर्मचारीको नाममा कुनै वक्यौता नदेखिएको भन्दै सबै प्रतिवादीलाई सफाइ दिएको छ।
१०. आर्थिक नियमावली संशोधन गरी भ्रष्टाचारः
अख्तियारले लगाएका १० आरोपमध्ये अन्तिम आरोप निरौलाले भ्रष्टाचार गर्नका लागि विद्यमान आर्थिक नियमावली संशोधन गरी आफू अनुकूल निर्माण गरेको भन्ने थियो। तर, विशेषले उक्त प्रकरणमा सर्वोच्च अदालतमा मुद्दा दायर भई फैसला भएकाले थप आदेश गर्न नपर्ने भनेको छ। नियमावली निर्माण गर्ने अधिकार बोर्डलाई भएको फैसाल सर्वोच्चबाट आएकाले अनियमितता भएको ठहर गर्न नमिल्ने विशेषको फैसलामा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
