चितवन– काठमाडौंको न्यू डायमण्ड एकेडेमी समूह ‘बी’ को विजेता बन्दै चितवनको पटिहानीमा जारी प्रथम मेयर कप अन्तर्राष्ट्रिय आमन्त्रण महिला भलिबल प्रतियोगिताको सेमीफाइनलमा प्रवेश गरेको छ।
पटिहानीस्थित आधारभूत विद्यालय धनौजीको खेल मैदानमा भएको खेलमा न्यू डायमण्डले विभागीय टोली नेपाल पुलिस क्लबलाई ३–० को सोझो सेटमा पाखा लगाएको हो। पुलिसविरुद्ध न्यू डायमण्डले २५–२२, २५–१८ र २५–२१ को एकतर्फी जीत निकालेको छ।
समूह चरणको अन्तिम खेलमा पराजित भए पनि पुलिसले यसअघि नै अन्तिम ४ मा आफ्नो स्थान सुरक्षित गरीसकेको छ।
आज बिहान भएको पहिलो खेलमा नेपाल पुलिसले भारतको हरियाणा पुलिस क्लबलाई ३–१ को सेटमा पराजित गरेको थियो। पहिलो सेट २०–२५ ले गुमाएको नेपाल पुलिसले बाँकि सेटमा खेलमा फर्किदैँ २५–२१, २५–२३ र २५–२१ को जित निकाल्यो।
दुई खेलमा लगातार हार व्यहोरेपछि भारतको हरियाणा पुलिस क्लब भने समूह चरणबाटै बाहिरिएको छ। हरियाणा आफ्नो पहिलो खेलमा न्यू डायमण्डसँग ३–० को सेटमा पराजित भएको थियो।
उता समूह ‘ए’ अन्तर्गत लगातार दोस्रो जित निकालेको सशस्त्र प्रहरीको एपीएफ क्लबले भने अन्तिम ४ मा प्रवेशको सम्भावनालाई बलियो बनाएको छ। आज भएको खेलमा एपीएफले अर्को विभागीय टोली नेपाल आर्मीलाई ३–० को सोझो सेटमा पाखा लगायो।
आर्मी्विरुद्ध एपीएफले २५–१६, २५–९ र २५–११ को एकतर्फी जीत निकाल्यो। हारपछि आर्मीले सेमिफाइनलमा स्थान सुरक्षित गर्न आफ्नो अन्तिम खेलमा बंगलादेशको राष्ट्रिय महिला भलिबल टोलीलाई पराजित गर्नुपर्ने हुन्छ।
यसअघि एपीएफले पहिलो दिन बंगलादेशलाई हराएको थियो। २ खेलमा स्पष्ट जित निकालेको एपीएफलाई समूह विजेता हुँदै अघिल्लो चरण प्रवेशका लागि चितवन टाइगर्समाथि जित निकाल्नुपर्ने हुन्छ।
यसैबिच घरेलु टोली चितवन टाइगर्सले पहिलो जित निकाल्दै सेमीफाइनल प्रवेशको सम्भावनालाई जिवितै राखेको छ। आज भएको खेलमा चितवनले बंगलादेशको राष्ट्रिय महिला भलिबल टोलीलाई ३–० को सोझो सेटमा पराजित गर्यो। बंगलादेशविरुद्ध चितवनले २५–१६, २५–२४ र २५–२२ को जित दर्ता गर्याे।
यसअघि आफ्नो पहिलो खेलमा शनिबार चितवन नेपाल आर्मीसँग स्तब्ध बनेको थियो।
उता दुई हार बेहोरिसकेको बंगलादेशका लागि प्रतियोगितामा रहिरहन आफ्नो अन्तिम खेलमा आर्मीमाथि जित हात पार्दै एपिएफ र चितवनबिचको खेलमासमेत भर पर्नुपर्ने हुन्छ।
चितवनले २ खेलमा एक जित र एक हार व्यहोरेको छ। समूह चरणको अन्तिम खेलमा उसले आजै बलियो विभागीय टिम एपीएफको सामना गर्नेछ। दोस्रो चरण प्रवेशका लागि उसले एपीएफलाई जित्नैपर्ने हुन्छ।
प्रतियोगिताको समूह चरणका सबै खेल आजै सम्पन्न हुने प्रचारप्रसार संयोजक रामहरि सेढाईंले जानकारी दिए। प्रचारप्रसार संयोजक सेढाईका अनुसार लिगकम नकआउटको आधारमा खेलाइएको प्रतियोगिताको तेस्रो दिन भोलि सेमीफाइनल र मंगलबार तेस्रो स्थान र उपाधि भिडन्त दुवै गरिनेछ।
प्रतियोगिताका विजेताले २ लाख रुपैयाँ, ट्रफी, मेडल र प्रमाणपत्र, उपविजेताले एक लाख रुपैयाँ ट्रफी, मेडल र प्रमाणपत्र, तृतीय हुने टिमले ५० हजार रुपैयाँ ट्रफी, मेडल र प्रमाण पत्र र सान्त्वना हुने टिमले २५ हजार रुपैयाँ, ट्रफी, मेडल र प्रमाणपत्र पाउनेछन्।
यस्तै प्रतियोगिताको उत्कृष्ट खेलाडीले नगद १० हजार रुपैयाँ प्राप्त गर्नेछन्। अन्य विभिन्न चार विद्यामा उत्कृष्ट हुने खेलाडीले ५ हजार रुपैयाँ पुरस्कार पाउने प्रतियोगिता संयोजक तथा भरतपुर महानगरपालिका–२२ का वडाध्यक्ष विष्णुराज महतोले जानकारी दिए।
प्रतियोगितामा विदेशी २ सहित ७ टोलीको सहभागिता रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
