काठमाडौं- आन्तरिक राजस्व विभागले करिब ८ अर्ब थान अन्तशुल्क स्टिकर खरिदको प्रक्रिया अघि बढाएको छ। अन्तशुल्क स्टिकरको भण्डार रित्तिन लागेपछि विभागले ठूलो परिमाणमा स्टिकर खरिद गर्न लागेको हो।
विभाग स्रोतले दिएको जानकारीअनुसार प्रति स्टिकर न्यूनतम ३२ सेन्ट अमेरिकी डलर (करिब ३२/३३) रूपैयाँ पर्ने गरि स्टिकर खरिदको प्रक्रिया अघि बढाइएको छ। विभागले इन्टरग्राफमा दर्ता भएको आपूर्तिकर्तासँग अन्तशुल्क स्टिकर किन्ने गरी सार्वजनिक सूचना प्रकाशित गरिसकेको छ।
'सबैभन्दा महत्वपूर्ण विषय भनेको अन्तशुल्क स्टिकरको सुरक्षा हो, त्यसैलाई ध्यान दिएर इन्टरग्राफमा दर्ता भएको कम्पनीले मात्रै बोलपत्र खरिद गर्न पाउने गरी सूचना प्रकाशित गरिएको हो,' विभाग स्रोतले भन्यो, 'विगतमा भारतबाट अन्तशुल्क स्टिकर खरिद गर्दा त्यहाँसम्म पुगेर व्यवसायीले नक्कली स्टिकर खरिद गरेको भेटिएपछि यसमा कडाइ गरिएको हो।'
आन्तरिक राजस्व विभागसँग अब करिब ६५ करोड थान अन्तशुल्क स्टिकर मौज्दात छ। स्टिकरको यो मौज्दातले असारसम्म धान्ने विभागले जनाएको छ। 'चालु वर्षको अन्त्यसम्ममा यो मौज्दातले काम गर्छ, त्यसपछिका लागि व्यवसायीलाई उपलब्ध गराउन नयाँ स्टिकर ल्याउनुपर्ने हुन्छ,' विभागका ती अधिकारीले भने।
आन्तरिक राजस्व विभागले यसपटक विभिन्न १६ किसिमका अन्तशुल्क स्टिकर खरिद गर्न लागेको छ। अन्तशुल्क स्टिकर प्रयोग हुने फरकफरक उत्पादनलाई लक्षित गरी विभिन्न किसिमका स्टिकर किन्न लागिएको हो।
कानुनी व्यवस्थाअनुसार मदिराको प्रत्येक बोतलमा अन्तशुल्क स्टिकर लगाउनुपर्छ। व्यवसयीले आन्तरिक राजस्व कार्यालयहरुबाट अन्तशुल्क स्टिकर किनेर प्रयोग गर्ने गरेका छन्। अन्तशुल्क ऐनअनुसार अन्तशुल्क स्टिकर नक्कली प्रयोग गरेको भेटिए ३०० प्रतिशत जरिवाना हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764510879.png)
-1764146706.png)
-1763721444.png)
-1763559424.jpg)
-1764080971.png)
