चितवन- विकाश रनिङ शिल्ड अन्तर्राष्ट्रिय फुटबल प्रतियोगिताको १३औं संस्करण फागुन ८ गतेदेखि सुरु हुने भएको छ। चितवनको नारायणगढस्थित क्याम्पाचौरमा हुने प्रतियोगिता फागुन १९ गतेसम्म चल्नेछ।
आयोजक विकाश शिल्ड समितिले प्रतियोगिताको तयारी सकिएको जनाएको छ ।
प्रचार–प्रसार समितिका संयोजक मञ्जुल प्रधानका अनुसार भारतको एक टोलीसहित कुल १२ वटा टोलीले प्रतियोगितामा सहभागिता जनाउनेछन्। प्रतियोगितामा चितवनका दुई टोली नारायणगढ फुटबल क्लब र भरतपुर फुटबल क्लब सहभागी हुनेछन्।
विभागिय टोलीहरु त्रिभुवन आर्मी क्लब, शसस्त्र प्रहरीको एपीएफ क्लब, नेपाल पुलिस क्लबका अलावा प्रतियोगितामा ‘ए’ डिभिजन क्लबहरु मनाङ मस्याङदी, थ्री स्टार, संकटा, फ्रेण्डस् तथा हेटौंडाको विजय युथ क्लब र धनगढीको सुदुर पश्चिम क्लब पनि सामेल छन्। प्रतियोगितामा एक मात्र अन्तर्राष्ट्रिय टोलीको रुपमा भारतको सिक्किम व्याईज सिक्किम सहभागी भएको छ।
विकाश रनिङ शिल्डको विजेताले ५ लाख रुपैयाँ नगद तथा शिल्ड र उपविजेताले २ लाख ५० हजार रुपैयाँ नगद प्राप्त गर्नेछ। प्रत्येक खेलमा म्यान अफ दि म्याच हुने खेलाडीलाई १० हजार रुपैयाँ, प्रतियोगिता उत्कृष्ट खेलाडीलाई ५० हजार रुपैयाँ र फेयर प्ले टिमलाई २५ हजार रुपैयाँ पुरस्कारको व्यवस्था गरिएको आयोजकले जनाएको छ।
प्रतियोगितामा यस वर्ष पुरस्कार राशी बढाएको हो। लामो समयपछि गतवर्ष भएको प्रतियोगितामा विजेताले ३ लाख र उपविजेताले एक लाख ५० हजार रुपैयाँ पुरस्कार पाएका थिए। यसवर्ष खेलाडीको सेवा सुविधा समेत थप गरिएको आयोजकले जानकारी दिएको छ।
टोली विभाजन
प्रतियोगितामा सहभागी १२ टिमलाई दुई पोलमा बाँडिएको छ। समूह ‘ए’ मा विजय युथ हेटौंडा, सशस्त्र प्रहरीको एपीएफ क्लब, नेपाल आर्मी, भरतपुर फुटबल क्लब(बीएफसी), सुदूरपश्चिमाञ्चल क्लब र मनाङ मस्र्याङ्दी क्लब छन्। त्यस्तै समूह ‘बी’ मा लोकप्रिय क्लब थ्रीस्टार, गतवर्षको शिल्ड विजेता संकटा, फ्रेण्ड्स, नेपाल पुलिस क्लब, सिक्किम ब्वाईज र नारायणगढ फुटबल क्लब (एनएफसी) छन्। पहिलो खेलमा ८ गते विजय युथ हेटौंडा र एपीएफ भिड्नेछन्।
८ टिमले प्रि–क्वार्टर खेल्नेछन् भने ४ टिमले क्वार्टरफाइनलमा सिधै स्थान बनाएका छन्। आर्मी, मनाङ, संकटा र थ्रीस्टारले पहिलो खेल जितेर आएका अरु ४ टिमसँग क्वार्टर फाइनल खेल्ने प्रचारप्रसार समिति संयोजक मञ्जुल प्रधानले जानकारी दिए।
प्रतियोगिताको पूर्वप्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले समुद्घाटन गर्नेछन्।
खेल हेर्नका लागि क्याम्पाचौरमा प्याराफिट निर्माण गरिएको छ। प्रतियोगिता सम्पन्न गर्न करिब ५१ लाख अर्च हुने आयोजकले बताएको छ।
(फोटोः विनोदबाबु रिजाल)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
