काठमाडौं- टेबल टेनिस खेलाडी स्यान्टु श्रेष्ठ नेपालमा हुने १३ औं दक्षिण एसियाली खेलकुद (साग) का लागि छनोट भएका छन्। गएको असोज ९ र १० गते सागका लागि भएको अन्तिम छनोट प्रतियोगितामा स्यान्टु मोटरसाइकल दुर्घटना परि सहभागी हुन वञ्चित भएका थिए।
अन्तिम छनोटमा सहभागी हुन नपाए पनि अखिल नेपाल टेबलटेनिस संघले डाक्टरले स्यान्टुलाई साग अगावै खेल्न ‘फिट’ ठहराएको खण्डमा शीर्ष ५ मा छनोट हुने खेलाडीसँग पुनः छनोट खेल्न मौका दिने प्रावधान राखेको थियो।
त्यही प्रावधान अनुरुप स्यान्टुले आइतबारै शीर्ष ५ मा छनोट भएका खेलाडी सुनिल महर्जनसँग प्रतिस्पर्धा गरेका थिए। जुन प्रतिस्पर्धामा स्यान्टु ११–२, ११–८ र ११–४ को सोझो सेटमा विजयी हुँदै छनोट भएका हुन्।
स्यान्टु असोज ८ गते नयाँ बानेश्वरबाट मैतीदेवी जाँदै गर्दा मोटरसाइकल दुर्घटनामा परेका थिए। बा १ ज ८८३१ नम्बरको माइक्रो बसले स्यान्टु सवार मोटरसाइकललाई ठक्कर दिएको थियो। जहाँ उनको दाहिने गोडामा चोट लागेको थियो।
स्यान्टुले हराएसँगै सुनिल महर्जन भने साग खेल्ने टोलीबाट बाहिरिएका छन्।
टोली थाइल्यान्ड जाने
सागमा सहभागी हुने नेपाली टेबलटेनिस टोली वैदेशिक प्रशिक्षणलाई सोमबार थाइल्यान्ड जाँदैछन्। पुरुष खेलाडीमा विनेश खनियाँ, पुरुषोत्तम वज्राचार्य, शिवसुन्दर गोथे, संयोग कपाली र स्यान्टु श्रेष्ठ रहेका छन्।
महिलामा नविता श्रेष्ठ, रविना महर्जन, दीक्षा तामाङ, एलिना महर्जन र सिक्का सुवाल छन्। प्रशिक्षकमा विनोद शाक्य, मोहनदास बासुकला, सन्जिव ढुंगेल र सन्ध्या शाक्य तथा व्यवस्थापकमा धर्ममान वज्राचार्य र सरिता श्रेष्ठ छन्।
वैदेशिक प्रशिक्षणपछि टोली नोभेम्बर २५ तारिख नेपाल फर्कने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
