काठमाडौं– विश्व फुटबलमा उत्कृष्ट ३० खेलाडीमा ब्राजिलियन खेलाडी नेमार नपरेको चर्चा विश्व फुटबल समर्थकमाझ चलिरहेको छ। फुटबलमा सर्वाधिक महत्वपूर्ण मानिने व्यक्तिगत अवार्डमा पछिल्ला वर्षका स्टार नपर्नु केहीका लागि पत्याउनै नसक्ने घटना लाग्दैछ।
तर विश्व फुटबलमा नेमारको कमजोर उपस्थिति गएको सिजनकै निरन्तरता हो। यसैले बालोन डि’ओर का लागि उत्कृष्ट ३० खेलाडीको नाम सार्वजनिक हुँदा नेमारको नाम परेन। केहीले गएको वर्ष नेमारको घाइते हुने समस्या उनको अधोगतिको मुख्य कारण औँल्याइरहँदा धेरैले भने स्पेनिस क्बल रियल मड्रिडको कमजोर अवस्थाबारे चर्चा गरिरहेका छन्।
फ्रान्स फुटबलले बर्सेनी दिने अवार्डमा इंग्लिस क्लब लिभरपुलकै सात खेलाडी पर्दा रियल मड्रिडबाट गएको वर्षका विजेता लुका मोडरिक पनि उत्कृष्ट ३० खेलाडीभित्रै पर्न सकेका छैनन्। गएको सिजन पनि मड्रिडमा नै रहेका करिम बेन्जेमा र चेल्सीबाट यसै सिजन मड्रिड आएका इडन हाजार्ड उत्कृष्ट ३० भित्र छन्।
फ्रान्स फुटबलले वर्षका उत्कृष्ट खेलाडीलाई सन् १९५६ देखि नै बालोन डिओर अवार्ड दिँदै आएको हो। बीचमा २०१० देखि २०१५ सम्म फिफा वर्ष खेलाडी अवार्डसँगै जोडिएको बालोन डिओर त्यसपछि भने छुट्टै अवार्डका रुपमा नै छ।
यस वर्षका लागि सुरुवातमा छानिएका ३० खेलाडीको सूचीमा लिभरपुलपछि इंग्लिस क्बल म्यानचेस्टर सिटीका पाँच खेलाडी परेका छन्। यस्तै स्पेनिस क्लब बार्सिलोनाबाट चार खेलाडी मनोनयनमा छन्।
डिसेम्बर २ मा पेरिसमा हुने एक कार्यक्रममा बालोन डिओर विजेताको नाम घोषणा हुनेछ। २००७ मा ब्राजिलियन खेलाडी काकाले बालोन डिओर जितेपछि लगातार १० वर्ष लियोनल मेस्सी र क्रिष्टियानो रोनाल्डोले जितेका थिए। गएको वर्ष दुई खेलाडीको दबदबा तोड्दै लुका मोडरिकले अवार्ड जितेका थिए।
गएको सिजन कमजोर प्रदर्शन गरेको रियल मड्रिडले वर्षमै तीन प्रशिक्षक परिवर्तन नै गरेको थियो। गएको वर्ष बालोन डिओरको मनोनयनमा रियल मड्रिडबाटै आठ खेलाडी पर्नु उपलब्धि मान्दै प्रशिक्षक जुलेन लोपेटेगीको काम कमजोर भएको औँल्याइएको थियो। लोपेटेगीलाई बर्खास्त गरेर सान्टियागो सोलारीलाई प्रशिक्षक बनाएपछि पनि मड्रिडको अवस्था सुधार भएन। त्यसपछि लगातार तीन पटक च्याम्पियन्स लिग जिताएका प्रशिक्षक जिनेदिने जिदानलाई नै पुनः प्रशिक्षकमा नियुक्त गरियो।
अहिलेसम्म रियल मडिम रियल मड्रिडमा रहेका खेलाडीले ११ पटक बालोन डिओर जितिसकेका छन्। जसमा आधुनिक फुटबलमा क्रिष्टियानो रोनाल्डोले नै मड्रिडमा रहँदै चार पटक बालोन डिओर जितिसकेका छन्। रोनाल्डोले पहिलो बालोन डिओर जित्दा उनी म्यानचेस्टर युनाइटेडमै थिए।
विश्वकप फुटबल होस् या क्बल फुटबल राम्रा चलेका खेलाडीलाई क्लबमा ल्याउने रियल मड्रिडले रोनाल्डो युभेन्टस लागेपछि उनको स्थान पूर्ति गर्न सकेको छैन। इडन हाजार्डमा त्यो ‘स्टार’ गुण मड्रिडले खोजिरहे पनि बालोन डिओरका लागि उनको खेल पर्याप्त देखिएको छैन।
गएको सिजन थिबोउट कोर्टुवा, सर्जियो रामोस, राफेल भारान, मार्सेलो, इस्को, लुका मोडरिक, ग्यारेथ बेल र करिम बेन्जेमा बालोन डिओरको मनोनयनमा थिए। यो सिजन त्यसमध्ये करिम बेन्जेमा मात्रै छन्, जसको जित्ने सम्भावना लगभग शून्य छ। कीर्तिमानी १३ पटक च्याम्पियन्स लिग जितेको रियल मड्रिड जस्तो टिमका लागि यो दुःखद छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
