बाजुरा- बाजुराको बडीमालिका नगरपालिका–८ मा सोमबार राति जिप दुर्घटना हुँदा दुई जनाको मृत्यु भएको छ। मृत्यु हुनेमा हुम्ला ओदानचुली गाउँपालिका–३ का अन्दाजी ४० वर्षका बलबहादुर बुढा र मुगु खत्याड गाउँपालिका– ८ का ४५ वर्षीय कालीबहादुर रावत रहेको जिल्ला प्रहरी कार्यालय बाजुराले जनाएको छ।
दुर्घटनामा ५ जना घाइते भएका छन्। घाइते हुनेमा बूढीनन्दा नगरपालिका–९ का सत्य माविका शिक्षक तथा नेपाल शिक्षक महासंघका अध्यक्ष जनकबहादुर शाही, गौमुल गाउँपालिका– ६ का गोरखबहादुर रोकाया, हुम्ला जिल्ला आनन्द गाउँपालिका–३ का खडक रोकाया, स्वामीकार्तिक गाउँपालिका–५ जेराका सिंहबहादुर शाही र हुम्ला जिल्ला श्रीनगरका २५ वर्षीय कर्णबहादुर रोकाया रहेको जिल्ला प्रहरी कार्यालय बाजुराका प्रहरी नायब उपरीक्षक हरिबहादुर वलीले जानकारी दिए।
घाइते भएकामध्ये स्वामीकार्तिक गाउँपालिका–५ जेराका सिंहबहादुर शाही र हुम्ला जिल्ला श्रीनगर गाउँपालिकाका कर्णबहादुर रोकायाको अवस्था गम्भीर रहेको प्रहरी नायब उपरीक्षक वलीले बताए। गम्भीर घाइते भएका दुवैलाई उपचारका लागि अछामको बयलपाटा रिफर गरिएको प्रहरीले जनाएको छ।
कोल्टीबाट मार्तडी आउँदै गरेको से १ ज ९४० नं को जिप जिल्ला स्वास्थ्य कार्यालयको परिसरबाट ५० मिटर तल साँफे–मार्तडी राजमार्गमा खसेको थियो। गाडी चालक भने फरार छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
