काठमाडौं- नेपाल बुद्धिचाल संघको आयोजनमा एसियन एमेच्योर चेस च्याम्पियनसिप २०१९ आउँदो २२ देखि २९ गतेसम्म राजधानीमा हुने भएको छ।
बुढानिलकण्ठस्थित पार्क भिलेजमा आयोजना हुने च्याम्पियनसिपमा एसियाका ३० देशका १ सय भन्दा बढी खेलाडीहरुको सहभागिता रहने बताइएको छ।
मदन भण्डारी स्पोर्टस् एकेडेमी र काठमाण्डौ महानगरपालिकाको सहकार्य रहने च्याम्पियनसिपलाई नेपाली राजनीतिका अगुवा जन नेता मदन भण्डारीको स्मृतीलाई जोडी मदन भण्डारी मेमोरियल एसियन एमेच्योर चेस च्याम्पियनसिप २०१९ नामाकरण गरिएको छ।
कुल २ करोड ३० लाख ३१ हजार रुपैयाँको लागत अनुमान गरिएको प्रतियोगितामा नेपालसहित भारत, चीन, तथा अफगानिस्तानका अन्तर्राष्ट्रिय आर्विटरहरुले निर्णायकको भूमिका निर्वाह गर्ने छन्।
स्विस लिग प्रणाली अनुसार ९ चरणसम्म संचालन हुने च्याम्पियनसिपमा २१ सयभन्दा कम रेटिङ्ग तथा अधिकतम फिडेमास्टर सम्मको उपाधी प्राप्त खेलाडीले मात्र प्रतिस्पर्धामा सहभागिता जनाउन पाउने आयोजकले जनाएका छन्।
च्याम्पियनसिपमा प्रत्येक देशबाट दुई खेलाडीले प्रतिस्पर्धा गर्न पाउने र त्यसको सुविधा आयोजकले प्रदान गर्ने छ। त्यसदेखि बाहेकका खेलाडीहरुले च्याम्पियनसिपमा प्रतिस्पर्धा गर्न पाउने तर सुविधा आफैले ब्यहोर्नु पर्ने समेत प्रतियोगिता निर्देशक तथा संघका सचिव धरम लामाले पत्रकार सम्मेलनमा जानकारी गराए।
च्याम्पियनसिपमा नेपालका तर्फबाट सुजना लोहनी र पुरुषोत्तम चौलागाईले आधिकारिक खेलाडीको रुपमा प्रतिस्पर्धा गर्ने छन्। यस्तै अन्य खेलाडीहरुले पनि च्याम्पियनसिपमा प्रतिस्पर्धा गर्ने आयोजकले जनाएको छ। उनीहरुलाई अहिलेसम्मको खेल कौशलताको आधारमा च्याम्पियनसिपमा प्रतिस्पर्धा गराउन लागेकोसमेत लामाले जानकारी गराए।
कुल १३ हजार ५ सय डलर पुरस्कार राशी रहेको प्रतियोगितामा क्लासिक तथा ब्लिज बिधामा खेला संचालन हुने र विजयी पुरुष खेलाडीले क्यान्डिडेट मास्टर र नगद १५ सय डलर प्राप्त गर्ने छन् भने महिलातर्फ विजयी खेलाडीले ओमेन क्यान्डिडेट मास्टर र नगद ७ सय डलर प्राप्त गर्ने छन्।
यस्तै पुरुष तर्फ दोश्रोले १ हजार, तेश्रोले ७ सय ५०, चौथो र पाँचौले ५ सय, छैटौंले ४ सय, सातौले ३५० र आठौं देखि १० औं स्थान सम्मका खेलाडीले ३ सय डलर प्राप्त गर्ने छन्। महिला तर्फ दोश्रो हुनेले नगद ५ सय, तेश्रो, चौथौं र पाँचौ प्रत्येकले नगद ३ सय प्राप्त गर्ने छन्।
यसैगरि अनरेटेड, यु ८, यु १०, यु १२, यु १४, यु १६, यु १८ र यु २० का पहिलो र दोश्रो हुने खेलाडीहरुले क्रमशः ३ सय र २० सय डलर नगद प्राप्त गर्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
