नयाँ दिल्ली (एजेन्सी)- यतिबेला भ्यालेन्टाइन सप्ताह चलिरहेको छ र युगल जोडीहरु आ-आफ्नै किसिमले प्रेमको उत्सव मनाइरहेका छन्। तर, सामाजिक सञ्जालमा एक पोस्ट केही दिनयता निकै भाइरल भइरहेको छ, जसले सबैलाई चकित पारिदिएको छ।
भारत गुडगाउँका युवक शकुल गुप्ताले फेसबुकमा एउटा पोस्ट राखेका छन्, जहाँ उनले भ्यालेन्टाइन्स डेमा भाडाका ब्वाइफ्रेन्ड बन्नका प्याकेजसहितको प्रस्ताव राखेका छन्।
शकुलले 'भ्यालेन्टाइन्स डे ब्वाइफ्रेन्ड रेन्टल' शीर्षकमा फेसबुकमा राखेको पोस्टमा विभिन्न चार वटा प्याकेजको सुविधा अघि सारेका छन्। आफ्नो उमेर २६ वर्ष लेखेका उनले एउटा प्रोमो कोड समेत दिँदै त्यस अन्तर्गत युवतीहरुलाई २० प्रतिशतसम्म छुट र 'अडी' कारमा नि:शुल्क सयर गर्ने सुविधा रहेको उल्लेख गरेका छन्।
पोस्टमा उनले आफूले गर्न सक्ने कुरा र गर्न नसक्ने कुराको अलग-अलग सूची नै लेखेका छन्। उनले युवतीहरुलाई साङ्लाबाट बचाउन र फेसनका कुरा गर्न नसक्ने बताएका छन्।
गर्न नसक्ने कुरा
फेसबुक पोस्टमा शकुलले बताएका छन्, उनी प्रेमिकालाई साङ्लाबाट बचाउने छैनन्। यस्तै, आफूले सामुद्रिक खानेकुरा नखाने र फेसनका विषयमा कुरा नगर्ने उनले उल्लेख गरेका छन्।
उनले पोस्टमा आफ्नो बारेमा पनि खुलेर जानकारी दिएका छन्। लेखिए अनुसार उनको उमेर २६ वर्ष छ, तौल ५६ किलो र उचाइ १ सय ६० सेन्टिमिटर छ। उनी जुनसुकै प्रकारको खाना बनाउन सक्छन् र 'नेटफ्लिक्स'मा फिल्म हेर्न रुचाउँछन्।
अन्तिममा उनले आफ्नो प्याकेज हेरेर कोही युवतीले आफूलाई ब्वाइफ्रेन्ड बनाउन चाहेमा पोस्टमा कमेन्ट गर्न वा इन्बक्समा मेसेज पठाउन सक्ने समेत भनेका छन्। उनले पोस्टमा आफ्नो फेसबुक र इन्स्टाग्रामको आइडी समेत राखेका छन्। उनको पोस्टलाई अहिलेसम्म तीन हजारभन्दा बढीले सेयर गरिसकेका छन्।
शकुलले फेसबुकमा भाडाको ब्वाइफ्रेन्ड बन्ने प्याकेज राखेको यो पहिलो पटक होइन, उनले गत वर्ष पनि यस्तो गरेका थिए। उनले दाबी गरे अनुसार गत वर्ष भ्यालेन्टाइन्स डेमा उनलाई पाँच युवतीले छनोट गरेका थिए। शकुलका अनुसार, ती सबै युवती मिलेर उनलाई होटल ओबेरायमा डिनर ख्वाए र सबैले उपहारको रुपमा छुट्टाछुट्टै आइफोन सेभेन पनि दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
