काठमाडौं– आइसिसी विश्व क्रिकेट लिग डिभिजन–२ अन्तर्गत युएईले दिएको १ सय १५ रनको लक्ष्य पछ्याएको नेपालले दुवै ओपनरलाई सस्तैमा गुमाएको छ।
दिलीप नाथ २ रनमा आउट भएका छन् भने ज्ञानेन्द्र मल्ल ५ रन बनाएर पेभेलियन फर्केका छन्। दिलीप तेस्रो तथा ज्ञानेन्द्र चौथो ओभरमा आउट भएका हुन्। यस्तै दीपेन्द्रसिंह ऐरी पनि ४ रनमा बोल्ड भएका छन्। यस्तै शरद भेषावकर ३ रन बनाएर खेलिरहदा एलबिडब्लुको धरापमा परे।
युएईका मोहमद नाभिदले २ विकेट लिए । रोहान मुस्ताफा र अमिर हायतले १-१ विकेट हात पारेका छन्।
अहिले कप्तान पारस खड्का र आरिफ शेख ब्याटिङ गरिरहेका छन्। नेपालले १५ ओभरमा ४ विकेट गुमाएर ५४ रन जोडेको छ।
ओसिलो मैदानका कारण ३४ ओभरमा घटाइएको खेलमा टस हारेर पहिले ब्याटिङ गरेको युएई ३१ ओभरमा १ सय १४ रनमा अलआउट भयो।
युएईका लागि शइमन अन्वारले सबैभन्दा बढी ३० रन जोडे।
बलिङतर्फ नेपालका सोमपाल कामीले ४ विकेट लिए। सन्दीप लामिछाने ३ विकेट लिँदा कप्तान पारस खड्काले २ विकेट हात पारे। करण केसीले १ विकेट आफ्नो नाममा लेखाए।
सोमपालले खेलको तेस्रो बलमै नेपाललाई सफलता दिलाएका थिए। उनले ओपनिङ ब्याट्सम्यान असरफ अहमेदलाई शून्य रनमा बोल्ड गरे। यस्तै सोमपालले गुलाम सब्बरलाई १६ रनमा आउट गरे। उनले दशौं नम्बरका ब्याट्सम्यान मोमहद नाभिदलाई पनि सिकार बनाए। उनले १० रन जोडे। सोमपालले अहमेद राजालाई ८ रनमा खेलिरहदा ज्ञानेन्द्र मल्लबाट क्याच गराए।
करणले युएईका कप्तान तथा ओपनर रोहान मुस्ताफालाई ७ रनमा विकेटकिपर दिलीप नाथबाट क्याच गराए।
सन्दीपले १८औं ओभरमा लगातार २ विकेट हात पारे। उनले १८ औं ओभरको दोस्रो बलमा रमिज साहजादलाई ४ रन तथा तेस्रो बलमा मोहमद उस्मानलाई शून्य रनमा आउट गरे। चौथो बलमा युएईका ब्याट्सम्यानले रन नलिएपछि सन्दीप ह्याट्रिक गर्न चुके। सन्दीपले व्यक्तिगत तेस्रो विकेटको रुपमा ३० रन बनाएर खेलिरहेका शइमान अन्वारलाई बोल्ड गरे।
पारसले मोमहद बोतालाई १५ रन बनाएर खेलिरहदा एलबिडब्लुको धरापमा पारे भने अडनान मुफ्तीलाई १८ रनमा आउट गरे।
खेल नामिबियाको ट्रस्टको युनाइटेड मैदानमा निर्धारित समयभन्दा ३ घन्टा ढिलो सुरु भएको थियो।
पहिलो खेलमा जित निकालेका दुवै टिम दोस्रो खेलमा पराजित भएका थिए। डिभिजन–२ को शीर्ष २ भित्र परेर एकदिवसीय विश्वकप छनोट प्रतियोगितामा स्थान बनाउन दुवै टिमका लागि यो खेल महत्वपूर्ण छ।
यसअघि नेपालले पहिलो खेलमा आयोजक नामिबियालाई १ विकेटले पराजित गरेको थियो। दोस्रो खेलमा नेपाललाई ओमानले ६ विकेटले हराएको थियो। युएईले पनि पहिलो खेलमा केन्यामाथि २ सय १८ रनको फराकिलो अन्तरको जित हात पारेको थियो। तर, दोस्रो खेलमा युएई क्यानडासँग २३ रनले पराजित भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
