काठमाडौं- राष्ट्रिय क्रिकेट टिमको कप्तानको जिम्मेवारी पाएका ज्ञानेन्द्र मल्लले राष्ट्रिय टिमको कप्तान बन्न पाउनु सम्मानको कुरा भएको बताएका छन्।
पारस खड्काको कप्तानीमा क्रिकेटमार्फत धेरै खुसी भित्र्याएको उल्लेख गर्दै उनले साथका लागि सबैलाई धन्यबाद दिएका छन्।
‘राष्ट्रिय क्रिकेट टिमको कप्तानको जिम्मेवारी पाउनु सम्मानको कुरा हो। पारसको उत्कृष्ट नेतृत्वमा राष्ट्रिय टिमले धेरै खुसी भित्र्यायो र सम्पूर्ण टिमले लक्ष्य प्राप्तीको बाटो पाएका थिए। यो माया र समर्थनका लागि सबैलाई धन्यबाद’ बिहीबार ज्ञानेन्द्रले ट्वीटमार्फत भनेका छन्।
यसअघि पारसको राजीनामापछि कप्तान बनिने या नबनिने विषयमा आफूले खासै नसोचेको बताएका ज्ञानेन्द्रले अहिले आफूले पाएको जिम्मेवारीका लागि दृढ भएर लाग्ने बताएका छन्।
नेपाल क्रिकेट संघ (क्यान) ले बुधबार ज्ञानेन्द्रलाई कप्तान र दिपेन्द्र सिंह ऐरीलाई उपकप्तानको जिम्मेवारी दिने निर्णय गरेको थियो। २००९ मा पारस खड्का कप्तान बनेदेखि नै ज्ञानेन्द्र मल्ल राष्ट्रिय टिमको उपकप्तान थिए।
It is an honour to be taking over the captaincy of Nepali National Cricket team. Under the tremendous leadership of Paras, the team always took a beatific flight and the whole team had that dream guide. Thankyou everyone for your love and support. pic.twitter.com/nFLn1r5ykx
— Gyanendra Malla (@gyanu_gm11) October 31, 2019
यसअघि पनि पारसको अनुपस्थितिमा टिममा कप्तानको जिम्मेवारी ज्ञानेन्द्रले नै पूरा गरिरहेका थिए। उनले २०१७ मा कीर्तिपुरमा भएको आइसिसी विश्व च्याम्पियन लिगमा केन्यासँग दुवै खेलमा कप्तानी गरेका थिए। यस्तै २०१७ मा नै एसिसी इमर्जिङ टिम कपमा ज्ञानेन्द्र कप्तान थिए। दुई महिनाअघि आइसिसी टी २० एसिया कप छनोटमा पारस घाइते हुँदा पनि ज्ञानेन्द्रले मलेसियाविरुद्ध नेपालको कप्तानी गरेका थिए।
राष्ट्रिय टिमसँगै घरेलु प्रतियोगिताहरुमा पनि ज्ञानेन्द्र मल्लले विभिन्न टिम सम्हालिसकेका छन्। ज्ञानेन्द्रकै कप्तानीमा ललितपुर प्याट्रियट्सले एभरेस्ट प्रिमियर लिगको गएको संस्करणको उपाधि जितेको थियो।
नेपालका लागि ज्ञानेन्द्रले ६ एकदिवसीयमा २३.८३ को एभरेजमा १ सय ४३ रन बनाएका छन्। २० अन्तर्राष्ट्रिय टी २० खेलमा उनले १६.७० को एभरेजमा ३ सय ३४ रन बनाएका छन्। यस्तै लिस्ट ए अन्तर्गतको ४३ खेलमा २६.१७ को एभरेजमा १ हजार ४७ रन बनाएका छन्। साथै उनले टी २० मा ४४ खेलमा १८.८९ को एभरेजमा ७ सय १८ रन बनाएका छन्।
सन् २००९ देखि राष्ट्रिय क्रिकेट टिमको कप्तान रहेका पारसले झण्डै साढे तीन वर्ष निलम्बनमा रहेको क्यानको निर्वाचनपछि भएको फुकुवासँगै राजीनामा दिएका थिए। पारसको राजीनामापछि नयाँ टिममा रहेका युवा खेलाडीलाई कप्तान बनाइने बहस चलिरहे पनि क्यानले उपकप्तान ज्ञानेन्द्रलाई नै कप्तानको जिम्मेवारी दिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748593223.png)
-1748872907.png)
