गोरखा- भूकम्पले क्षति पुगेको ऐतिहासिक महत्व बोकेको गोरखा दरबार भत्काइएको छ।
करिब ४ सय वर्ष पुरानो गोरखा दरबार भत्काएर जगदेखि नै पुनःनिर्माण गर्न लागिएको हो। विसं १९९० को भूकम्पले क्षति नपुगेको दरबारमा बारपाक केन्द्र भई २०७२ बैसाख १२ मा गएको भूकम्पले क्षति पुगेको थियो।
विसं १६८६ मा गोरखाका राजा राम शाहको पालामा यो दरबार बनाइएको थियो। दरबार हेरचाह अड्डाका प्रमुख हरिप्रसाद भुसालका अनुसार जगैदेखि भत्काइएको यो दरबार पुरानै स्वरुपमा जस्ताको त्यस्तै पुनःनिर्माण गरिनेछ। पुरातत्व विभागका कर्मचारीको उपस्थितिमा दरबार भत्काइएको हो।
'पुराना सामग्री हटाउने कार्य भइरहेको छ। काम लाग्ने सामग्री पुनः प्रयोग गर्ने र काम नलाग्ने सामग्री हटाउँछौँ,' भुसालले भने, 'जग राख्न काम भइरहेको छ।'
पचली सिभा जेभीले दरबार पुनःनिर्माणको ठेक्का पाएको छ। रु चार करोड ३७ लाख लगानीमा दरबार पुनःनिर्माण हुनेछ।
भूकम्पका बेला क्षति पुगेको गोरखनाथ मन्दिरलगायत संरचना भने पुनःनिर्माण गरिसकिएको छ।
दरबारमा रहेका राजा पृथ्वीनारायण शाहका गद्दीलगायत महत्वपूर्ण सामग्री भने सुरक्षित ठाउँमा भण्डारण गरिएका छन्। दरबार भत्काउँदा विसं १८६३ का बेलाका इँट्टा पनि फेला परेका छन्। आगामी तीन वर्षभित्र दरबार पुनःनिर्माण सकिने बताइएको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
