काठमाडौं- युएईमा हुने ‘अबुधाबी टी टेन’ क्रिकेट लिगमा टिम अबुधाबीमा आबद्ध भएका नेपाली राष्ट्रिय टिमका पूर्वकप्तान पारस खड्काले क्रिकेटमार्फत आफूले नेपालको झण्डा अझ माथि उठेको हेर्न चाहिरहेको बताएका छन्।
‘अबुधाबी टी टेन’ क्रिकेट लिग आउँदो २९ गतेदेखि मंसिर ८ गतेसम्म अबुधाबीको शेख जायद क्रिकेट मैदानमा हुँदैछ। जसमा पारस टिम अबुधाबीमा नै आबद्ध भएका हुन्। टी टेनको ड्राफ्ट सकिएको एकहप्तापछि मात्रै पारसको नाम सार्वजनिक भएको हो। पारसले १० हजार अमेरिकी डलर पारिश्रमिक पाउने छन्।
नेपालबाट पारससँगै सन्दीप लामिछाने पनि टी टेन लिगमा कर्नाटक टस्कर्सबाट खेल्नेछन्। सन्दीप ‘ए’ समूहमा परेको खेलाडी भएकाले उनले ४५ हजार अमेरिकी डलर पारिश्रमिक पाउनेछन्। सन्दीप फ्रेन्चाइज टी २० क्रिकेटमा यसअघि नै चलिरहेको भए पनि पारसका लागि आफूलाई अझ प्रमाणित गर्ने नयाँ अवसर आएको छ।
पारस सम्मिलित टिम अबुधाबीमा इंग्ल्याण्डका मोइन अलि आइकन खेलाडीका रुपमा रहेका छन्।
यस्तै टिममा पाकिस्तानका मोहम्मद आमिर, इंग्ल्याण्डका लुक राइट, एलेक्स डेभिस, रिचार्ड जेम्स, लेविस र ह्यारी गुर्ने, न्युजिल्याण्डका कोरी एन्डरसन, श्रीलंका निरोसन डिकवेला जस्ता खेलाडी रहेका छन्।
(1).JPG)
राष्ट्रिय टिमको कप्तानबाट पारसले राजीनामाको घोषणा गरे पनि निर्वाचनमार्फत भर्खरै आएको नेपाल क्रिकेट संघ (क्यान) ले उनको राजीनामा स्वीकृत गरिसकेको भने छैन। पारस राष्ट्रिय टिममा रहेर खेलिरहे पनि कप्तानमा नफर्कने मनस्थितिमा रहेका देखिन्छन्।
‘टिम अबुधाबीमा संलग्न हुन पाउनु सम्मानको कुरा हो, त्यस्तो रोमाञ्चक प्रतियोगितामा सामेल हुन म आतुर छु। खेल असाध्यै प्रतिस्पर्धात्मक हुनेछ भन्ने मलाई थाहा छ, तर म विश्वका सर्वश्रेष्ठ खेलाडीहरुको विपक्षमा राम्ररी खेल्नेछु’ पारसले भनेका छन्।
पारसले क्रिकेटमार्फत आफूले नेपालको झण्डा अझ माथि उठाउन चाहेको पनि बताएका छन्। ‘मलाई आश छ, आउँदो महिना अबुधाबीमा मैले खेल्दै गर्दा नेपालको झण्डा अझ माथि उठिरहेको हुनेछ’ उनले भनेका छन्।
टिम अबुधाबीले नेपालका पूर्वकप्तान पारसलाई ‘इन्टरनेसन कम्युनिटी प्रमोटर’ का रुपमा अन्तर्राष्ट्रिय स्तरमा टी टेनलाई चिनाउनका लागि टिममा आबद्ध गरेको जनाएको छ।
.jpg)
‘क्रिकेटको छोटो फम्र्याम्टमा पारस उत्कृष्ट खेलाडी हुन्। पारसको बलिङ र ब्याटिङ दुवैमार्फत जस्तोसुकै बलियो टिमलाई पनि चुनौती दिन सकिन्छ’ अबुधाबीमा प्रशिक्षक रहेका ट्रेभर बाइलिसले भनेका छन्।
इंग्ल्याड राष्ट्रिय टिमका पूर्वप्रशिक्षक समेत रहेका बाइलिसले पारसको आगमनले अबुधाबी टिम अझ सन्तुलित भएको बताएका छन्। ‘पारसको आगमनले अबुधाबी अझ सन्तुलित टिम बनेको छ, मलाई आशा छ पारसको खेल हेर्न अबुधाबीमा सयौँ नेपाली समर्थक पनि जम्मा हुनेछन्’ एन स्पोर्टससँग उनले भनेका छन्।
आठ टिम सहभागी हुने प्रतियोगितामा पारस रहेको टिम अबुधाबी समूह ‘बी’ मा रहेको छ। जसमा लाहोर कलन्दर्स, मराठा अरेबियन्स र नर्दन वारियर्स रहेका छन्।
(1).JPG)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
