काठमाडौं- रुपन्देहीको देवदह स्थायी ठेगाना भएका मनोज पुन (मनोज बुढामगर) को नाम एकवर्ष अघिसम्म कसैले सुनेका थिएनन्। तर, एक वर्षकै अवधिमा उनको नाम देशका व्यवसायीहरुका लागि आतंक बन्न पुग्यो। प्रहरीका लागि प्रमुख चुनौती।
गत वर्ष पुस ५ गते रुपन्देहीको देवहदमा युवा संघका नेता दुर्गा तिवारीको हत्यापछि पुन आपराधिक दुनियाँमा चर्चाका पात्र बने। तिवारीको हत्यालगत्तै उनले विदेशबाट फोन गरेर घटनाको जिम्मेवारी लिएका थिए। त्यसरी अपराधको जिम्मेवारी लिनुको उद्देश्य आतंक मच्चाएर पैसा असुल्नु थियो।
सोही योजनाअनुसार तिवारीको हत्यालगत्तै उनले विदेशबाट रुपन्देहीका व्यवसायीलाई फोन गर्दै करोडौं माग्न थाले। पैसा नदिए तिवारीकै हालत बनाइदिने भन्दै धम्की दिन्थे। व्यापारीहरुको गाडी नम्बर र उनीहरुको लोकेसन लिएरसमेत उनले धम्क्याउन छोडेनन्।
तिवारी हत्यापछि उनले रुपन्देहीबाट मात्र करोडौं असुले। घटनालगत्तै उनलाई पक्राउ गर्न प्रहरी टोली भारत गएपछि कुनै सफलता हात पारेन। किनकि उनी मोबाइल प्रयोग गर्दैन थिए। कहिले गोवा त कहिले दिल्ली पुग्थे। भारतका केही माफियाहरुसँग समेत उनले सम्बन्ध बनाइसकेका थिए।
प्रशस्त पैसा असुलेपछि भारतमा उनको दैनिकी विलासी र रोमान्सपूर्ण तरिकाले बितिरहेको थियो। अनुसन्धान आबद्ध एक प्रहरी अधिकारीका अनुसार उनी गोवामा रसियन प्रेमिकासँग बस्दै आएका थिए।
उनलाई पक्राउ गर्न प्रहरी असफल हुँदै गर्दा उनको आतंक देशभरि बढिरहेको थियो। काठमाडौं, कपिलवस्तु तथा चितवनका व्यवसायीलाई समेत धम्काएर पैसा असुल्न थालेका थिए उनले।
इन्टरनेट कलमार्फत धम्की दिन्थे भने हुन्डीमार्फत दुबईमा फिरौती पठाउन लगाउँथे। उनको सपना दाउद इब्राहिम जस्तै माफिया बन्ने थियो। अन्डरवर्ल्ड शैलीमै अपराध गरेर उनी करोडौं उठाउन पनि सफल भए।
पछिल्लो समय केही व्यवसायीले पैसा नदिएपछि उनले गत पुस २२ गते देवदहमा बसन्त पौडेलको हत्या गरे। पौडेलको हत्यापछि उनले घटनाको जिम्मेवारी लिए। त्यो घटनापछि रुपन्देहीका व्यापारीहरु थप आतंकित बन्न पुगे।
तर, बुधबारदेखि मनोज पुनको आतंक बन्द भएको छ। उनकै गृहनगर रुपन्देहीको देवदहमा प्रहरीको गोलीबाट उनले ज्यान गुमाएका छन्। पुन र उनका प्रमुख सहयोगी सोम आले प्रहरी इन्काउन्टरमा मारिएका हुन्।
राजनीतिक संरक्षण नपाएपछि अन्डरवर्ल्ड
देवदह २ घर भएका पुन पहिलेदेखि सो क्षेत्रमा धम्की र गुन्डागर्दीमा लागेका व्यक्ति हुन्। सुरुमा उनी केही ठेकदारहरुको पछि लाग्थे। पछि ठेक्कापट्टामा पैसा देखेपछि उनी ठेक्का मिलाउने र कमिसन खाने धन्दामा लागे।
राजनीतिक संरक्षणमा त्यो धन्दा अझ सहज हुने देखेपछि उनी एमालेको भ्रातृ संगठन युथफोर्समा लागेका थिए।
युथ फोर्सका नाममा पैसा उठाएको आरोपमा उनी कारबाहीमा परे। कारबाहीको प्रस्ताव गर्नेमा दुर्गा तिवारी र बसन्त पौडेल नै थिए। यही दुस्मनी साँधेर पछि दुवैको उनले हत्या गरे।
काठमाडौंमा निर्माण व्यवसायी महासंघका अध्यक्ष शरदकुमार गौचनको हत्यामा पनि उनको संलग्नता रहेको भन्दै प्रहरीले मुद्दा दायर गरेको थियो।
एक वर्षदेखि प्रहरी उनको पिछा लागे पनि सफलता हात पारेको थिएन। पुन अन्डरवर्ल्ड शैलीमा निर्धक्क धम्की र असुलीको धन्दा चलाइरहेका थिए। सिंगो प्रहरी संगठनलाई नै उनले चुनौती दिएका थिए। तर,
त्यो चुनौतीमा प्रहरी बुधबार सफल भएको छ। पुनको दाउद जस्तो जीवनशैली एक वर्षभन्दा टिक्न सकेन।
पुनलाई पक्राउ गर्न एक वर्षदेखि सक्रिय प्रहरीको केन्द्रीय अनुसन्धान ब्युरो (सिआइबी) का डिआइजी पुष्कर कार्की भन्छन्, 'ढिला र छिटो भन्ने मात्र हो, जस्तासुकै अपराधीलाई कारबाही गर्न नेपाल प्रहरी सक्षम छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766743671.png)
-1766743434.png)
-1766740258.png)
-1764146706.png)
-1766648928.png)
-1763721444.png)
