काठमाडौं– आइसिसी विश्व क्रिकेट लिग डिभिजन–२ अन्तर्गत आज तय भएको नेपाल र युएईबीचको महत्वपूर्ण खेल प्रभावित बनेको छ। चिसो मैदानका कारण टसमा ढिलाइ भएको हो।
नामिबियाको ट्रस्टको युनाइटेड मैदानमा दिउँसो सवा १ बजेदेखि खेल हुने तय थियो। टसमा ढिलाइ हुने भएपछि अब खेल पनि ढिलो हुने क्रिक इन्फोका रिपोर्टर पिटर डेला पेनाले जनाएका छन्। पेनाका अनुसार नामिबियामा आज अपरान्ह मौसम सफा हुनेछैन।
यसअघि नेपाल र नामिबियाबीचको पहिलो खेल पनि मौसमले प्रभावित बनेको थियो। मौसमका कारण केन्या र नामिबियाबीचको हिजोको खेल फागुन १ का लागि सारिएको छ।
पहिलो खेलमा जित निकालेका दुवै टिम दोस्रो खेलमा पराजित भएका थिए। डिभिजन–२ को शीर्ष २ भित्र परेर एकदिवसीय विश्वकप छनोट प्रतियोगितामा स्थान बनाउन दुवै टिमका लागि खेल महत्वपूर्ण छ।
यसअघि नेपालले पहिलो खेलमा आयोजक नामिबियालाई १ विकेटले पराजित गरेको थियो। दोस्रो खेलमा नेपाललाई ओमानले ६ विकेटले हराएको थियो। युएईले पनि पहिलो खेलमा केन्यामाथि २ सय १८ रनको फराकिलो अन्तरको जित हात पारेको थियो। तर, दोस्रो खेलमा युएई क्यानडासँग २३ रनले पराजित भयो। क्यानडा प्रतियोगितामा दुवै खेलमा जित हात पार्ने एक्लो टिम हो।
डिभिजन–२ अन्तर्गत आजै नामिबिया र ओमान तथा केन्या र क्यानडाबीच प्रतिस्पर्धा हुँदैछ।
दुवै खेलमा खराब ब्याटिङ गरेको नेपालका प्रशिक्षक जगत टमाटाले युएईविरुद्धको खेलमा राम्रो स्कोर गर्ने कोसिस गर्ने नेपाल लाइभलाई बताए। 'यहाँको ३ वटै मैदानको विकेट फरक–फरक छ। ब्याटिङ गर्न सबै टिमलाई गाह्रो भइरहेको छ,' टमाटाले नामिबियाबाट भने, 'बोर्डमा राम्रो स्कोर जुन टिमले लगाउन सक्छ त्यसले जित्ने हो।'
यता युएईका प्रशिक्षक डोगी ब्राउन पनि टिमले दोस्रो खेलमा गरेको ब्याटिङ प्रति सन्तुष्ट छैनन्। पहिलो खेलमा ३ सय ९ रन बनाएको युएईले दोस्रो खेलमा २ सय १० रनको लक्ष्य भेट्टाउन सकेको थिएन। प्रशिक्षक ब्राउनले नेपाल विरुद्धको खेलमा ब्याटिङ महत्वपूर्ण हुने बताएको युएईको पत्रिका द नेसनलले जनाएको छ। उनले मैदानको अवस्थाअनुसार युएईले खेल्न नसकेको भन्दै आलोचना गरेका छन्। 'एउटा लयमा खेलिरहेको बेला एक्कासी पानी पर्दा डिएल मेथडलाई हेरेर खेल्नुपर्छ। तर, हामीले कन्डिसनलाई दोष दिनु हुन्न। जहाँ-जस्तो अवस्थामा पनि खेल्नुपर्छ।'
तस्बिर : पिटर डेला पेना
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
